Mampiavaka ny Vahoakan’Andriamanitra ny Fahalalam-pomba
1 Tsy fahita firy intsony ny fahalalam-pomba ankehitriny. Nahoana? Maika lava ny olona, ka na ny hanao hoe “Aza fady”, “Misaotra”, na “Miala tsiny” aza tsy tsaroany akory. Nilaza mialoha ny Tenin’Andriamanitra fa amin’ny andro farany, dia hihena ny fahalalam-pomba, satria ny olona ho ‘tia tena, ho mpandoka tena, ho mpiavonavona, tsy hisaotra, tsy hanam-pitiavana, tsy hahonom-po, tsy ho tia ny tsara, ary ho kirina.’ (2 Tim. 3:1-4) Izany toetra rehetra izany no mahatonga ny olona tsy hahalala fomba. Ny Kristianina kosa, amin’ny maha vahoakan’Andriamanitra azy, dia tsy maintsy mitandrina sao manahaka an’ity tontolo tsy misy fifanajana ity.
2 Inona no atao hoe fahalalam-pomba? Ny fahalalam-pomba dia azo adika ho fiheverana ny fihetseham-pon’ny hafa, sy fahaizana mitandro ny fihavanana. Ny olona mahalala fomba dia maneho fiheverana ny hafa, mahay manaja, tsara fanahy, ary mandanjalanja ny teny ataony. Ny fototr’ireo rehetra ireo dia ny fitiavana an’Andriamanitra sy ny namana. (Lioka 10:27) Tsy andoavam-bola izy ireo, kanefa tena sarobidy eo amin’ny fifandraisantsika amin’ny hafa.
3 Namela ohatra tonga lafatra i Jesosy. Nampihatra hatrany ny Fitsipika Volamena izy, dia ny hoe: “Araka izay tianareo hataon’ny olona aminareo, dia mba ataovy aminy kosa.” (Lioka 6:31) Tsy mahatalanjona antsika ve ny fiheverana sy ny fitiavana nasehon’i Jesosy tamin’ireo mpianany? (Matio 11:28-30) Vokatry ny fahatsoram-po sy ny hatsaram-panahy anefa ny fahalalam-pomban’i Jesosy, fa tsy fanarahana fitsipika tao anaty boky. Tsy maintsy miezaka manahaka ny ohatra tsara navelany isika.
4 Rahoviana ny Kristianina no tokony hahalala fomba? Indraindray ihany ve, toy ny rehefa te hiseho ho tsara? Sa rehefa ta hanaitra ny hafa ihany? Tsia! Tokony haneho fahalalam-pomba amin’ny fotoana rehetra isika. Tarehin-javatra inona avy anefa no tena ilantsika hanehoana azy io, rehefa miaraka amin’ny Kristianina hafa?
5 Ao amin’ny Efitrano Fanjakana: Ny Efitrano Fanjakana no toeram-pivavahantsika. I Jehovah no manasa antsika ho any, ka noho izany, dia vahiny na olona nasaina isika. (Sal. 15:1) Moa ve isika vahiny fakan-tahaka rehefa ao amin’ny Efitrano Fanjakana? Eritreretintsika tsara ve ny akanjo hanaovantsika sy ny fisehoantsika ankapobe? Mazava ho azy fa tsy ho akanjo fitena na akanjo tsy maotina no hanaovantsika. Na any amin’ny fivoriambe, na any amin’ireo fivoriana isan-kerinandro, ny vahoakan’Andriamanitra dia fantatra noho ny fisehoany maotina sy mendrika ny olona mitonona ho mpivavaka amin’Andriamanitra. (1 Tim. 2:9, 10) Sady maneho fanajana an’Andriamanitra isika amin’izany, no maneho fiheverana an’ireo olona nasaina hafa.
6 Ny fomba iray hafa anehoantsika fahalalam-pomba any am-pivoriana dia ny fahatongavana ara-potoana. Marina aloha fa tsy mora foana izany. Mipetraka lavitra angamba ny sasany, na manan-janaka maro tsy maintsy omanina. Voamarika anefa fa any amin’ny fiangonana sasany, dia efa ho ny 25 isan-jaton’ny mpitory no zatra tonga aorian’ny hira sy ny vavaka fanokafana. Tena mampanahy izany. Tsara hotadidina fa tafiditra amin’ny fahalalam-pomba ny fiheverana ny fihetseham-pon’ny hafa. Nanomana sakafo ara-panahy hahasoa antsika i Jehovah, ilay Tompom-panasana be fitiavana. Maneho fankasitrahana azy isika, ary mihevitra ny fihetseham-pony, raha tonga ara-potoana. Ambonin’izany, raha tonga tara amin’ny fivoriana isika, dia manelingelina no sady tsy maneho fanajana an’ireo izay efa manaraka ny fandaharana.
7 Mihevitra ireo vaovao koa ve isika, rehefa mivory? Anisan’ny fahalalam-pomba ny fiarahabana tonga soa azy ireo. (Matio 5:47; Rom. 15:7) Fiarahabana vokatry ny fo, fandraisan-tanana amim-pitiavana, fitsikiana amin-katsaram-panahy—ireo dia fihetsika kely, nefa famantarana fanampiny fa tena Kristianina isika. (Jaona 13:35) Hoy ny lehilahy iray, izay sambany vao tany amin’ny Efitrano Fanjakana: “Tao anatin’ny iray andro aho dia nifankahalala tamin’olona be fitiavana maro kokoa noho ny tany amin’ny fiangonana nitaizana ahy. Niharihary tamiko fa nahita ny fahamarinana aho.” Nanova ny fiainany izy, vokatr’izany, ary fito volana tatỳ aoriana dia natao batisa. Eny, tena misy vokany lalina ny fahalalam-pomba!
