Ny Fomba Hahazoana Fifaliana Be Kokoa avy Amin’ny Fivoriana
1 Zava-dehibe ho an’ny fahasalamantsika ara-panahy ny fivoriana. Ny fifaliana azontsika avy amin’izy ireny dia mifandray mivantana amin’izay ataontsika, aloha sy mandritra ary aorian’ny fivoriana. Ahoana no ahafahantsika manampy ny tenantsika sy ny hafa hihazona ny fifaliana ho feno amin’ny fanatrehana fivoriana?
2 Alohan’ny fivoriana: Misy fiantraikany mivantana eo amin’ny fifaliana raisintsika avy amin’ny fivoriana ny fanomanana. Rehefa miomana tsara isika, dia mirona kokoa hihaino tsara sy handray anjara. Fanampin’izany, ny anjara rehetra amin’ny fivoriana azontsika dia tokony ho voaomana tsara, ka ny zava-kendrentsika dia ny hampita araka ny marina ilay fanazavana mifanaraka amin’ny toromarika, sy ny hihazona ny fahalianan’ny mpanatrika. Tokony hanaovana famerenana tsara izany. Rehefa mandray anjara mba hanaovana ny fivoriana ho velombelona sy hampahery isika, dia manjary miharihary ny fandrosoan’ny tenantsika, ka mahita fifaliana lehibe kokoa isika. — 1 Tim. 4:15, 16.
3 Mandritra ny fivoriana: Ny fanomezana valin-teny any amin’ny fivoriana, dia afaka manampy antsika hankafy azy ireo kokoa. Ireo anjara izay mitaky fandraisan’ny mpanatrika anjara, dia tokony hoheverina ho fanendrena ny tsirairay ao amin’ny kôngregasiôna. Valin-teny voafintina tsara sy mivantana no mandaitra indrindra mazàna. Ny fitantarana fohy zavatra niainana mampahery dia tena afaka mandrisika sy manome tanjaka, ary tokony ho mailaka hampiditra azy ireny isika, isaky ny mety amin’ny fandaharana izany. (Ohab. 15:23; Asa. 15:3). Rehefa manao anjara iray ao amin’ny fivoriana isika, dia tokony hiteny amin-kafanam-po sy amim-piekena, ka hanao azy io ho mahaliana sy toy ny amin’ny tena izy ary azo ampiharina.
4 Aorian’ny fivoriana: Hahasoa antsika rehetra ny filazana amin’ny hafa, teny mampiseho hatsaram-panahy sy fiarahabana amim-pisakaizana ary hevitra fototra sasantsasany nodinihina tao amin’ny fivoriana. Ny fanehoana ny fifaliantsika mahita ny tanora sy ny antitra ary ny vaovao mandray anjara, dia mampitombo ny fitiavana eo amin’ny fianakavian’ny mpirahalahy. Tsy hanakiana ny sasany izay mety ho tsy nanatrika fivoriana isika, fa tokony hizara aminy kosa ny fifaliantsika noho ny fanatrehana fivoriana, ka amin’izany dia hampirisika azy ireo hanatrika. — Heb. 10:24, 25.
5 Aoka isika tsy hamoy an’io fandaharana tena ilaina io, mba hifampaherezana. (Rom. 1:11, 12). Amin’ny fanaovana ezaka mafy amim-pitandremana tsara, dia afaka mihazona fifaliana amin’ny fanatrehana ireo fivoriana kristianina isika rehetra.