MWAHA WOOSOMIYA 6
Ibiiblya innikavihera cani uncuwela ule rumale wantikhiya?
“Wantikhe moolumo otheene anoohimeryaaka.”—JER. 30:2.
NCIPO 96 O Livro de Deus é Um Tesouro
NINHALA WIITTHUCANI?a
1. Kontha isiyani nyuuva nnaasukhuru nlattu wookhalana Ibiiblya?
HI NINANSUKHURU Yehova nlattu woonivaha Ibiiblya! Avarelaka nteko Nuulumo nawe, uyo naanikavihera uvilela masakha ninkhalaneehu ilelo ni ciicammo naanivaha niweherero nomaana noohoolo. Ni itthu yootepa ukhalana ifayita ukhalaka wiira Yehova naavarela nteko Ibiiblya wiira aniitthucihe makhalelwaawe omaana. Ni wuupuwela ayo makhalelwaayo unaanivara nrima ni unaanikurumica upheela umwaattamela.—Isaa. 25:14.
2. Isiyani Yehova ivarenlyaawe nteko wiira aakavihere atthu uncuwela?
2 Yehova nopheela wiira atthu otheene ancuwele. Khalayi, uyo anvarela nteko uloha, iwooni, ni mpaka ahoveleeliha malayikha wiira aakavihere atthu uncuwela. (Manu. 12:6; Mite. 10:3, 4) Khawaahala ukhitirya usoma coolohiya, iwooni ni citthu Yehova caahimyalyaawe unari wiira khacantikhiye. Phimaana, Yehova ahaaruma alopwana wantikha nlivuruni citthu caapheelaawe wiira hiiva nicuwele. (Jer. 30:2) Hi pooti wankupaliihu wiira mananna Yehova cilakenlyaawe unuulumana akhanle omaana, kontha “nttala wa Nluku eekhweeli khupahuwale.”—Isaa. 18:30.
3. Manannani Yehova cikhikicenryaawe Ibiiblya? (Nwehe Isaiya 40:8.)
3 Nsome Isaiya 40:8.b Ucuwelaca wo mbiiblyani unawaakavihera alopwana ni athiyana ookhuluvelya ukhuma nenne nokhalayi. Masi unkhitirya cani? Ibiiblya ipacenre wantikhiya ukhuma nenne nokhalayi nimakhanta yahaapica utankannya. Phimaana, makhanta oopacera yantikhiyaaya moolumo o mbiiblyani, ilelo khaavo. Masi Yehova ahaakurumica atthu wiira yoonele. Khweeliini, atthu yoonela ayo moolumwaayo yaari opahuwa, masi ayo yaanoonela sana-saana. Namasoma mmoca hantikha co aacaka cowantikhiya niiluuka iheperewu: “Pooti waaneereehu woohoovelela wiira khiivo ilivuru ikhwaawe yokhalayi inhimya ikhweeli uvikana Ibiiblya.” Khweeliini, Ibiiblya yantikhiye myaakha cinci uttuli mmakhantani yahaapica utankannya ni atthu yoonela yaari oopahuwa. Masi pooti wankhuluveleehu wiira moolumo ninsomeehu mbiiblyani ilelo akhanle moopuwelelo a mwaneene Ibiiblya, Yehova.
4. Nhina ula mwahoola ninhala wiitthucani?
4 Yehova phinnivaha “itthuvo yomaana yotheene ni yoovahiya yoohipahuwa yotheene.” (Tiya. 1:17) Ibiiblya ikhanle itthu yomaana inivahilyaawe Yehova. Hi ninaakhitiri woona mananna ntthu cinnicuwelaawe nlattu wotthuvo innivahaawe. Inanna imocaaru, Ibiiblya ikhanle itthuvo ya Yehova ni nlattu wo iyo, hi ninaakitiri woona inanna Yehova cinnicuwelaawe. Iyo inaanithoonyera wiira uyo naacuwela citthu cimpheelehu. Nhina ula mwahoola, ninaahala woona isiyani Ibiiblya inniitthucihaaya nhina makhalelo mararu a Yehova: ucuwelaca, isariya, ni nifento. Vano, nttwee noone mananna Ibiiblya inooniheraaya ucuwelaca wa Nluku.
