MWAHA WOOSOMIYA 7
Manannani nyuuva nnohaleenyu uphwanyera ifayita cinene usoma winyu Ibiiblya?
“Nyuuva nnosoma cani?”—LUKA 10:26.
NCIPO 97 A Palavra de Deus Ajuda-nos a Viver
NINHALA WIITTHUCANI?a
1. Isiyani intthonyera wiira Yesu anvaha ifayita Cowantilhiya Cowaarya?
NHOPACA weemela ni wuupuwela mananna wiira moone mananna mwaahaleenyu wiicoona ucaaliya nlattu woomoona Yesu eetthucihaka? Uwakati wotheene uyo aanaaromola Cowantikhiya Cowaarya, ni uyo aapanka iyo kontha ahohela mmuru wawe nnyo cowantikhiyannyo. Phimaana, moolumo oopacera oolumilyaawe waapattisiyaawe ni moolumo ookhicera yoolumilyaawe hinaaya ukhwa, uyo ahoromola Cowantikhiya Cowaarya.b (Deut. 8:3; Isaa. 31:5; Luka 4:4; 23:46) Myaakha miraru caaviralyaawe eetthucihaka va watuninyani va, Yesu aanaasoma ni aanaaromola Cowantikhiya Cowaarya uwakati weetthucihaawe mapuro oocariya.—Mat. 5:17, 18, 21, 22, 27, 28; Luka 4:16-20.
Muukumini motheene Yesu ahoonihera wiira caanancivela cowaantikhiya cowaarya anhiya cinkurumicaka nhina citthu caapankaawe (Nwehe iparaagrafu 2)
2. Isiyani yankavihenre Yesu ucuwela Cowantikhiya Cowaarya? (Nwehe ilatarato yo wakapani.)
2 Hinaaya upacera ulalyeera va watuninyani va, Yesu aanaasoma ni aanawiiwa Nuulumo na Nluku. Ikwaha cinci, uyo aanaawiiwaka athumwaane o watuninyani yeehaniya Yusufu yoopelaka mwaha moolumo a Nluku wapuwani.c (Deut. 6:6, 7) Ni khweeliini, Yesu anrwaa Isaapatu cotheene usinakooka naamucyaawe. (Luka 4:16) Nwo yaanaasomiya moolumo a Nluku ni uyo aanawiiwelela sana-saana. Nuukatyaaya, uyo ahancera ucuwelela mapuro oophwanya iveerusu cikiina co nnuulumoni na Nluku. Ni ayo manannaayo, Yesu ancuwela saana Cowantikhiya Cowaarya, ni ciicammo caanancivela ni aaneettela muukumini wawe citthu ceetthucaawe. Wootakihera, muupuwele itthu yaakhumelenle ukati waarinaawe myaakha 12. Eetthucihi ootempulu yancuwela saana malamulo a Moceesi, masi ayo “yahokhala ootikhinihiya nlattu wo citthu caacuwelaawe ni caakhulaawe.”—Luka 2:46, 47, 52.
3. Isiyani ninhaleehu woona nhina ula mwahoola?
3 Nasomaka Cowantikhiya Cowaarya woohihiyerera, hi ninaahala ucuwela saana ni ninaahala utepa woona ukhalana ifayita. Masi ninhala uphwanyera ifayita cani itthu insomeehu? Hi pooti wiitthucera venci itthu Yesu yaawiirenlyawe ale yaacuwela nlamulo, toko anamantikha, mafariseu ni masatuseu. Ayo aholeli ottiinnyaayo yansoma Cowantikhiya Cowaarya woohihiyerera, masi khayaaphwanyera ifayita itthu yasomaaya. Yesu ahooluma citthu tthaaru caahala waakavihera ayo atthwaayo uphwanyera ifayita Cowantikhiya Cowaarya. Itthu Yesu yaawiirenlyaawe ayo atthwaayo pooti unikavihera hiiva (1) wiiweha itthu insomeehu, (2) uphwanya ikano cowiipithyaa co mbiiblyani ni (3) uhiya wiira Nuulumo na Nluku ninikhalihe atthu omaana.
