Outubro

Nyuuva unawuurikani wiiwelela ikano ikwaha cikhwaawe? Mwene Davidi waanonrikela ikwaha cikhwaawe. Phimaana, uyo ahonlompa Nluku eeraka: “Ukipankihe wanrimani waka upheela uwiiwelela.” (Isaa. 51:12) Mwene Davidi anonfenta Yehova. Waahookhalaru commo, ikwaha cikhwaawe waanonrika wiiwelela ikano cawe. Ni iyo itthwiiyo inaaniirannyeela. Kontha isiyani? Yoopacera, kontha nikhanle atthu oopahuwa ni ninyarya niitthu inniiriha uhipheela wiiwelela ikano. Yonayeeli, kontha Sotwani khanhiyerera unisovenriha unrukunuwela Yehova. Khampa cinrukunuwenlyaawe. (2 Akor. 11:3) Ni yoneeraru, kontha ninkhala iriyari yaatthu ontuninyani ahintthuna uhimeriya, “moopuwelelo aneettiheriya naatthu oohiiwelela ikano.” (Efesu 2:2) Hiiva nihaana wiikurumica wiira naanane itthu inniiriha upheela uvara itampi ni unyema citthu Sotwani niila ituninyeela cinnisovenrihaaya wiira nikhale atthu oohiiwelela ikano. Nimpanka iyo namwiiwelelaka Yehova ni ale aavahacenryaawe unihoolela. w23.10 ipaag. 6 iparaag. 1

Mwiiriirya Yesu waapankilyaawe wootatusa maaci iviinyu, unniitthuciha isiyani? Unaaniitthuciha wiiyeviha. Yesu kheettitthimihile nlattu wo mwiiriirya waapankilyaawe. Khweeliini, uyo kheettitthimiha nlattu wo citthu caapankaawe. Uhiya commo, Yesu aari ntthu owiiyeviha ni khula ukati aattitthimiha Athumwaane. (Joau 5:19, 30; 8:28) Hiiva nantakihaka Yesu ni nakhalaka atthu owiiyeviha, khaninhala wiittitthimiha nlattu wo citthu cinkhitiriihu upanka. Hataa nipankaka isiyani ukati unonvareleehu nteko Yehova, phataari uhimananiha wiithoonyiihera wiira naaminiye, masi unttottopela Nlukwiihu nlattu wo citthu cinkhitiriihu upanka. (Jer. 9:23, 24) Uyo unamphwanela uttitthimihiya kontha khiivo yaahaleehu ukhitiri upanka unari wiira Yehova khannikavihera. (1 Akor. 1:26-31) Neeyevihaka, khaninhala upheela utotha uttottopeliya nlattu wo citthu comaana ninaapankeleehu akhwiihu. Unaahala unitosa paahi ucuwela wiira Yehova nawoona ni naavaha ifayita citthu cimpankeehu. (Nwehe ciicammo. (Mabere. 13:16) Khweeliini, hi ninantteeliha nrima Yehova natakihaka wiiyeviha wa Yesu. —1 Pet. 5:6. w23.04 ipaag. 4 iparaag. 9; ipaag. 5 iparaag. 11-12

Apostolu Paulu ahaakurumica makristau uhoolelihera citthu caakhwaaya, uhiya uhoolelihera citthu caya. Manannani hiiva cinlamuliyeehu weettela iyo ikannweeyo umikutthaanoni? Nawuupuwelaka akhwiihu. Nihaana nuupuwelaka wiira akhwiihu anaapheela ciicammo ukomentari khampa hiiva cimpheeleehu. Nyuuva mwawoopanaka mwaha asimpwaneenyu, niireke wiira nnaakhala ukati wotheene muulumaka? Mena. Nyuuva nnaapheela wiira ayova ciicammo yuulume itthu. Inanna imocaaru, hi nimpheela wiira umikutthaanoni mayamunneehu enci avahe ikomentaariyu. Khweeliini, itthu imoca yuulupale inhala unikavihera waakurumica mayamunneehu ukhanle waavaha ukati woothoonyera waamini waya yavahaka ikomentaariyu. (1 Akor. 10:24) Phimaana nhana uvaha ikomentaariyu cankaani. Napankaka commo, atthu akhwaawe ciicammo anaahala ukhalana ukati wookomentari Hataa ukhalaka wiira nyuuva nnopheela uvaha ikomentaariyu yankaani, nhimananihe woopela mwaha ipontu cinci wonkwaha mmoca. w23.04 ipaag. 22-23 iparaag. 11-13

Itthu yofayita inlamuliyeehu wuupuwela ukhanle uhihiyerera waakavihera akhwiihu, venci-venci naalalyeeraka.Wuulalyeerani, nihaana ukhala atthu oohilipalipa. Wuulalyeerani, hi ninawaaphwanya atthu oovirikana nhina makhalelwaaya, ileema caya ni anaamini citthu coovirikana. Apostolu Paulu ancuwela wiilemaleliha citthu cahaalemalenlyaawe, ni hiiva pooti wanontakiheehu. Yesu ahonthanla Paulu wiira akhale “apostolu aamalaponi”. (Aroo. 11:13) Paulu ahaalalyeera akereeku, ayuuta, atthu oosoma ni oohisoma, ahooleli ni mamwene. Wiira aavare nrima atthu otheene ayo, Paulu aheekhaliha “citthu cotheene iriyari yaatthu otheene.” (1 Akor. 9:19-22) Uyo ananweha ntthuuyo, antotha woona nipuro naakhumaawe ni itthu yaaminnyaawe. Nlattu woopanka commo, Paulu ankhitiri waavara nrima atthu otheene. Hi ciicammo pooti wampankeehu iyo itthwiiyo wiira nikhitiri waavara nrima atthu, nawehaceraka makhalelwaaya ni wiilemaleliha ayo makhalelwaayo. w23.07 ipaag. 23 iparaag. 11-12