IBIIBLYA INAWOONIHERA WIIRA NLUKU KHANLE NCUWELACI
5. Manannani Ibiiblya cinthoonyeraaya ucuwelaca wa Nluku?
5 Yehova naacuwela wiira hiiva ninaapheela ikano cawe comaana, ni itthuvo nivahilyaawe, Ibiiblya, ihaana nwo ucuwelacanwo. Ibiiblya ihaana ikuru yoorukunusa makhalelo aatthu. Ukati wantikhiyaaya ilivuru yoopacera, Mocesi ahowiirela asarayeli co: “Kahimmwe moolumo ahinhimya itthu, masi akhanle moolumo arina ifayita muukumini winyu.” (Deut. 32:47) Ntthu neewelela itthu inhimyaaya Ibiiblya, naahala ukhalana ukumi wootteeliya cinene. (Isaa. 1:2, 3) Uhookhalaru wiira Ibiiblya yantikhiye khalayi, iyo ihaana ikuru yoorukunusa ukumi waatthu. Wootakihera, nsayitini jw.org yeekunya, mphantte wantikhiye “A Bíblia Muda a Vida das Pessoas,” nyuuva pooti uphwanya myaha coopwaha 50 caatthu apankale marukunuso muukumi waya. Kontha isiyani? Kontha yahancera weettela ikano co mbiiblyani.—1 Atesal. 2:13.
6. Kontha isiyani waneereehu wiira khiivo nanka ilivuru imoca inlikanana Ibiiblya?
6 Khiivo nanka ilivuru imoca inlikanana Ibiiblya. Kontha isiyani? Kontha mwaneene khanle Yehova ni uyo khanle Nluku nakuru-cotheene, naahala ukhala mpaka ni khanle namacuwelaca muulupale. Ilivuru cinci cinaacuwelaciya unvikana mwaneene antikhale. Ikano cinvahaaya nnyo ilivurunnyo nuuwakatyaaya cinaahiya ukhalana ifayita. Masi ikano co mbiiblyani khacinhiya ukhalana ifayita. Ukhuma nenne nokhalayi, ikano co mbiiblyani cihaakavihera atthu enci. Nasomaka iyo ilivuru yowaaryeeyo nuupuwelelaka citthu cineetthuceehu, Yehova naavarela nteko nnepaawe wowaarya wiira anikavihere woona mananna oweettela ikano co mbiiblyani muukumini wihu. (Isaa. 119:27; Mal. 3:16; Mabere. 4:12) Khweeliini, mwaneene Ibiiblya Yehova naapheela cinene wuukaviherani nyuuva! Iyo itthwiiyo inaanikurumica usoma Ibiiblya khula nihuku.
Manannani Ibiiblya caakavihenryaaya waataana apoovu a Yehova khalayi ni manannani cinaakaviheraaya waataana mahuku ninkhaleehwaala? (Nwehe iparaagarafu 7-8)
7. Manannani Ibiiblya yaawaataanihaaya apoovu a Nluku okhalayi?
7 Ihaavo-tho itthu ikhwaawe inthoonyera wiira Ibiiblya ihaana ucuwelaca wa Nluku. Iyo ihaakavihera apoovu a Nluku ukhala owiiwanana. Uwakati asarayeli waakenlyaaya ilapo yaakhuluvelihiyaaya, ayo yaakhala mapuro oovirikana. Akiina yaavara nteko woomenca ihopa, akiina yaahuwa inama ni akiina yanlima. Asarayeli yaakhala ncoko nkiina pooti waaliyalaaya akiina yaakhala ncoko nkhwaawe, masi Yehova ahowiirela wiira yahaana yapankaka mikutthaano nkhayi wiira asome ni ataphuleliye malamulo. (Deut. 31:10-13; Nem. 8:2, 8, 18) Muupuwele mananna nsarayeli aahalaawe wiicoona arwaaka u Yerusalemu nipuro naapankiyaaya mikutthaano ni awoonaka aswali enci yaakhuma micoko cikhwaawe yanswalelaka Yehova! Nlattu wo iyo itthwiiyo, Yehova ahaakavihera apoovu ukhala owaataana. Nuuwakatyaaya ukhumelela waya nloko no makristau oopacera, makristau enci yooluma iluuka coovirikana. Akiina yaari oothaciri ni akhwaawe yaari amasikhini. Masi otheene caanaacivela cowantikhiya cowaarya ni iyo itthwiiyo yahowiiriha waataana yanswalelaka Nluku eekhweeli. Ni ale yaakhala makristau yaankhitiri wiiwa itthu yaahimyaaya Nuulumo na Nluku uwakati waathukumanaaya ni mayamunna ni yankaviheriya wiiweeha cowantikhiya cowaarya.—Mite. 2:42; 8:30, 31.