8 Raha mahalala fomba amin’ireo vahiny isika, moa ve isika tsy tokony ho vao mainka hanao izany “amin’ny mpianakavin’ny finoana”? (Gal. 6:10) Izao no ampiharintsika: “Mitsangàna raha eo anatrehan’ny fotsy volo hianao, ka manajà ny tavan’ny anti-panahy.” (Lev. 19:32) Tsy tokony hohadinointsika na oviana na oviana ny olona toy izany any amin’ny fivoriantsika.
9 Fifantohana tsara: Mandritra ireo fivoriana kristianina, dia mampita fanazavana ara-panahy mba hampaherezana antsika ireo mpampianatra kristianina ampiasain’Andriamanitra. (Rom. 1:11) Ho tena tsy fanehoana fahalalam-pomba avy amintsika velively ireto fihetsika manaraka ireto: matoritory, mitsamontsamona mitsako siligaoma, mibitsibitsika tsy an-kijanona amin’ilay mipetraka eo akaikintsika, mivezivezy tsy amin’ny antony any amin’ny toerana fivoahana, mamaky zavatra tsy mifandray amin’ilay fivoriana, na manao zavatra hafa mandritra ny fandaharana. Ireo anti-panahy no tokony hamela ohatra amin’izany. Haneho fanajana ny mpandahateny sy ny hafatra ara-baiboly omeny isika, raha mampiseho fahalalam-pomba kristianina ka manongilan-tsofina tsara.
10 Ankoatra izany, ho fanehoam-piheverana ny mpandahateny sy ny mpihaino, dia tokony hopihina ny telefaonina entin-tanana, mba tsy hanelingelina ny fivoriana.
11 Ny fahalalam-pomba sy ny ankizy: Tokony ho mailo hatrany ireo ray aman-dreny, raha ny amin’ny fitondran-tenan’ny zanany. Raha vao mitomany na mipelipelika mandritra ny fivoriana ny ankizy iray, ka manelingelina ny hafa, dia tsara raha entina mivoaka avy hatrany izy mba hampanginina. Mety ho sarotra izany indraindray, nefa tadidio fa izany dia mampiseho fa mihevitra ny fihetseham-pon’ny hafa ianao. Ireo manan-janaka kely angamba dia hifidy ny hipetraka any aoriana, mba ho vitsy kokoa ny olona ho voahelingelina, rehefa voatery hitsangana izy ireo. Azo antoka fa haneho fiheverana azy ireo koa ny mpanatrika hafa, ka hamela ny seza any aoriana ho azy ireo, raha ilaina izany.
12 Tsy maintsy mahafantatra tsara izay ataon’ny zanany, aloha sy aorian’ny fivoriana, koa ny ray aman-dreny. Tsy tokony hihazakazaka ao anatin’ilay trano ny ankizy, satria hitera-doza izany. Mampidi-doza koa ny fihazakazahana eny ivelan’ny Efitrano Fanjakana, indrindra rehefa tsy dia mahita tsara amin’ny hariva. Ny firesahana mafy any ivelany dia hanelingelina ny manodidina, ary hitondra vokany ratsy eo amin’ny fivavahantsika. Mendri-piderana ireo ray aman-dreny manara-maso tsara ny zanany ao amin’ny Efitrano Fanjakana sy eny ivelany, satria mahatonga ny fiarahantsika monina hahafinaritra kokoa izany.—Sal. 133:1.
13 Any amin’ny Fianarana Boky: Ankasitrahantsika ny fahaiza-mandray vahiny asehon’ireo rahalahy, izay manome ny tranony hanaovana fivoriana kristianina. Mila manaja sy mitandrina tsara ny fananan’ny tompon-trano àry isika. Tokony hamafa tongotra tsara isika alohan’ny hidirana, sao mandoto tranon’olona. Tokony hanara-maso ny zanany ny ray aman-dreny, ka tsy hamela azy ireo hihoatra ny efitra natao ho an’ny fianarana boky. Na dia vitsy aza ny olona, ary mifankazatra kokoa ny rehetra, dia tsy tokony ho sahisahy loatra isika, rehefa ao an-tranon’olon-kafa. Tokony harahin’ny rainy na ny reniny ny ankizikely rehefa mankany an-kabine. Afa-tsy izany koa, ny fianarana boky dia fivoriana kristianina, ka tokony hitafy toy ny ho any amin’ny Efitrano Fanjakana ihany isika.
14 Tena zava-dehibe ny fahalalam-pomba: Tsy vitan’ny hoe hiteraka vokatra tsara eo amin’ny fanompoantsika ny fanehoana fahalalam-pomba kristianina, fa manatsara ny fifandraisantsika amin’ny hafa koa. (2 Kor. 6:3, 4, 6) Koa satria mpivavaka amin’ilay Andriamanitra faly isika, dia tokony ho mora amintsika ny hitsiky, sy ny ho tsara fanahy, ary ny hanao ireo zavatra kely maneho fitiavana, izay mampifaly ny hafa. Hahafinaritra kokoa ny fiainantsika, vahoakan’Andriamanitra, noho ny fihetsika maneho fahalalam-pomba toy izany.