Ukhala ntthu oomaala, khunakhala ukhala ntthu oololovaca. Iyo ikhanle ikhalelo yaatthu oolipa. Nihaana ukhala atthu oolipa nrima wiira nihihiyerere ukhala atthu oomaala naananaka masakha muukumini wihu. Umaala ikhanle itthu ikumihiye nhina “mihokorokho coominepani” (Akalas. 5:22, 23) Nuulumo nikereku “umaala” naavareliya nteko wiira yuulumiye ikhavalu yontakhwani yaawaaniya waaliteeya. Iyo yawaaniyaka waaliteeya yammaala. Masi khayaahiya ukhala yoolipa. Vano hiiva? Manannani ninlamuliyeehu ukhala atthu oomaala ni ukati yooyo ukhala atthu oolipa? Kaninlamuliya upanka iyo itthwiiyo veekha. Nihaana ulompa nilepelaka nnepa wowaarya wa Nluku ni ukaviheriya wiira nikhalane iyo ikhalelo yomaaneeyo. Ni ahaavo matakihero menci anoonihera wiira unaakhitirya wiitthuca ukhala ntthu oomaala, Mayamunna ni mayanuunu enci khaahiyerenre ukhala atthu oomaala, hataa atthu akiina yaapacapacaka ni yahaahiyera ntakihero nomaana atthu yaawoona.—2 Tim. 2: 24, 25 w23.09 ipaag. 15 iparaag. 3

Joau ahokhalana iwooni yootikhiniha, ukati waawonnyaawe wiirimu mahumu 24 yanswalelaka Yehova. Ayo yaanonttottopela yiiraka wiira uyo waanomphwanela “uttitthimihiya, uhisimiya ni ukhalana ikuru.” (Apoka. 4:10, 11) Malayikha ookhuluvelya ciicammo ahaana isariya yoopheela unttottopela ni unhisima Yehova, ayo ari wiirimu nkhayi nuuyo ni anancuwela saana. Ayo malayikhaayo anaacuwela ikhalelo ca Yehova nlattu wo citthu cotheene cimpankaawe ni yaweheehaka citthu cumpilyaawe cotheene, ayo anaapheela unttottopela. (Jó 38:4-7) Hiiva ciicammo, nimpheela unttottopela Yehova ukati ulompeehu, ninhimeryaka nlattu hiiva ninontikhinaceehu ni ninonhisimeehu. Ukati unsomeenyu Ibiiblya, mmananihe ucuwelela makhaleloni a Yehova nyuuva anoocivelani venci. (Jó 37:23; Aroo. 11:33) Vano munhimerye Yehova nlattuni nyuuva anoocivelaayani ayo makhalelwaayo. Mananna makiina onttottopela Yehova, ukhanle unsukhurweela cinene nlattu wo citthu cotheene nonipankelaawe ni cinaapankelaawe mayamunneehu. Yehova naaniwacera ni naanikhikicera. —1 Sam. 2:1, 2. w23.05 ipaag. 3-4 iparaag. 6-7

Mwaakha wo 1919, Ibabilooniya Yuulupale yahohiya waahoolela apoovu a Yehova. Uyo phi mwaakha upacenryaaya uvara nteko “ipottha yookhuluvelya ni yankhili,” yaakavihenre atthu upacera weettela “Iphiro Yowaarya.” (Mat. 24:45-47 Isai. 35:8) Nlattu wo nteko wotheene uvariye wiira itthenkaciye “Iphiro Yowaarya,” ale anvira uyo nttalooyo ahoncerera uncuwela waya Yehova ni citthu cimpheelaawe. (Miru. 4:18) Ni ayo ahopanka marukunuso wiira yeettele ikano ca Yehova. Masi Yehova khawiirenle apoovwaawe wiira apanke marukunuso otheene wonkwaha mmoca. Uhiya commo, uyo haakavihera apoovwaawe vakaani-vakaani. Ni wahoolo unaahala utepa ureera ukati ninhaleehu upanka citthu cotheene cinontteeliha nrima Nlukwiihu, YehovaIparapaara cotheene cihaana ulokihaciya wiira cikhaleke saana. Ikhumelo mwaakha wo 1919, “Iphiro Yowaarya” ciicammo ineera ilokihaciyaka, ni nlattu wo iyo itthwiiyo, atthu enci ahokhitiri ukhuma Ibabilooniya Yuulupale. w23.05 ipaag. 17 iparaag. 15; ipaag. 19 iparaag. 16.

Ayo ciicammo khanhiya waatthenkaca anamakavihera o miteko cinci co ­Mphwinko wo Mahumu Unhoolela. Ayo anamakaviheraayo ahaana mirintti cuulupale nenna co ni ari owiitthenkaceene wiira ahihiyerere nteko woowacera ikhontwaa ca Kristu. Ukati makristau oothanliya ahanle va watuninyani va unhalaaya umala urwaa wiirimu, uhalaka vakaani umala ukati wo masakha moolupale, aswali a Yehova khanhala uhiya unswalela Yehova. Nlattu woohooleliya ni Yesu Kristu, hi khaninhala uhiya unswalela Yehova. Hi ninaacuwela wiira uyo ukatyuuyo, ninaahala utupheliya niikhurupu yaatthu olapo cotheene ineehaniya Gogue o Magogue. (Ezek. 38:18-20) Masi nwo utupheliyanwo unhala ukhala ukati vakaani paasi. Ayo atthwaayo khanhala utthema ni khanhala unihiiha nswalela Yehova. Khweeliini, Yehova naarwa unoopola. Nhina iwooni aposto­lu Joau yaakhalannyaawe, uyo ahoona “mphwinko muulupale” waatthu ari ikhurupu yokhontwaa ca Yesu. Ni Joau ahoona wiira uyo mphwinkooyo waari waatthu yoopweele ukati wo masakha moolupale. (Apoka. 7:9, 14) Khweeliini, iyo inthoonyera wiira Yehova naarwa unoopola! w24.02 ipaag. 5-6 iparaag. 13-14

