Manehoa Fiheverana ny Tenin’i Jehovah Isan’andro!
1 Ny andro tsirairay dia mitondra zava-tsarotra vaovao ho an’ny finoanao. Angamba tsy mitsahatra manery anao hifanao fotoana aminy ny olom-pantatra iray eo amin’izao tontolo izao. Maniry anao hikatsaka asa hahazoana fisondrotana ny mpampianatra anao, na maniry anao hiasa ora maro kokoa ny mpampiasa anao. Mety hiharatsy ny fahasalamanao. Na dia mety hahazo anao na amin’ny fotoana inona na amin’ny fotoana inona aza ny fisedrana toy izany, dia tsy irery akory ianao. Vonona hanome anao ny fahendrena ilaina mba hiatrehana azy ireny, i Jehovah. Ny fandinihana ny andinin-teny ara-baiboly sy ny fanazavana ao amin’ny Fandinihana ny Soratra Masina, dia fitaovana iray izay ahafahanao mandray ny Tenin’i Jehovah tsy tapaka. Manararaotra an’io fandaharana io ve ianao?
2 Misy fanampiana azo raisina: Ny Isaia 30:20 (NW ), dia milazalaza an’i Jehovah ho ilay “Mpampianatra Lehibe Indrindra”, izay azon’ny vahoakan’i Jehovah itodihana, mba hahazoana fanampiana. Manome izay ilainao indrindra mba hiatrehana ireo zava-tsarotra ho an’ny finoanao izy. Amin’ny fomba ahoana? Manazava toy izao ny andininy manaraka: “Ny sofinao dia handre teny ao ivohonao manao hoe: Ity no làlana, ka andehano.” Amin’izao andro izao, i Jehovah dia mampita ny ‘teniny’ amin’ny alalan’ny Soratra Masina sy ny zavatra vita an-tsoratry ny “mpanompo mahatoky”. (Matio 24:45). Misy fahendrena tondraka, izay mahakasika saika ny lafiny rehetra amin’ny fiainana kristianina, ao amin’ny lahatsoratra amin’Ny Tilikambo Fiambenana tamin’ny lasa fotsiny. Ny fandinihana indray ireo fanazavana naverina notononina ao amin’ny Fandinihana ny Soratra Masina, dia manampy anao hanorina tahirim-pahalalana izay sarobidy tokoa, mba hiatrehana ny karazana fisedrana rehetra. — Isaia 48:17.
3 Makà fotoana ho amin’izy io: Na dia be zavatra natao aza ny reny iray, ny maraina, dia tapa-kevitra ny hamaky sy handinika ny andinin-teny sy ny fanazavana ho an’ny andro, niaraka tamin’ny zanany lahy, teo am-pisakafoany maraina. Ireny fanazavana ireny sy ny vavaka no teny farany reny isa-maraina, talohan’ny nandehanany ho any an-tsekoly. Nanatanjaka ilay zanakalahy hanohitra fitaomana hanao firaisana sy tsy hanaiky lembenana tamin’ny fanindrahindram-pirenena, ary hitory tamin-jotom-po tamin’ireo mpianatra sy ireo mpampianatra izy ireny. Na dia izy irery aza no hany Vavolombelona tany an-tsekoly, dia tsy nahatsapa tena ho irery velively izy.
4 Mitodiha any amin’i Jehovah sy ny Teniny, mba hahazoana fitarihan-dalana sy toromarika. Raha manao izany ianao, dia ho tena misy aminao, toy ny namana azo itokisana iray izy. Mitodiha any aminy isan’andro! Miaraka amin’ireo an-tapitrisany maro hafa maneran-tany, izay mandinika isan’andro ny Tenin’Andriamanitra, dia enga anie ny masonao hanjary “hahita ny [Mpampianatra Lehibe Indrindra, NW ] anao”.