NSOME WIIRA MWIIWEEHE
4. Itthu imphwanyannya nhina Luka 10:25-29 inniitthuciha isiyani nhina mananna oosoma Nuulumo na Nluku?
4 Hi ninaapheela wiiweeha itthu yantikhiye mbiiblyani. Naahiiweeheke, hi khaninhala ukhitiri ukumihera ifayita itthu insomeehu. Wootakihera, moone mwaha Yesu waamoopannyaawe nlopwana mmoca aacuwela saana nlamulo. (Nsome Luka 10:25-29.d) Ukati uyo nlopwanooyo wankohilyaawe Yesu wiira aahala ukhitiri cani uphwanya ukumi woohimala, Yesu ahonkoha co: “Isiyani yantikhiye munlamulo? Nyuuva nnosoma cani?” Nlopwanooyo ahomwaakhula aromolaka itthu yantikhiye nhina Cowantikhiya Cowaarya, wiira nihaana ninfentaka Nluku ni unfenta nkhunanihu. (Lev. 19:18; Deut. 6:5) Masi moone itthu yakohilyaawe: “Nkhunanaka khanle tipani?” Iyo itthwiiyo inawoonihera wiira kheeweeha itthu yaasomaawe. Phimaana, uyo khaacuwela mananna oweettela muukumini wawe itthu yantikhiye munlamuloni.
Nyuuva pooti wiitthuca wiiweeha itthu insomeenyu
5. Manannani ulompa ni usoma woohakuvyaaca unhalaaya unikavihera wiiweeha itthu insomeehu?
5 Wiira nikhitiri wiiweha Nuulumo na Nluku saana, nihaana niilamalelihaka usoma. Moone miruku cinhala wuukaviherani. Nlompe nhinapacera usoma. Hi ninaapheela ukaviheriya ni Yehova wiira niiweehe Ibiiblya. Phimaana, nlepele nnepaawe wowaarya wiira nkhitiri usoma saana. Itthu ikiina, nsome woohaakuvyaaca. Iyo pooti wuukaviherani wiiweeha itthu insomeenyu. Atthunaka nyuuva unawuucivelani usoma nkumihera ncu ninyu vate awula wiiwelela Ibiiblya yookaravariya. Mwapankaka commo, nnaahala ukhitiri kahi paahi woona insomeenyu, masi ciicammo wiiweeha moolumwaayo. Upanka commo pooti wuukaviherani wiiweeha, uhiliyala ni wiitthuca sana-saana itthu inhimyaaya Ibiiblya. (Jos. 1:8) Mwamalihaka usoma, nlompe-tho munsukuruku Yehova nlattu wotthuvo yuuvahilyaaweni ni munlepelaka wuukaviherani wiira nkhitiri weettela itthu mmalihileenyu usoma.
Wantikha citthu cihimpheeleenyu uliyala unhala wuukaviherani cani wiiweeha ni wuupuwela itthu insomeenyu? (Nwehe iparaagrafu 6)
6. Kontha isiyani wiipanka makoho ni wantikhaca citthu cihimpheeleenyu uliyala unaahala wuukaviherani ukati unsomeeyu? (Nwehe ilatarato.)
6 Moone tootho miruku miili cinhala wuukaviherani nyuuva wiiweeha Ibiiblya. Mwiipanke makoho nhina itthu nnosomeenyu. Woosoma mwaha wo mbiiblyani, mwikohe co: ‘Ula mphantte unsomaakoola, apani anoolumiya? Tipani nooluma? Nomuulumana tipani ni nlattuni? Itthu insomaaka, yaakhumelenle nipuroni ni ukatini?’ Ala makohwaala anaahala wuukaviherani nyuuva wuupuwela itthu nnosomeenyu ni wiiweeha mwahooyo. Ukati nnosomeenyu, mwantikhace citthu cihimpheeleenyu uliyala. Wantikha pooti wuukaviherani wiiweeha saana mwahooyo. Uhiya commo, wantikha unawuukaviherani uhiliyala itthu insomeenyu. Nyuuva pooti wantikha makoho, citthu cimpheeleenyu utotha ucuweleeha, citthu cuuvanreni nrima, mananna nnohaleenyu weettela insomeenyu awula mananna ciiconneenyu ukati waasomeenyu. Upanka commo pooti wuukaviherani woona Ibiiblya khampa moolumo Nluku wantikhenlyaaweni nyuuva.