Masi isiyani inlamuliyeehu upanka wiira naakhele nnepa wowaarya? Hiiva nihaana ulompa nilepelaka nnepa wowaarya, usoma Nuulumo na Nluku ni upanka mphantte mumphwinkoni woothotokanihiya wa Yehova. Upanka nnyo citthunnyo, unaahala unikavihera utotha ukhalana “nhokorokho wo nnepa. (Akalas. 5:22, 23) Yehova naavaha nnepaawe wowaarya ale arina moopuwelelo ni meettelo omaana. Uyo khanhala univaha nnepaawe wowaarya nakhalaka nuupuwelaka citthu coohinamaana awula napankaka itthu ihinoncivela. (1 Atesal. 4:7, 8) Uhiya commo, wiira nihihiye waakhela nnepa wowaarya khaninlamuliya “uvyaavyeehaca inatiri” ca Nluku. (1 Atesal. 5:20) Nnyo inatirinnyo cinhela nhina ihapari Nluku nivahilyaawe avarelaka nteko nnepaawe wowaarya cinooluma nihuku na Yehova ni uhiitthaala wihu ala mahukweehwaala. Hi khaninoopuwela wiira Harmacetom naahala upica venci. hi ninaaweherera wiirannya woohipica. Ninoonihera iyo itthwiiyo nihihiyereraka ukhalana meettelo omaana ni ukhala nivaraka miteko cinoonihera wiira ninonswalela Nluku mmoca eekhweeli —2 Pet. 3:11, 12. w23.06 ipaag. 12 iparaag. 13-14

Isiyani nkristau inlamuliyaawe upanka yakhumelaka ilatarato yopornografia ntelefoneni awula nkomputatoreni wawe? Nihaana nihiyaka uweha woohipicapica. Ni khunhala unirikela upanka iyo itthwiiyo noonaka wiira itthu yofayita muukumini wihu ukhanle upatthaniihu ni Yehova. Ilatarato cikiina pooti uwoonihera atthu oowara ikuwo, masi uhookhalaru commo, nnyo pooti uniiriha wuupuwela urupihana woohiloka. Kontha isiyani hiiva ninlamuliyeehu uhoona nnyo ilataratonnyo? Kontha, khanimpheela uhiyera ikhato hataa itthu yankaani yaahala uniiriha wuupuwela awula upanka citthu coohiloka. (Mat. 5:28, 29) Ahumu amoca u Tailândia, aheera: “Mi kinaweemela ni wuupuwela: ‘Hataa nnya ilataratonnya ciwooniheraka atthu oowara ikuwo, kiireke wiira Yehova unaahala uncivela kaweheehaka?’ Wuupuwela commo unaakikavihera ulakela upanka citthu comaana.”Woova wihu upanka itthu yaahala unriipiha nrima Yehova, unaahala unikavihera ulakela upanka citthu comaana. Umoova Yehova “unkhala ucuwelaca. w23.06 ipaag. 23 iparaag. 12-13

“Ikwaartu” ciromoliye atthunaka anaaciya maloko eekristau. Ukati wo masakha moolupale hi ninhala ukhikiceriya ni Yehova wakhalaka wiira niri nkhayi ni mayamunneehu. Phimaana nihaana niikurumicaka nenna co kahi paahi waavilela mayamunneehu ni mayanuunwiihu, masi ciicammo waafenta. Pooti ukhalaka wiira ninhala woopwa napankaka iyo itthwiiyo!Nihuku nuulupale na Yehova” unhala ukhala ukati wowaarikela atthu otheene. (Sof. 1:14, 15) Ni apoovu a Yehova ciicammo anaahala uhuva. Masi neetthenkacaka nenna co khaninhala utepa usanka ni ninaahala waakavihera akhwiihu. Hi ninaahala ukhitiri uvilela khula nrikariko ninhala unikhumelela. Mayamunneehu yaaphwanyaka masakha ninaahala wiikurumica waakavihera ni waavaha yotheene inhalaaya upheela, nooniheraka uthunku. Ciicammo, khaninhala uhiya ukhala wamoca nimayamunneehu ni mayanuunwiihu nawooniheraka nifento. Yehova naahala unicaaliha nuukumi woohimala upeephoni unhalaaya uhikhumelela-tho ihasara ni masakha. —Isai. 65:17. w23.07 ipaag. 7 iparaag. 16-17

IBiibiliya ikwaha cinci inawuuluma atthu ookhuluvelya okhalayi khampa oolipa ni okuru. Masi hataa ale yaari oolipa, ikwaha cikhwaawe khayeecoona commo. Wootakihera, ikwaha imoca mwene Davidi aheecoona “ukhala oolipa khampa mwaako”, masi ikwaha cikhwaawe uyo “ansankaka.” (Isaa. 30:7) Vano Sansau aari nakuru cinene nlattu wo nnepa wowaarya wa Yehova, uhookhalaru commo, uyo ancuwela wiira woohikaviheriya ni Yehova, “khaahala ukhalana ikuru, anhala ulolovaca ni anhala waalikanana atthu akiina”. (Masuw. 14:5, 6; 16:17) Ayo alopwanaayo yaalipa kontha Yehova phaavaha ikuru.Apostolu Paulu ciicammo ancuwela wiira ahaana akhalanaka ikuru ca Yehova. (2 Akorintu 12:9, 10) Uyo anwerennya. (Akalas. 4:13, 14) Ni ikwaha cinci uyo ahaana wiikurumica wiira apanke citthu comaana. (Aroo. 7:18, 19) Ikwaha cikiina uyo anawoova citthu caahala umwiirannyeela. (2 Akor. 1:8, 9) Uhookhalaru commo, Paulu waakhalaawe oololovaca, uyo pheecoonaawe ukhala oolipa. Eecoona commo kontha Yehova ahonvaha ikuru caapheelaawe wiira aanane marikarikwaawe. w23.10 ipaag. 12 iparaag. 1-2