8. Manannani Ibiiblya inaakaviheraaya ilelo apoovu a Nluku ukhala owaataana?
8 Yehova naavarela nteko Ibiiblya wiira awiitthucihe apoovwaawe ni wiira awaataanihe. Mbiiblyani cihaavo ikhweeli cimmuuluma Yehova hiivano nimpheeleehu ucuwela. Hi ninaathukumana mmasalauni co Umwene, mapuro cimpankiya mikuthaano cuulupale, toko ikonkereesu ni mithukumano cosirikwiitu. Ayo akhanle mapuro aneetthucihiyehu ivareliyaka nteko Ibiiblya. Phimaana, pooti waneereehu wiira Ibiiblya ikhanle itthu yofayita cinene Yehova novarelaawe nteko wiira aakavihere apoovwaawe ‘unswalela wamoca.’—Sof. 3:9.
9. Wiira niiwehe Ibiiblya, isiyani ninlamuliyeehu upanka? (Nwehe Luka 10:21.)
9 Moone itthu ikiina inoonihera ucuwelaca wa Yehova. Miphantte cinci co mbiiblyani aneeweeha paahi atthu owiiyeviha. (Nsome Luka 10:21.c) Atthu otheene ntuninyani pooti usoma Ibiiblya, masi namasoma mmoca heera co: “Ibiiblya ikhanle ilivuru intepa usomiya naatthu enci, ni atthu ansoma anawiitthaalela usoma ratta uvikana inanna cinsomaaya ilivuru cikiina.” Masi ale aneeyeviha paahi phineeweha itthu ineetthucihaaya Ibiiblya.—2 Akor. 3:15, 16.
10. Manannani makiina Ibiiblya innikaviheraaya woona ucuwelaca wa Yehova?
10 Ibiiblya inaaniitthuciha ucuwelaca wa Yehova nimananna makhwaawe. Khweelini, Yehova novarela nteko Ibiiblya wiira aniitthucihe otheene cihu ninari nkhayi. Masi uyo ciicammo naamwiitthuciha ni nammaaliha khula ntthu veekhacaweru. Mwasomaka Ibiiblya nyuuva nnawoonaka mananna Yehova cinoowaceraaweni venci? Woohaakanyaca, nnawoonaka! (Isai. 30:21) Ikwaha kavi nyuuva mwaakhanleenyu nimasankiho ni nsomaka iveerusu yo mbiiblyani ni wiira co: “Ila iveeruswiila kantikheliye miiva.” Masi Ibiiblya yantikhiye wiira yaakavihere atthu imiliau cene. Vano, manannani Ibiiblya inkhalanaaya ikano cimpheeleenyu nyuuva? Iyo inkhitirya kontha mwaneene Ibiiblya khanle Nluku ootepa ucuwelaca ituninya yotheene.—2 Tim. 3:16, 17.
IBIIBLYA INAWOONIHERA WIIRA NLUKU KHANLE NASARIYA
11. Manannani Yehova oonihenryaawe uhaathanla atthu ukati wantikhiyaaya Ibiiblya?
11 Ikhalelo ikiina irinaawe Yehova ikhanle isariya. (Deut. 32:4) Isariya invaranaca niikhalelo yoohithanla, ni Yehova khaavo nonthanlaawe. (Mite. 10:34, 35; Aroo. 2:11) Noopuwelaka inanna cantikhiyaaya Ibiiblya, hi ninaakhittiri woona wiira Yehova khweeli khaavo nonthanlaawe. Ibiiblya yantikhiye niiluuka atthu enci yaacuwelaaya wuluma. Wootakihera, ilivuru 39 coopacera cantikhiye niiluuka iheperewu apoovu a Nluku yoolumaaya ule ukatyuule. Masi ukati wo makristau oopacera iluuka yoolumiya venci yaari ikereeku. Phimaana, ilivuru 27 coomalela co mbiiblyani cantikhiye niiyo iluukeeyo. Yehova khavarenle nteko iluuka imoca pahi wiira yantikhiye Ibiiblya. Ilelo, atthu ookhalaka 8 bilhões watuninyani anooluma iluuka coovirikana. Vano, manannani atthu enci commo yaahalaaya wiitthuca myaha ca Yehova?
