Hatsarao ny Fanompoanao: Atoroy ny Olona ny Fomba Fianarana Baiboly

Nahoana izany no tena ilaina? Mety tsy ho azon’ny olona ny tiantsika holazaina rehefa miteny isika hoe mampianatra Baiboly maimaim-poana. Mieritreritra angamba izy hoe miara-mianatra amin’ny olona maromaro no dikan’izany, na mianatra amin’ny alalan’ny fifanoratana. Tsara àry raha atorontsika an’ilay olona mihitsy ny fomba fianarana. Na eo am-baravarana aza, dia azontsika aseho azy vetivety hoe mora sy ahafantaran-javatra ny mianatra Baiboly.

Ahoana no hanaovana azy?

Rehefa avy miarahaba an’ilay olona ianao, dia anontanio izy hoe manahy momba ny hoavy ve izy.
Lazao hoe be dia be ny olona manahy toy izany. Asehoy ireo loha hevitra ao amin’ny boky Ampianarina. Hazavao fa mora azo ny fanazavana ao amin’ilay boky, ary resahiny ao izay lazain’ny Baiboly momba ny hoavy sy ny foto-kevitra hafa. Asaivo mifidy an’izay toko mahaliana azy izy.
Omeo boky iray izy ary atoroy azy ny pejy misy an’ilay toko nofidiny. Resaho aminy hoe ho voavaly ao amin’ireo fehintsoratra ao amin’ilay toko ireo fanontaniana eo am-piandohana.
Asaivo vakiny ny fehintsoratra voalohany raha tsy mampaninona azy. Apetraho avy eo ny fanontaniana, ary iaraho mitady ny valiny. Jereo sy iaraho midinika izay andinin-teny mifandray amin’ilay valiny. Asehoy azy hoe ahoana no nanipihanao ny valiny ao amin’ny bokinao.
Ataovy indray ny fehintsoratra manaraka, saingy asaivo miezaka mamaly amin’ny fomba fiteniny izy.
Derao izy ary anontanio hoe rahoviana ianareo no afaka manohy an’ilay lesona.
Raha mety, dia asehoy azy ilay video ao amin’ny jw.org hoe Ahoana no Atao Rehefa Mianatra Baiboly?

Andramo izao amin’ity volana ity:

Mivavaha amin’i Jehovah mba hotahiny ny ezaka ataonao hahazo mpianatra vaovao.—Fil. 2:13.
Miezaha hampiasa ny boky Ampianarina rehefa manoro olona ny fomba fianarana Baiboly, na asehoy ilay video hoe Ahoana no Atao Rehefa Mianatra Baiboly?, fara fahakeliny, indray mandeha rehefa manompo.