Wakhalaka wiira uhaavo ukati nyuuva unancereenyu wuupuwela wiira khanrina ifayita, nhiliyale wiira Yehova mwaaneennyaawe, phuuthanlileni wiira munswalele. (Joau 6:44) Yehova nawoona citthu comaana cirinaawe khula ntthu. Uyo naacuwela sana-saana nrimeehu. Ni mananna cinniweheraawe anaavirikana nimananna cineewehereehu asineeneehu. (2 Ikor. 6:30) Phimaana, mwaamini ni nkupali wiira Yehova khanootha, eeraka wiira naawoonani ukhalana ifayita venci. (1 Jo. 3:19, 20) Nihinaaya wiitthuca ikhweeli co mbiibiliyani, atthunaka cihaavo citthu caapankileehu cinniiriha wuupuwela wiira khaninakhala atthu omaana. (1 Pet. 4:3) Ni pooti ukhalaka wiira atthu akhwaawe yancenre unswalela Yehova khalayi, cihaavo citthu cootakhala nanlelo cinaarika uhiya upanka. Vano nyuuva? Niireke wiira uhaavo ukati unoopuwelakeenyu wiira Yehova khoolevelenleni? Wakhala commo, unaahala ureera wuupuwela wiira hataa aswali ookhuluvelya a Yehova yahoopuwela commo. Wootakihera, apostolu Paulu oopuwelaka citthu caavonyihaawe, aakhala nimasukhuli menci. (Aroo. 7:24) Ninaacuwela wiira apostolu Paulu ahottharuwa itampi cawe ni ahopattisiya. Waanookhalaru commo, uyo eera wiira ‘phaatepile uhikhalana ifayita iriyari yo maapostolu otheene’ ni phaari ‘namatampi oopacera.’ —1 Akor. 15:9; 1 Tim. 1:15. w24.03 ipaag. 27 iparaag. 5-6

Citthu coohiloka caalakenlyaawe upanka Yehoyasi, ninawiitthucera wiira hiiva nihaana waathanla apatthani omaana annikurumica upanka citthu comaana. Nihaana nikhalanaka apatthani anonfenta Yehova ni ampheela untteeliha nrima. Ni asipatthaniihu pooti ukhala oolupale unipwaha myaakha cihu hiiva awula pooti ukhala amirawo cinene. Uhiliyale wiira Yehoyasi aari mmirawo cinene nanlikanihaka ni Yehoyata. Uwuupuwelaka asipatthannya, wiikohe co: ‘Ayo anaakikavihera ulipihaca umwaamini waka Yehova? Ayo anaakikurumica miiva weettela ikettelo ca Yehova Nluku? Ayo anawuuluma myaha ca Yehova ni ikhweeli co mbiiblyani? Ayo anaahisima ikettelo ca Yehova? Ayo anooluma citthu wiira paahi akicivelihe awula ahaana ulipa nrima wiira akivahe ikano kapheelaka?’ (Miru. 27:5, 6, 17) Ikhweeli phi ila: Wakhala wiira asipatthannya khaanonfenta Yehova, ayo khaanakhala apatthani anhala wuukavihera. Masi wakhala wiira asipatthannya ananfenta Yehova, waavaresese ayo apatthannyaayo​—yaayo phiri apatthani anhala wuukavihera! —Miru. 13:20. w23.09 ipaag. 9-10 iparaag. 6-7

Nuulumo “Alfa” ikhanle ileetra yoopacera nhina abecedário oluuka ikereeku; ni nuulumo “Oomeka” ikhanle ileetra yoomalela. Yehova wiira wawe “mi kikhanle Alfa ni Oomeka,” apheela woonihera wiira apaceraka upanka itthu, uyo khanhiyerera iyo itthwiiyo mpaka wammaliheraawe ni mpaka ikhumeke saana.Uwakati Yehova waamumpilyaawe Atamu ni Hawa, uyo ahaavaha iparakha ni aheerela: ‘Mwaayare asaana ni mwincive; ncare ni nwacere ituninya. (Upha. 1:28) Uwakati Yehova waahimenryaawe itthu yaapheelaawe, unkhala toko uyo oolumile nuulumo “Alfa.” Itthu Yehova yaapheelaawe inaahala uwiirannyeela asiculawe Atamu ni Hawa ammwiiwelela Nluku. Iyo itthwiiyo inhala wiirannya ukati unhalaaya ukhala oohipahuwa, uyaranaca, winciva ni ukhaliha ituninya ipeephoni. Wiirannya iyo itthwiiyo unhala ukhala toko Yehova enre “Oomeka.” Yehova umaliha wawe wumpa irimu, ituninya ni citthu cotheene, uyo honikhuluveliha itthu. Hi ninaaphwanya iyo itthwiiyoIyo inthoonyera wiira Yehova naarwaa wiirannyeeha itthu yaapheelelaawe apinaatamu wiimaleloni nno nihuku nonasaapanno. —Upha. 2:1-3. w23.11 ipaag. 5 iparaag. 13-14