12. Manannani inatiri impwanyannya nhina Daniele 12:4 ineerannyaaya mahuku ankhaleehwaala?
12 Inatiri ya Daniele yahokhuluveliha wiira mmahuku okhicera ‘ucuwelaca weekhweeli’ umphwanyannya mbiiblyani ‘wanhala winciva,’ awula atthu enci yanhala ucuwela ikhweeli co mbiiblyani. (Nsome Daniele 12:4.d) Itthu imoca inthoonyera wiira iyo inatiriiyo inawiirannya ukhanle utaphuleliya ni ukawiya cinene Ibiiblya ni ilivuru cihu cinoopela mwaha Ibiiblya. Masi uhookhalaru commo, Ibiiblya cintaphuleliya nimpereesa ikwaha cinci cinaatumihiya ni cinaarikihiya. Masi apoovu a Nluku ahotaphulela Ibiiblya yotheene awula miphantte caya niiluuka cookhalaka 240 ni khula ntthu pooti uphwanya Ibiiblya imoca mahala. Nlattu wo iyo, atthu o ntuninyani motheene anaakupali ihapari co Umwene uhinaphiya wuukhiceroni ituninya. (Mat. 24:14) Nlukwiihu Yehova khanle nasariya ni nopheela wiira atthu otheene ancuwele yasomaka Nuulumo nawe. Uyo nopanka iyo kontha naanifenta venci.
IBIIBLYA INAWOONIHERA WIIRA NLUKU NANIFENTA
13. Nlattuni uneereehu wiira Ibiiblya inawoonihera wiira Nluku naanifenta? (Nwehe Joau 21:25.)
13 Ibiiblya inaanikavihera ucuwela wiira ikhalelo yoopacera ya Yehova nikhanle nifento. (1 Jo. 4:8) Iyo itthwiiyo inawoonannya noopuwelaka myaha Yehova cithanlilyaawe wiira ciheliye mbiiblyani ni cithanlilyaawe wiira cihiheliye. Mbiiblyani cihaavo citthu venci-venci hiiva nimpheeleehu wiira nimpatthanane uyova, wiira nikhale ootteeliya nenna va ni wiira niphwanye ukumi woohimala. Masi nlattu wo nifento nawe, Yehova khahenle mbiiblyani citthu cinci cahaahaleehu ukhitiri wiiweeha wiira ninswalele.—Nsome Joau 21:25.e
14. Manannani makiina mbiiblyani cinooniheraaya wiira Yehova naanifenta?
14 Mananna Ibiiblya cantikhiyaaya inawoonihera wiira Yehova nanifenta nimananna makiina. Manannani? Ibiiblya khinnivaha ilista yo marumo wiira inihoolele nhina wo citthu cotheene cinvareehu mukumini wihu. Uhiya commo, Yehova naanikavihera wuupuwela avarela nteko ihantisi, inatiri ni ikano comaana. Naayo manannaayo, uyo naanittitthimiha. Ni ciicammo Yehova nopheela wiira hiiva nifente ni nimwiiwelele ninrimeehu wotheene.
Nlattuni ikhanlyaaya itthu yomaana wuupuwela mananna Yehova caavilenlyaawe aswalyaawe? (Nwehe iparaagarafu 15)
15. a) Manannani Ibiiblya inooniheraaya wiira Yehova naaniwacera? b) Nlataratoni, mwanthiyana, mwammirawo ni arokorihu owuuluvala aneelattaniha naatthuni o mbiiblyani? (Upha. 39:1, 10-12; 2 Mam. 5:1-3; Luka 2:25-38)
15 Ibiiblya inawoonihera wiira Yehova naaniwacera venci. Nlattuni waneereehu commo? Nhina Ibiiblya ahaavo matakihero aatthu enci yeecoona khampa hiiva cineecooneehu. Hi pooti wiilattaniha naayo atthwaayo, kontha ayo yaari toko hiiva, ni yaari atthu “o makhalelo toko hiivano.” (Tiya. 5:17) Ni noonaka mananna Yehova caawacenryaawe atthu akhwaawe yaanana marikariko toko hiiva cinaananeehu, khunnirikela ucuwela wiira Yehova “naathoonyera venci uthunku ni uyo nakiriri.”—Tiya. 5:11.
16. Isiyani nimmwitthucereehu Yehova nasomaka mbiiblyani mananna caawacenryaawe atthu yaavanre matampi? (Nwehe Isaiya 55:7.)