7. Isiyani inlamuliyeehu ukhalana ukati unsomeehu Ibiiblya? (Nwehe Matewus 24:15.)
7 Yesu aheera wiira nihaana nikhalanaka ankhili wiira niiweehe itthu inhimyaaya Ibiiblya. (Nsome Matewus 24:15.e) Masi ankhili isiyani? Ukhanle ukhitiri uvirikaniha citthu. Ntthu rina ankhili naakhitiri ucuwelela citthu coorikarikaca. Yesu aheera wiira hi nihaana nikhalanaka ankhili wiira nikhitiri ucuwelela citthu cinkhumelela ntuninyani cinthoonyera wiira inatiri co mbiiblyani cinawiirannya. Wiira niphwanyere ifayita citthu cinsomeehu mbiiblyani, nihaana wiikurumica ukhalana ankhili.
8. Isiyani inlamuliyeehu upanka wiira nikhale atthu ankhili ukati woosoma Ibiiblya?
8 Yehova nawaavaha aswalyaawe ankhili. Phimaana, munlompe munlepelaka wiira ookavihereni ukhalana ayo ankhilyaayo. (Miru. 2:6) Masi, hiiva ciicammo nihaana nipankaka mphantteehu. Manannani? Nsome sana-saana ni mmananihe ulattaniha itthu incuweleenyu niitthu insomeenyu. Itthu inhala wuukaviherani wiiweeha mwahooyo ukhanle utotha mmalivuruni cihu. Wootakihera, nyuuva pooti uvarela nteko Guia de Pesquisa para Testemunhas de Jeová. Nnyo ikarumanyo pooti wuukaviherani ucuwelela itthu insomeenyu maanaaya isiyani ni pooti wuukaviherani ukhitiri woona mananna oweettela muukumini winyu. (Mabere. 5:14) Nyuuva mwakhalaka ntthu ankhili ukati woosoma Ibiiblya, nnahala ukhitiri wiiweeha saana.
NSOME MPHEELAKA UPHWANYA IKANO COWIIPITHYAA CO MBIIBLYANI
9. Ikhweelini yofayita imphwanyannya nhina Cowantikhiya Cowaarya masatuseu yaahiyaaya uttuli?
9 Masatuseu yancuwela saana ilivuru thanu coopacera cimphwanyannya nhina Cowantikhiya Niiluuka Iheperewu, masi ayo khayaamini ikhweeli cofayita caaphwanyannya nhina nnyo ilivurunyo. Wootakihera, moone itthu Yesu yaawiirenlyaawe ukati waamananihaaya untteha, yankohaka nhina wunwelelihiya waatthu ookhwa. Yesu ahowiirela: “Nyuuva khansomile nlivuruni ya Moceesi ihantisi inooluma mwiri wo mwiiwa, Nluku waamwiirenlyaawe Moceesi: ‘Mi Nluku Aparahaamu, Nluku a Isaaki ni Nluku a Yakopi’?” (Mark. 12:18, 26) Khweeliini, masatuseu yahopaca usoma iyo ihantisiiyo ikwaha cinci. Masi moolumo a Yesu yahoonihera wiira ayo yanhiya uttuli ikhweeli yofayita imphwanyannya nhina ile ihantisiile: wunwelelihiya waatthu ookhwa.—Mark. 12:27; Luka 20:38.f
10. Nasomaka Ibiiblya, isiyani ninlamuliyeehu utotha?
10 Nineetthucani? Nasomaka Ibiiblya, khanimpheela wiitthaala wiira niiweehe citthu cotheene cinniitthucihaaya ihantisi insomeehu. Hi khanimpheela paahi woona ikano coohirika uphwanya, mais ciicammo nimpheela ucuwelela ikhweeli ni ikano cowiipithyaa ni coorika uphwanya.