Ukhuma u Babilooniya ni urwaa mpaka u Isarayeli yaari itthu yoorika ni waahala ukhala nkwaha wo myeeri 4. Masi Yehova ahokhuluveliha wiira anhala umalamaliha citthu cotheene caahala waahiiha apoovwaawe uturuwela ilapwaaya. Ayuuta ookhuluvelya yoona ukhala iparakha yuulupale uturuwela ilapo yo Isarayeli ni yahotthuna uleva citthu cikhwaawe cotheene wiira ahihaleele iyo iparakheeyo. Ayo yuupuwenle wiira itthuvo yuulupale yaahalaaya waakhela waari unswalela Yehova. U Babiloniya khayaarivo hataa itempulu imoca waaswaleliyaawe Yehova, ni khayaarivo hataa ikhilompi yaahala uvareliya nteko wiira civahereriye itthuvo khampa caarumaaya malamulo Nluku yanvahilyaawe Moceesi. Ciicammo, u Babilooniya khayaarivo ikhurupu yoothotokanihiya yaanankuttho wiira avaherere itthuvo. Uhiya commo, apoovu a Yehova yaarukureeriye naatthu yahaahisima malamulo a Yehova. Phimaana, ayuuta ookhuluvelya yoona upica uphiya ukati wooturuwela uwannyaya, wiira yaturuwele uswali waya weekhweeli. w23.05 ipaag. 14-15 iparaag. 3-4

Napheelaka uhihiyerera weetta ‘khampa asaana o nthuko,’ ciicammo nihaana nikaviheriyaka ninnepa wowaarya wa Nluku. Kontha isiyani? Kontha unaarika unyema upanka citthu cootakhala nhina ila ituninya inkhaleehwiila. (1 Atesal. 4:3-5, 7, 8) Nnepa wowaarya unaahala unikavihera unyema moopuwelelo oohiloka o ntuninyani ni citthu cowoothiya cinvirikaniha ikano ca Yehova. Nnepa wowaarya unaahala ciicammo unikavihera upanka “citthu cotheene cikhanle comaana, cosariya ni ceekhweeli. (Efesu 5:9) Inanna ikhwaawe yo waakhela nnepa wowaarya ukhanle ulompa. Yesu aheera wiira Yehova naahala ‘waavaha nnepa wowaarya ale anonlepela.’ (Luka 11:13) Nanttottopelaka Yehova umikutthaanoni, hiiva ciicammo ninawaakhela nnepa wowaarya. (Efesu 5:19, 20) Nnepa wowaarya phinhala univaha ikuru wiira nikhitiri ukhalana meettelo anoncivela Yehova. w24.03 ipaag. 23-24 iparaag. 13-15

Nlompe nlepelaka ukhalana uvilela venci. Uvilela ikhanle ikhalelo yo nhokorokho wo munnepani. (Akalas. 5:22, 23) Phimaana, ninlamuliya unlompa Yehova nanlepelaka nnepaawe wowaarya ni wiira anikavihere ukhitiri ukhalana makhalelo o nhokorokho wo nnepa. Yanikhumelelaka itthu inhala unirikihela woonihera uvilela, hi khaninhala uhiya ulepela nnepa wowaarya wa Yehova wiira unikavihere woonihera uvilela. (Luka 11:13) Uhiya commo, hi pooti wanonlepeleehu Yehova wiira anikavihere woona myahannyo khampa uyova cinoonaawe. Uhiya ulompa, ciicammo nihaana niikurumicaka upanka inkhitiriihu wiira nikhale atthu oovilela mahuku otheene. Ukati wotheene unhaleehu ulompa nalepelaka ukhalana uvilela ni neekurumicaka, uvilela wihu unaahala ulipa ni ninaahala ukhitiri ukhala atthu oovilela. Muupuwele matakihero o mbiiblyani. Ibiiblya inaawuuluma atthu enci yoonihenre uvilela. Hiiva noopuwelaka ayo matakiherwaayo, pooti wiitthuca mananna owoonihera uvilela. w23.08 ipaag. 22 iparaag. 10-11

Yesu ahonkhuluveliha Peturu wiira anhala uwaceriya ni Yehova. Wunwelelihiya wawe, Yesu ahonkavihera Peturu ni maapostolu akiina wiira avare ihopa cinci. (Joau 21:4-6) Iyo itthwiiyo yahonkavihera Peturu ucuwela wiira Yehova khawaahala unrikela unkavihera anvahaka itthu nopheelaawe. Atthunaka Peturu ahoopuwela moolumo a Yesu ukati wenryaawe Yehova nawaawace atthu otheene “anhoolelihera muukumini waya Umwene wa Nluku.” (Mat. 6:33) Citthu cotheene nnyo cahonkavihera Peturu weesa nipuro noopacera muukuni wawe nteko woolalyeera, woohikhala nakoswaawe ohopa. Uyo aholipa nrima ni aholalyeera ihapari comaana nihuku no Pentekositi 33 nawile Kristu ni ahaakavihera atthu imiliyau cene waamini ihapari comaana. (Mite. 2:14, 37-41) Ni wahoolo uyo ahaakavihera asamaritano ni atthu atthu yahaari ayuuta ukhala atthari a Kristu. (Mite. 8:​14-​17; 10:44-48) Khweeliini, Yehova ahonvarela nteko Peturu nimananna ootikhiniha wiira aawaane atthu oovirikana wanlokoni. w23.09 ipaag. 20 iparaag 1; ipaag. 23 iparaag. 11

