Ny Soa Raisintsika avy Amin’ny Sekolin’ny Fanompoana
1 Manana tombontsoa manokana handray anjara amin’ny Sekolin’ny Fanompoana ny vahoakan’i Jehovah. (Isaia 54:13; Jaona 6:45) Miankina be dia be amin’ny ezaka ataontsika anefa ny soa raisintsika avy amin’izy io. Inona no soa noraisinao avy tamin’ny Sekolin’ny Fanompoana ka nanatsara ny fifandraisanao amin’i Jehovah?
2 Teny fankasitrahana: Maro ny mpiandraikitra ny sekoly nahamarika, fa manatsara ny fanompoan’ny fiangonany ny fianarana amin’ny antsipiriany ny fahaiza-miteny. Nahita koa ny mpiandraikitra ny sekoly iray fa betsaka kokoa no manao tsy tapaka an’ilay fandaharam-pamakiana Baiboly isan-kerinandro, satria asaina mandray anjara amin’ny hevitra misongadina ny mpanatrika. Rahalahy maro koa no nilaza fa nandray soa tamin’ilay Anjara No. 2, satria mifantoka amin’ny fanomanana ilay zavatra hovakina, fa tsy mila manomana teny fampidirana sy famaranana. Lasa afaka mifantoka kokoa amin’ny fanatsarana ny vakiteniny izao ireo voatendry hanao io anjara io.—1 Tim. 4:13.
3 Mandray soa ny rehetra: Mahafaly antsika ny mamaly any am-pivoriana. (Ohab. 15:23) Tsy sarotra amintsika ny manomana ny famerenana am-bava sy mandray anjara amin’izany, satria efa omena mialoha ireo fanontaniana. Ankoatra izany, dia misy hevitra misongadina avy ao amin’ny Baiboly ao amin’ny Tilikambo Fiambenana, nanomboka tamin’ny 1 Janoary 2004. Mifanitsy amin’ireo toko asaina vakintsika amin’ny Sekolin’ny Fanompoana izany. Manampy olona maro hanome valin-teny mampahery mandritra ny hevitra misongadina ao amin’ny Baiboly, ireny lahatsoratra ao amin’ny Tilikambo ireny.
4 Manana tombontsoa manokana hanomana sy hanao ny anjarany ireo rehetra efa manao sekoly. Afaka mandray soa avy amin’ny teny fankasitrahana ataon’ny mpiandraikitra ny sekoly eny amin’ny lampihazo isika rehetra. Mandray soa fanampiny amin’ny torohevitra mety homeny mitokana aorian’ny fivoriana koa ny mpianatra tsirairay. Manampy antsika koa ny fanazaran-tena momba ny fahaiza-miteny isaky ny faran’ireo toko, ao amin’ilay boky Mandraisa Soa avy Amin’ny Sekolin’ny Fanompoana.
5 Mariho ao amin’ny boky Sekolin’ny Fanompoana anao manokana ireo hevitra ara-baiboly azo ampiharina, nisarihana ny sainao nandritra ny sekoly na taorian’izay. Saintsaino izay nianaranao, ary diniho ny fomba azonao ampiasana izany, mba hanatsarana ny fifandraisanao amin’i Jehovah.