Inona no Holazainao Amin’ireto Fanoherana Manaraka Ireto?
‘Tsy mahaliana ahy izany’
◼ ‘Mamelà ahy hanontany anao: Ny Baiboly ve no tsy mahaliana anao, sa ny fivavahana amin’ny ankapobeny? Manontany izany aho, satria izahay dia sendra olona maro izay nanaraka fivavahana iray taloha, kanefa tsy miangona intsony noho ny fihatsarambelatsihy hitany ao am-piangonany (na, tsapan’izy ireo fa fitadiavam-bola fotsiny ny fivavahana, na tsy ankasitrahany ny fitsabahan’ny fivavahana amin’ny politika; sns.). Tsy mankasitraka fanao toy izany mihitsy ny Baiboly, ary izy io dia manome ny hany fototra azo ekena, izay ahafahantsika mibanjina ny hoavy amim-patokisana.’
◼ ‘Moa ve izany noho ianao efa manana fivavahana? (...) Heverinao ve fa indray andro any dia hanaraka fanompoam-pivavahana iray ihany ny olona rehetra? (...) Inona no toa misakana izany? (...) Mba hananan’ny fivavahana tena heviny marina, karazana fanorenana inona no hilaina?’
◼ ‘Raha ny hividy zavatra no tsy mahaliana anao, dia mamelà ahy hanome toky anao, fa tsy manao asa ara-barotra aho. Tsy hahaliana anao ve anefa ny hoe ho afaka hiaina ao amin’ny tany iray, paradisa, tsy hisian’ny aretina sy ny heloka bevava ary hiarahana amin’ny olona izay tena tia anao?’
‘Tsy liana amin’ny Vavolombelon’i Jehovah aho’
◼ ‘Takatro ny fihevitrao, satria efa nihevitra toy izany koa aho taloha. Nanapa-kevitra ny hihaino ny iray tamin’izy ireo anefa aho. Ary hitako fa tsy marina izay nolazaina tamiko momba azy ireo. (Manonòna fiampangana diso fandre matetika, ary avy eo dia hazavao izay inoantsika.) [Valin-teny hampiasain’ny mpitory tena nino izany tokoa taloha.]
◼ ‘Raha mpivavaka ianao, dia takatro ny fihevitrao. Tsy isalasalana fa zava-dehibe aminao ny fivavahanao. Heveriko anefa fa samy hahaliana antsika ny amin’ny (...) (Milazà foto-dresaka iray.)’
◼ ‘Tsy isalasalana fa manana ny fivavahanao ianao. Azoko atao ve ny manontany hoe inona izany? (...) Tianay ny miresaka amin’ny olona ao amin’ny fivavahanao. Ahoana no fiheveranao ny amin’ny (...) (Lazao ny foto-dresakao mba hodinihina)?’
‘Nahoana ianareo no mitsidika matetika toy izao?’
◼ Satria mino izahay fa miaina amin’ny andro farany, resahin’ny Baiboly, isika. Heverinay fa zava-dehibe ny hieritreretantsika rehetra ny ho fiafaran’ny tarehin-javatra ankehitriny. (Miresaha fisehoan-javatra vao haingana iray na roa.) Ny fanontaniana àry dia hoe: Inona no ilaintsika hatao, raha tiantsika ny ho tafita velona amin’ny faran’ity fandehan-javatra ity?’
◼ ‘Mampiseho an’ity boky fianarana Baiboly ity amin’ny mpiara-belona aminay izahay. (Asehoy ilay izy.) Efa nahita azy ity ve ianao? (...) Raha manana minitra vitsivitsy monja ianao, dia tiako ny hampiseho aminao ny fomba ahafahana mampiasa azy ity miaraka amin’ny Baibolinao.’
[Loharanon-kevitra]
Sombin-dahatsoratra avy ao amin’ny rs-MG, pejy 15-20