Myaakha miili ababilooniya anakwanyulacile isittatti yo Yerusalemu. Mwene Nabukodonosor, o Babilooniya, aholoha itthu yowoopiha. Muulohani wawe, uyo ahomoona ttontto muulupale. Uyo aholakela uwiivakaca acuwelaci otheene hataa ni Daniele, wakhalaka wiira khayaahala ukhitiri uhimyaca itthu yaalohilyaawe ni utaphulela maanaaya isiyani. (Dan. 2:3-5) Daniele ahaana apankaka itthu wowaakuvya, kontha atthu enci yanhala wiiviya. Uyo ahorwaa “uwuulumana amwene ni ahaalepela unvaha ukati wiira ahimyace itthu yaalohilyaaya ni wiira ataphulele maanaaya isiyani.” (Dan. 2:16) Ule ukatyuule, uyo ahaana alipaka nrima ni waamini. Ibiibiliya khinhimya wiira uyo ahopaca utaphulela citthu coolohiya. Vano, Daniele ahaalepela asipatthannyaawe wiira “anlompe Nluku owiirimu wiira uyo awoonihere uthunku ni aakavihere ucuwelela iyo isiiriiyo.” (Dan. 2:18) Yehova ahaakhula ayo mavekelwaayo. Akaviheriyaka ni Nluku, Daniele ahokhitiri utaphulela itthu yaalohilyaawe mwene Nabukodonosor. Ukumi wa Daniele, waasipatthannyaawe ni waacuwelaci akiinaayo waahokhikiceriya. w23.08 ipaag. 3 iparaag. 4

Muupuwele ifayitaaya uvilela. Ntthu oovilela khanle ntthu ootteeliya nrima ni oomaala. Ciicammo, uvilela pooti unipanka saana mwiirutthuni wihu ni mmoopuweleloni wihu. Nakhalaka atthu oovilela, ninaakhalana apatthani omaana ni ninaawiiwanana atthu akiina. Uhiya commo, nloko nihu ninaakhala nowiiwananiya. Ntthu aninyoonyihaka, hiiva ninaanyema unkumihaca nanrokottole. (Isaa. 37:8, Miru. 14:29) Ni itthu itepile ukhala yofayita cinene nakhalaka atthu oovilela, ninawaatakiha Apaapeehu o wiirimu ni ninaalipihaca upatthaniihu naayo. Woohaakanyaca, uvilela ikhanle ikhalelo yootepa ureera ni inniwaanela iparakha otheene cihu. Khweeliini, cihaavo ikwaha unrikaaya uvilela. Masi nikaviheriyaka ni Yehvoa, hiiva pooti ukhitiri ukhala atthu oovilela. Ni ukati unweherereehu uwa ipeephoni, nikupali wiira “miitho a Yehova anawaakhalenla ale ammoova, anweherera nifento nawe nookhuluvelya.” (Isaa. 33:18) Phimaana, ukhuma nenna co mpaka uhoolo unkeleehu, nilakele uhihiyerera uvilela. w23.08 ipaag. 22 iparaag. 7; ipaag. 25 iparaag. 16-17

Tiyaku ahohimya wiira uyo nlopwanooyo eehimya ukhalana waamini, masi citthu caapankaawe caanoonihera wiira khaarina waamini. (Tiya. 2:1-5, 9) Ntakihero nonayeeli: Tiyaku ahomuuluma munna awula anuunu amoca yahaarina itthu yoowara ni yoolya. Masi atthwaayo khayaapanka itthu wiira yaakavihere. Hataa ayo atthwaayo yiiraka wiira ahaana waamini, citthu caapankaaya caanoonihera wiira kharina waamini. (Tiya. 2:14-16) Tiyaku ahonhimya Raabi ukhala ntakihero na ntthu aarina waamini ni oonihenre waamini wawe nicitthu caapankaawe. (Tiya. 2:25, 26) Raabi aheewa oolumiyaka Yehova ni ancuwela wiira uyo aanaakhikicera asarayeli. (Jos. 2:9-​11) Phimaana, Raabi ahoonihera waamini wawe nicitthu caapankilyaawe. Uyo ahaakhikicera anamahottela eeli o Isarayeli yaapheela wiiviya. Uyo khaari nthiyana nsarayeeli ni ahaana matampi, masi ahooniya ukhala nasariya, khampa Aparahaamu cooniyaawe ukhala nasariya. Ntakihero na Raabi ninaaniitthuciha wiira waamini wihu uhaana woonannyaaka nhina citthu cimpankeehu. w23.12 ipaag. 5-6 iparaag. 12-13

Khampa makristau, hiiva nimpheela wiiweeha mbiiblyani kahi paahi myaha cankaani. Masi, nikaviheriyaka ninnepa wowaarya wa Yehova, hi ninaapheela wiitthuca “citthu cuulupale ca Nluku.” (1 Akor. 2:9, 10) Nnoonela cani nyuuva upacera usoma Ibiiblya veekha wiira ntepe umpatthanana Yehova? Wootakihera, nyuuva pooti utotha ucuweleeha mananna Yehova caawoonihenryaawe nifento aswalyaawe okhalayi ni manannani cinoofentaaweni. Nyuuva ciicammo pooti utotha ucuwela mananna asarayeli yanswalelaaya Yehova khalayi ni manannani nopheelaawe wiira ninswalele ilelo. Awula nyuuva pooti usoma saana inatiri Yesu ciiraneehilyaawe ukati waaryaawe va watuninyani va. Nyuuva pooti uvarela nteko Índice das Publicações da Torre de Vigia awula Guia de Pesquisa para Testemunhas de Jeová wiira ntothe myaha nnopheeleenyu usoma. Nyuuva nnaahala woona wiira nnyo ikarumannyo cinaacivihaca usoma winyu. Usoma cinene myaha co mbiiblyani pooti wuukaviherani ulipihaca waamini winyu ni ‘uphwanya ucuwelaca unkhuma wa Yehova Nluku.’ —Miru. 2:4, 5. w23.10 ipaag. 18-19 iparaag. 3-5