11. Toko cinhimyaaya 2 Timotiyu 3:16, 17, nnohala ukhitiri cani uphwanya ikano cowiipithyaa ukati woosoma Ibiiblya?
11 Ukiti unsomeenyu Ibiiblya, nnohala ukhitiri cani uphwanya ikano cowiipithyaa? Moone itthu inhimyaaya 2 Timotiyu 3:16, 17. (Nsome.g) Nnyo iveerusunnyo cineera wiira “Cowantikhiya cotheene . . . cihaana ifayita” (1) yowiitthuciha, (2) yoovaanyiha, (3) yoolokihaca citthu, ni (4) yoolaka niisariya. Nnya ifayita cesennya cinaaphwanyannya nhina ilivuru cotheene co mbiiblyani, hataa cile cihinsomeenyu venci. Nsome sana-saana ihantisi yo mbiiblyani ni mmananihe woona mattharelelo o mbiiblyani iyo ihantisiiyo inwiitthucihaayani. Ciicammo, mmananihe woona manannani iyo ihantisiiyo inwiitthucihaayani makhalelo a Yehova ni itthu impheelaawe. Mmananihe ciicammo woona manannani iyo ihantisiiyo cinoovaanyihaayani nyuuva. Masi wuuvaanyihani manannani? Iveerusu imoca yo mbiiblyani pooti unikavihera ucuwelela itthu yoohinamaana impheeleehu upanka ni makhalelo oohiloka nirineehu; pooti unikavihera unyema nnyo citthunyo ni uhihiya umwiiwelela Yehova. Mmananihe ucuwelela manannani mwaha nnosomeenyu caahalaaya wuukaviherani wookolela awula urehererya moopuwelelo oohiloka arinaawe ntthu aahaleenyu umphwanya wuulalyeerani. Ni ukati unsomeenyu, mwaavye mwaha cinhala wuulakani wiira nkhitiri uwehera citthu cotheene toko Yehova noweheraawe. Mwahelaka mmuru nnya citthu cesennya ukati woosoma, nyuuva nnaahala ukhitiri uphwanya ikano cowiipithya cinhala wuukaviherani uphwanyera ifayita usoma winyu Ibiiblya.
NHIYE USOMA WINYU IBIIBLYA WIIRA WUTTHENKACENI
12. Nlattuni Yesu waakohilyaawe mafariseu, awiirelaka: “Nyuuva kansomile”?
12 Nkwaha mmoca, mafariseu yahowootherya athari a Yesu uheettela nlamulo no Isaapatu. Woowaakhula, Yesu ahaakoha co: “Nyuuva khansomile?” Uyo aakohile commo wiira awoonihere wiira khayawehera saana Cowantikhiya Cowaarya. (Mat. 12:1-7)h Yesu ahooluma matakihero meeli o mbiiblyani ni iveerusu imoca ya porofeeta Oseiya wiira awoonihere mafariseu wiira ayo yaari atthu ohikiriri ni khayaacuwela nlattuni naakumiheriyaaya nlamulo no Isapatu. Ayo alopwanaayo yansoma Nuulumo na Nluku, masi nno khanaarukunusa meettelwaaya. Kontha isiyani? Kontha ayo yaasoma wiira avaanyihe ni yaari atthu owiicoona. Phimaana, ayo khayaakhitiri wiiweeha itthu yaasomaaya.—Mat. 23:23; Joau 5:39, 40.
13. Hiiva ninlamuliya usoma Ibiiblya nlattu wosiyani?
13 Moolumo a Yesu anniitthuciha wiira hiiva nihaana nisomaka Ibiiblya nlattu woopheela wiitthuca, kahi nlattu woopheela uvaanyiha insomeehu. Khanimpheela ukhala toko mafariseu. Masi, nimpheela ukhala atthu owiyeviha ni khanimpheela ukhotta wiitthucihiya. Toko Ibiiblya cinhimyaaya, hi nihaana ‘nikupaliki moolumu a Nluku aneeweenyu.’ (Tiya. 1:21) Napankaka commo, ninaahala weesa Nuulumo na Nluku wanrimani wihu. Citthu nineetthuceehu mbiiblyani nhina uwoonela akhunanihu ikiriri, uthunku ni waafenta cinhala unikavihera ukhala atthu oomaana neeyevihaka ni nasomaka Ibiiblya wiira niitthuce, kahi wiira nivaanyihe.
Ninhala ucuwela cani wiira ninaahiya Nuulumo na Nluku nirukunusaka moopuwelweehu? (Nwehe iparaagrafu 14)i
14. Isiyani inhala unikavihera ucuwela wakhala wiira ninaahiya Ibiiblya irukunusaka meettelweehu awula mena? (Nwehe ciicammo ilatarato.)
