Mahasoa mba Hampianarana ny Tenin’Andriamanitra
1. Inona no foto-kevitry ny fivoriamben’ny faritra amin’ny taom-panompoana 2014, ary inona no fanontaniana hovaliana?
1 I Jehovah, ilay “Mpampianatra Be Voninahitra”, no mpampianatra tsara indrindra. (Isaia 30:20, 21) Ahoana anefa no ampianarany antsika? Nomeny boky iray tsy manan-tsahala isika, dia ny Baiboly. Nahoana no mahasoa antsika eo amin’ny lafiny ara-batana, ara-tsaina, ara-pihetseham-po, ary ara-panahy ny fampianaran’Andriamanitra? Hovaliana mandritra ny fivoriamben’ny faritra amin’ny taom-panompoana 2014 izany. Ny foto-kevitra dia hoe “Mahasoa mba Hampianarana ny Tenin’Andriamanitra”, nalaina tao amin’ny 2 Timoty 3:16.
2. Inona avy ny fanontaniana hanasongadina an’ireo hevi-dehibe?
2 Jereo ireto hevi-dehibe ireto: Ny valin’ireto fanontaniana ireto no hanasongadina an’ireo hevi-dehibe amin’ny fandaharana:
• Inona no vokatry ny fampianaran’Andriamanitra eo amin’ny fiainantsika? (Isaia 48:17, 18)
• Inona no azontsika antoka, raha miezaka manao fanovana eo amin’ny fiainantsika isika mba hanompoana an’i Jehovah manontolo andro? (Mal. 3:10)
• Inona no tokony hataontsika raha sendra “fampianarana hafahafa” isika? (Heb. 13:9)
• Ahoana no hanahafantsika ny ‘fomba fampianatr’i Jesosy’? (Mat. 7:28, 29)
• Nahoana no tokony hampianatra ny tenany ireo mampianatra eo anivon’ny fiangonana? (Rom. 2:21)
• Mahasoa antsika amin’inona ny Tenin’Andriamanitra? (2 Tim. 3:16)
• Inona no vokany rehefa ‘nohozongozonina’ ireo firenena? (Hag. 2:6, 7)
• Inona no atokisan’i Jehovah fa ho vitantsika? (Efes. 5:1)
• Nahoana isika no tsy maintsy miezaka mafy mba tsy hiala amin’ny fampianaran’i Jehovah? (Lioka 13:24)
3. Nahoana isika no tokony hanatrika an’io fandaharana io ary hihaino tsara?
3 Niresaka momba ny fotoan-tsarotra hampiavaka ny andro farany i Paoly, ao amin’ny 2 Timoty toko 3, talohan’ny niresahany an’ireo teny nakana ny foto-kevitr’ity fivoriamben’ny faritra ity. Hoy izy: “Vao mainka hiharatsy kokoa ny ratsy fanahy sy ny mpisandoka, ka sady mamitaka izy ireo no voafitaka.” (2 Tim. 3:13) Tena tokony hihaino sy hampihatra ny fampianaran’Andriamanitra isika, raha tsy te ho voafitaka! Enga anie isika ka ho tapa-kevitra ny hanatrika an’io fandaharana tonga ara-potoana io, ary hihaino tsara.