Nttwee nuulume itthu ikhwaawe Peturu yaahimyalyaawe. Wuupaceroni iveerusu 8, unaahimiya mananna cinlamuliyaaya ukhala nifento nihu. Wiiriye nihaana nikhalaka “nifento nuulupale.” Nuulumo “nuulupale” Peturu nantikhilyaawe ninaaca itthu yowaatapuwa. Ni mphantte wonayeeli wo iyo iveeruswiiyo unaahimya isiyani inhaleehu upanka wakhalaka wiira nihaana nifento nuulupale. Wiiriye wiira nno nifentonno ninaahala ukhuneela awula uhiwacera citthu cinvonyihaaya mayamunneehu. Unkhala toko nifento niri khampa ikuwo yowaatapuwa. Ni hi ninaacisa iyo ikuweeyo phanceraka utaphula cinene mpaka wankhuneelaaya kahi itampi imoca awula piili, masi “itampi cinci.” Ala manannaala, ukhuneela maanaaya wiira ulevelela. Khampa ikuwo cinkhuneelaaya itthu yoonanaraca awula yoohilokaloka, nifento nihu pooti ukhuneela citthu cinvonyaaya mayamuneehu ni matampyaaya. Nifento nihu nihaana nikhalaka noolipa wankhitiriihu ulevelela uvonya wo mayamunna. Hataa ukhalaka wiira ukati nkiina unaanirika upanka iyo itthwiiyo. (Akol. 3:13) Ukati unaaleveleleehu akhunanihu, ninawoonihera wiira nifento nihu nikhanle noolipiha ni ninantteeliha nrima Yehova. w23.11 ipaag. 11-12 iparaag. 13-15

Ukati mwene Yosiya waarinaawe myaakha 26, uyo ahopacera ulokihaca itempulu. Yooyo ukatyuuyo, phaaphwanyiyaaya ilivuru yo malamulo a Yehova yaavahiyaawe Moceesi. Ukati weewilyaawe isomiyaka, uyo ahopanka marukunuso wowaakuvya wiira eettele itthu yantikhiye nhina iyo ilivurwiiyo. (2 Ikor. 34:14, 19-21) Weeva uholakela wiikurumica usoma Ibiibiliya khula nihuku? Wakhala wiira uholakela upanka commo, unnokhitiri usoma khula nihuku? Unnantikhaka nipuro iveerusu cinsomaa cinoonaa wiira cinaahala wuukavihera? Ukati Yosiya waarinaawe myaakha 39, uyo aholakela upanka itthu yoohiloka yaamwiirihile ukhwa. Uhiya waavya ikano ca Yehova, uyo ahowiikhuluvela. (2 Ikor. 35:20-25) Ni iyo ikhanle itthu yuulupale nineetthucereehu. Hataa nikhalaka oolupale awula amirawo, ni hataa ukhalaka wiira nancenre unswalela Yehova khalayi awula naanaano, hi nihaana uhihiyerera umpatthanana Yehova. Phimaana, nihaana ninlompaka Yehova, ninlepelaka ikano, usoma Ibiibiliya ni wiiwelela ikano co makristau ookhomaala. Naayo manannaayo, ninaahala uvukula citthu cinci caahala uniiriha uvara matampi. Masi ninaahala utepa ukhalana citthu cinhala unitteeliha nrima. —Tiya. 1:25. w23.09 ipaag. 12 iparaag. 15-16

Mbiibiliyani, anawuulumiya athiyana enci yanfenta ni yanswalela Yehova. Ayo athiyanaayo yaari ‘oocuwela wiiphimela citthu cotheene’ ni “ookhuluvelya nhina citthu cotheene.” (1 Tim. 3:11) Mahukwaala, mmalokoni eekristau ciicammo ahaavo mayanuunu enci unaaphwanela utakihiya naasithiyana. Mayanuunu, nnoonela cani uwaavya anuunu amoca o wanlokoni ampheeleenyu waatakiha ni uwiitthucera citthu cinci? Moone makhalelwaaya ayo anuunwaayo ni mmananihe wuupuwela mananna owaatakiha. Wiiyeviha ikhanle ikhalelo yofayita cinene inlamuliyaawe ukhalana khula nkristau. Nthiyana nthoonyera wiiyeviha, upatthannyaawe ni Yehova unkhala woolipa cinene ni uyo nawaawacera saana atthu. Wootakihera, nthiyana nonfenta Yehova ni owiiyeviha naakupali utthara ile Yehova ilakenlyaawe wiira alopwana phinlamuliya uhoolela wanlokoni ni ciicammo watthokoni. —1 Akor. 11:3. w23.12 ipaag. 18-19 iparaag. 3-5

Yehova nopheela wiira ntheli aafente amwaarawe ni aawacere, aavahaka citthu cimpheelaaya toko iyoolya, ikuwo ni citthu cikiina, waathukana ni waakavihera ukhalana upatthani woolipa ni Yehova. (Efesu 5:28, 29) Toko ukhalana ankhili omaana, waahisimu athiyana ni ukhala ookhuluvelya cinaahala wuukavihera ukhala ntheli omaana. Weetthucaka citthu cotheenennya, unaahala wiitthenkaca wiira wahoolo urwee wakhale ntheli ni nhooleli itthoko. Wathelaka, atthunaka unaahala unnyara mwaana. Citthuni cinlamuliyaa umwiitthucera Yehova wiira ukhale nnyari omaana? (Efesu 6:4) Yehova khoona ihaaya umwiirela mwanawe Yesu wiira aananfenta ni aanankupali. (Mat. 3:17) Weeva wannyaraka mwaana, uhiliyale unhimerya mwaamwanaa wiira unanfenta. Ni khula ukati unttottopela nlattu wo citthu comaana cimpankaawe. Ayari anontakiha Yehova ciicammo anawaakavihera asaanaaya ukhala makristau ookhomaala. Wapheelaka wiitthenkaca wiira wakhale nnyari omaana, waawacere saana amucyaa, mayamunna o wanlokoni ni uhoone ihaaya waahimerya wiira unawaafenta ni wiira anawuutteeliha nrima. —Joau 15:9. w23.12 ipaag. 28-29 iparaag. 17-18