16 Ibiiblya inaanoonihera nifento na Yehova nimananna makhwawe. Ibiiblya inaanikhuluveliha wiira Nluku khanhala unihiya hataa navaraka matampi. Asarayeli yahontthekela Yehova ikwaha cinci. Waahookhalaru commo, ukati ayo waattharuwilyaaya ninrimaaya wotheene, Yehova ahaalevelela. (Nsome Isaiya 55:7.f) Makristau oopacera ciicammo yancuwela wiira Yehova aanaafenta venci. Yehova ahonruma Paulu wantikha aakurumicaka mayamunnaawe o wanlokoni ‘unlevelela ninrimaaya wotheene ni ummaaliha’ ntthu aavanre itampi yuulupale, masi aattharuwile. (2 Akor. 2:6, 7; 1 Akor. 5:1-5) Ikhanle itthu yomaana wuupuwela wiira Yehova khaahiile attharyaawe nlattu wontthekela. Uhiya commo, ooniheraka waafenta, uyo ahaakavihera, ahowiitthuciha ni ahotthuna wiira aturuwele ukhala apatthannyaawe. Yehova naakhuveliha wiira naahala upanka itthu imocaaru ilelo navaraka matampi ni nattharuwaka.—Tiya. 4:8-10.
NVAHE IFAYITA NUULUMO NA NLUKU
17. Nlattuni Ibiiblya ikhanlyaaya itthuvo yootepa ureera?
17 Yehova honivaha itthuvo yootepa ureera! Kontha isiyani Ibiiblya ikhanlyaaya itthuvo yootepa ureera? Kontha khampa coonileehu, Ibiiblya inthoonyera wiira Nluku khanle namacuwelaca, nasariya ni nanifento. Iyo ilivurwiiyo inaanoonihera wiira Yehova nopheela wiira nincuwele. Yehova nopheela wiira hiiva nikhale asipatthannyaawe.
18. Ninoonihera cani wiira ninaavaha ifayita itthuvo Yehova inivahilyaawe?
18 Hi khanimpheela uhiya uttitthimiha iyo ‘itthuvo yomaaneeyo,’ Nuulumo na Nluku. (Tiya. 1:17) Phimaana, ikhanle itthu yomaana uhihiyerera uvaha ifayita Ibiiblya. Ninhala upanka iyo itthwiiyo nasomaka moolumo owaarya o iyo ilivurwiiyo ni noopuwelaka ayo moolumwaayo. Coo, pooti wankupaliihu wiira Yehova, mwaneene Ibiiblya, naahala ucaaliha wiikurumica wihu ni ninahala uphwanya “ucuwelaca wa Nluku.”—Miru. 2:5.
NCIPO 98 A Bíblia, Um Presente de Deus
a Ibiiblya inaanikavihera umphiyeera Yehova. Isiyani nineetthuceehu mbiiblyani nhina ucuwelaca, isariya ni nifento na Nluku? Waakhuliya waya nna nikohonna pooti unikavihera usukhurweela Nuulumo na Nluku, Ibiiblya, ni ucuwela wiira ikhanle itthuvo ya Apaapeehu o wiirimu.
b Isaiya 40:8 Malasi makithi anawuuma, ittuva cinaanyaala; masi, nuulumo na Nlukwiihu khaninvira.
c Luka 10:21 Yoole ukatyuule, Nluku ahonvaha Yesu nnepa wowaarya. Vano, Yesu wahontteela nrima cinene ni aheera: “Mi kinawuuttottopelani waatthuni, Paapa, Apwiiya owiirimu ni omwiilaponi, kontha nnya citthunnya nhaavithela ratta-raatta atthu oocuwelaca ni anamasoma, ni nhaathoonyera atthu ookhala toko asinamwane ooyevaca. Iyee, Paapa, kontha uhoocivelani upanka cole.”
d Daniele 12:4 Masi weeva Daniele, usunke ala moolumwaala ni utthukele ilivurwiiyo mpaka ukati woomalela. Atthu enci anaahala waavyaavya, ni ucuwelaca weekhweeli unaahala winciva.
e Joau 21:25 Khweeliini, cihaavo-tho citthu cikhwaawe Yesu cipankilyaawe. Unari wiira citthu cotheennyo ciicammo cihantikhiya mmalivuruni, kinoona wiira ituninya yotheene khayaahala ukhalana ikhato wiira cisunkiye nnyo ilivurunnyo.
f Isaiya 55:7 Atthu oohiloka ahiye iphiro caya, ni anakhirini ahiye moopuwelwaaya; anturuwele Yehova nohala uwoonela ikiriri; anturuwele Nlukwiihu, kontha naahala waalevelela niiraati.