Ny Fahatapahan-kevitsika: Ny Hanaraka ny Fomba Fiaina Araka An’i Jehovah
1 Zavatra iray nisongadina tamin’ny Fivoriamben’ny Distrika “Fomba Fiaina Araka An’Andriamanitra”, ilay fanapahan-kevitra nolanina tao amin’ny lahateny famaranana. Nanomboka tamin’izao fanambarana izao izy io: “Isika dia (...) miaiky amin’ny fontsika manontolo fa ny lalana araka an’Andriamanitra no fomba fiaina tsara indrindra.” Tsarovy ny hevi-dehibe sasany tamin’io fanapahan-kevitra lany io izay nilazantsika hoe: “ENY!”
2 Fahatapahan-kevitsika ny hitoetra ho madio eo anatrehan’i Jehovah, tsy hisy pentina avy amin’izao tontolo izao. Hanohy hametraka ny sitrapon’Andriamanitra eo amin’ny toerana voalohany eo amin’ny fiainantsika isika. Hampiasa ny Teniny, ny Baiboly, ho mpitari-dalana antsika isika, ka tsy hivily ho amin’ny ankavanana na ho amin’ny ankavia, ka hanamafy amin’izany fa ambony lavitra noho ny lalana araka an’izao tontolo izao ny lalana araka an’Andriamanitra.
3 Tsy miraharaha ny fomba fiaina araka an’Andriamanitra izao tontolo izao amin’ny ankapobeny, hany ka mijinja ny vokany. (Jer. 10:23). Noho izany, isika dia tsy maintsy manaiky hatrany ny hampianarin’i Jehovah, ilay Mpampianatra antsika Lehibe, izay milaza toy izao: “Ity no làlana, ka andehano.” (Isaia 30:21). Ambony amin’ny lafiny rehetra ny fomba fiaina araka an’i Jehovah, voasoritra ao amin’ny Soratra Masina. Tena ilaina ny hanararaotantsika amin’ny fomba feno izay rehetra ampianarin’i Jehovah antsika, mba hanarahana izany fomba fiaina izany.
4 Fandaharam-pampianarana ambony avy amin’i Jehovah: Ampianarin’i Jehovah antsika ny tena zava-kendren’ny fiainana sy ny fomba tsara indrindra hampiasana ny fiainantsika. Ampianariny antsika ny fomba hanatsarana ny fiainantsika amin’ny lafiny ara-tsaina sy ara-pitondran-tena ary ara-panahy. Ampianariny antsika ny fomba hiaraha-miaina amim-pihavanana amin’ny rahalahintsika sy ny fianakaviantsika ary ny mpiara-belona amintsika. Manao izany amin’ny alalan’ny bokiny, ny Baiboly, sy amin’ny alalan’ny fandaminany izy.
5 Tena zava-dehibe amin’io lafiny io ireo fivorian’ny kôngregasiônantsika. Mandray fampiofanana feno isika amin’ny maha minisitry ny vaovao tsara antsika, ary mandray fampianarana voalanjalanja tsara eo amin’ny fomba fiaina kristianina, rehefa manatrika tsy tapaka ireo fivoriana dimy sy mandray anjara amin’izany. (2 Tim. 3:16, 17). Manome fampianarana teôkratika fanampiny amin’ny alalan’ireo fivoriambe ilay Mpampianatra Lehibe antsika. Tanjontsika ny tsy hanapatapaka fivoriana na fotoam-pivoriana na oviana na oviana, raha mbola mamela antsika hanatrika izany koa ny fahasalamantsika sy ny tarehin-javatra misy antsika.
6 Enga anie isika hanohy hanaraka amim-pahazotoana ny fomba fiaina araka an’Andriamanitra, amin’ny andro ho avy, mba ho fiderana an’i Jehovah sy mba hahasoa antsika mandrakizay! — Isaia 48:17.