Hataa ukhalaka wiira ninaanswalela Yeho­va sana-saana, hi anaanikhumelela masa­kha anaaphwanya atthu otheene. Ciica­mmo, hiiva pooti ulupatthiya naatthu anaathanya apoovu a Nluku. Yehova khannikhikicera wiira ahiniphwanye ayo masakhaayo, masi uyo hokhuluveliha wiira naahala unikavihera ukati wotheene. (Isai. 41:10) Anikaviheraka, hiiva pooti ukhitiri uhihiya utteeliya nrima ni ulakela upanka citthu comaana, hataa yanikhumelelaka masakha. Uyo hokhuluveliha wiira naahala univaha itthu Ibiibiliya ineehanaaya “nnema na Nluku.” (Afili. 4:6, 7) Nno nnemanno ukhanle uhitepa uriipiya nrima unkhalanaaya apatthani a Yehova. Nno nnemanno ‘ninaapwaha moopuwelelo otheene’ ni nihaana ikuru cinene. Nyuuva uhopaca wuutaphuwani nrima cinene umaliha winyu ulompa ukati waariinyu nimasakha? Paahi nnaacuwela “nnema na Nluku” isiyani! w24.01 ipaag. 20 iparaag. 2; ipaag. 21 iparaag. 4

Nanfentaka Yehova, ninaahala upheela uttottopela ncina nawe ninrimeehu wotheene. Mwene Davidi ahantikha co: “Ukumyaaka wotheene uttottopele ncina na Yehova ni citthu cotheene cirinaaka cittottopele ncina naa.” (Isaa. 103:1) Davidi ancuwela wiira uttottopela ncina na Yehova waalikanaca nunttottopela mwanene Yehova. Weeriyaka ncina na Yehova anaaciya ciicammo makhalelwaawe, ni iyo inaanuupucera makhalelo omaana ni citthu cootikhiniha Yehova cimpankaawe. Davidi aapheela uttitthimiha ncina naathumwaane, kontha naari nowaarya. Ni aapheela upanka iyo ninrimaawe wotheene. Mananna mamocaaru, malevita yaanawaahoolela apoovu ukati wonttottopela Yehova. Ayo yaanawiiyeviha ni yaanaakupaleela wiira moolumwaaya khayaatosera wiira ahimyeehe uttottopeliya unomphwanela Yehova. (Nem. 9:5) Khweeliini, nwo wiiyevihanwo wahontteeliha nrima Yehova. w24.02 ipaag. 9 iparaag. 6

Wakhalaka wiira nyuuva khannokhitiri wiirannyeeha mpika mwiihelenleenyu nlattu woohuupuwelaca ratta ukati waathanleenyu uyo mpikooyo, Yehova khanhala uwoonani ukhala ntthu oololovaca. (2 Akor. 8:12) Muupuwele citthu cikhiti­nriinyu wiirannyeeha. Ibiiblya ineera: “Nluku khanakhala ootakhala nrima wiira aliyale citthu cimpankeenyu.” (Mabere. 6:10) Phimaana, ni nyuuva mpanke toko Nluku. Nhiliyale citthu cotheene cikhitinriinyu upanka, toko ukhalana upatthani woolipa ni Yehova, waahimyeera akhunaninyu citthu ciitthucileenyu awula upattisiya. Khampa nyuuva cikhitinriinyu wiirannyeeha mipika co mminepani khalayi, nyuuva pooti ukhitiri wiirannyeeha mipika cirineenyu naanaano. Mwakaviheriyaka ni Yehova, nyuuva nnaahala ukhitiri wiirannyeeha mipika ciihelenleenyu. Awula, ukati nyuuva nnomananiheenyu urwaanela uhoolo mipika co mminepani mwiihelenleenyu, nkhale ootteeliya nlattu woomoona Yehova ookaviherakani ni acaalihaka wiikurumica winyu. (2 Akor. 4:7) Nyuuva mwaahihiyerereke wiikurumica, nnaahala waakhela itthuvo cuulupale. —Akalas. 6:⁠9. w23.05 ipaag. 31 iparaag. 16-18

Yehova unancivela uwoonihera aswalyaawe wiira nawaafenta ni unantteela nrima awehaka citthu cimpankaaya. Ibiibiliya inawuuluma ikwaha piili Yehova aamwiirenlyaawe Yesu wiira uyo khanle mwanawe, nonfentaawe ni nomwaamiinyaawe. (Mat. 3:17; 17:5) Nyuuva wanhala wuucivelani umwiiwa Yehova eeraka commo awacakani nyuuva? Mahukwaala, hi khanimmwiiwa Yehova oolumaka wiirimu. Masi uyo no­nuulumana mbiiblyani. Nasomaka moolumo a Yesu yaahimenryaawe attharya­awe, unkhala khampa ninaamwiiwa Yehova anuulumelaka ayo moolumwaayo. Yesu ahaatakiha sana-saana Athumwaane. Phimaana, nasomaka citthu comaana Yesu caawuulumenlyaawe atthu oopahuwa, hiiva pooti wuupuwela khampa wiira Yehova phinooluma nnyo citthunnyo. (Joau 15:9, 15) Masi uniphwanya masakha khunthoonyera wiira Yehova hohiya unoona ukhala atthu omaana. Uhiya commo, uyo unkhala ukati wo woonihera wiira ninanfenta ni ninankhuluvela cinene Nluku. —Tiya. 1:12. w24.03 ipaag. 28 iparaag. 10-11