Fanitsiana eo Amin’ny Ora Takina Amin’ny Mpisava Lalana
1 Mankasitraka ny fananana mpisava lalana maharitra sy mpanampy, miasa mafy ao amin’ny kôngregasiôna, isika rehetra. Nanome ohatra tsara dia tsara ireo mpisava lalana tamin’ny fanaovany amin-jotom-po ny fanompoana ilay Fanjakana, na dia rehefa voafetra sy voasa tanteraka tsy tapaka aza ny faritany. Nampirisika ireo mpitory rehetra izy ireo mba ho be hatao hatrany eo amin’ny fitadiavana ireo izay manana ‘fironana araka ny mety’. — Asa. 13:48, NW.
2 Nomarihin’ny Fikambanana fa mihamitombo ireo zava-manahirana atrehin’ny mpisava lalana, indrindra fa momba ny fahitana asa tapa-potoana izay hamela azy ireo hikarakara tsara ny zavatra ilainy manokana, mba hijanonana eo amin’ny fanompoana manontolo andro. Noho ny toe-karena ankehitriny any amin’ny tany maro, dia nihasarotra koa ny fidiran’ny hafa amin’ny asan’ny mpisava lalana, na dia izany aza ny faniriany amim-pahatsorana. Nodinihina tamim-pitandremana ireo anton-javatra ireo sy ny hafa koa, nandritra ireo volana faramparany.
3 Noho izany, rehefa heverina ireo voalaza etsy ambony dia nahenan’ny Fikambanana ny ora takina amin’ny mpisava lalana maharitra sy mpanampy. Manomboka amin’ny taona 1999, dia 70 ora isam-bolana no hotakina amin’ny mpisava lalana maharitra, na 840 ora ao anatin’ny taona, amin’ny fitambarany. Ary 50 ora no hotakina isam-bolana amin’ny mpisava lalana mpanampy. Tsy miova ny ora takina amin’ny mpisava lalana manokana sy ny misionera, satria misy fandaharana ataon’ny Fikambanana mba hanampiana azy ireo hikarakara ny zavatra ara-nofo fototra ilainy. Araka izany, dia afaka mifantoka amin’ny fomba feno kokoa amin’ny asa fitoriany sy fanaovany mpianatra, izy ireo.
4 Antenaina fa hanampy mpisava lalana maro kokoa hifikitra amin’io tombontsoam-panompoana sarobidy io, izany fanitsiana eo amin’ny ora takina izany. Tokony hanokatra ny lalana koa izany mba hanombohan’ny mpitory maro kokoa ny asan’ny mpisava lalana maharitra sy mpanampy. Tena tokony ho fitahiana ho an’ny tsirairay ao amin’ny kôngregasiôna mihitsy izany!