14 Mananna cinaawacereehu atthu akhwaawe phinoonihera wakhala wiira ninnohiya Nuulumo na Nluku nirukunusaka meettelweehu awula mena. Mafariseu khayaahiile wiira Nuulumo na Nluku naavare nrima, phimaana ayo ‘yahaahukhumu atthu yahaatthekile itthu.’ (Mat. 12:7) Phimaana, mananna cinaawehereehu ni cinaawacereehu akhwiihu anaathoonyera wakhala wiira ninaahiya Nuulumo na Nluku nirukunusaka meettelweehu awula mena. Wootakihera, niireke wiira unaanicivela waattottopela akhwiihu nlattu wo citthu comaana cimpankaaya awula unnicivela wuuluma citthu caya coohinamaana? Niireke wiira hiiva ninnowoonela uthunku akhunanihu ni ninawaalevelela? Awula unaanicivela uwuuluma pusya akhunanihu? Waakhula ala makohwaala unaahala unithoonyera wakhala wiira citthu cinsomeehu cinnorukunusa moopuwelelweehu ni citthu cimpankeehu.—1 Tim. 4:12, 15; Mabere. 4:12.
USOMA NUULUMO NA NLUKU UNAANITTEELIHA NRIMA
15. Yesu aawehera cani Nuulumo na Nluku?
15 Yesu naanancivela Nuulumo na Nluku. Nhina Isaalimu 40:8, ninaaphwanya inatiri inooluma mananna Yesu caaweheraawe Nuulumo na Nluku. Iyo ineera: “Upanka itthu impheelaa, oo Nlukwaaka, ukicivela, ni nlamulo naa nirii wanrimani waka.” Nlattu Yesu woncivela Nuulumo na Nluku, uyo aananswalela Yehvoa wantteelaka nrima. Inanna imocaaru, nasomaka Nuulumo na Nluku, ciicammo ninaahala ukhala ootteeliya venci.—Isaa. 1:1-3.
16. Isiyani inlamuliyeenyu upanka wiira nkhitiri uphwanyera ifayita usoma winyu Ibiiblya? (Nwehe ikwaaturu “Moolumo a Yesu pooti wuukaviherani wiiweeha itthu insomeenyu.”)
16 Nilakele weettela moolumo a Yesu ni niikurumice untakiha. Napankaka commo, ninaahala uphwanyera ifayita usoma wihu Ibiiblya. Wiira niiweehe Ibiiblya, hi nihaana nilompaka, usoma woohaakuvyaaca, wiipanka makoho ni wantikhaca citthu cihimpheeleehu uliyala. Wiira nikhale atthu ankhili ukati woosoma Ibiiblya, nihaana nitothaka mmalivuruni cihu cinhala unikavihera ucuweleeha insomeehu. Wiira nivarele nteko ratta Ibiiblya, nihaana nitothaka uphwanya ikano cowiipithyaa, hataa ukhalaka wiira ninsoma mphantte uhincuwelaciya cinene. Ciicammo, wiira nihiye Ibiiblya irukunusaka meettelweehu, nihaana nisomaka wiira niitthuce kahi wiira nivaanyihe. Neekurumicaka upanka commo, ninaahala utepa uphwanyera ifayita usoma wihu Ibiiblya ni upatthaniihu ni Yehova unaahala utepa ukhala woolipa.—Isaa. 119:17, 18; Tiya. 4:8.
NCIPO 95 “A Luz Clareia Mais e Mais”
a Otheene hiiva ninonswalela Yehova ninawiikurumica wiira nisome Ibiiblya khula nihuku. Atthu enci ciicammo anaasoma Ibiiblya, masi khaneeweha itthu insomaaya. Iyo itthwiiyo ciicammo yahowiirannyeela atthu uwakati wa Yesu. Khweeliini, itthu yaawiirenlyaawe Yesu atthu yaasoma Nuulumo na Nluku inaanikavihera ucuwela mananna hiiva cinhaleehu uphwanyera ifayita uwakati woosoma Nuulumo na Nluku, Ibiiblya.
b Unawoonannya wiira uwakati Yesu wapattisiyaawe ni waathanliyaawe ninnepa wowaarya, uyo ahohokoleela wuupuwela makhalelo yaarinaawe wiirimu hinaaya uwa watuninyani.—Mat. 3:16.
c Maria ancuwela saana Cowantikhiya Cowaarya, ni hi ninaacuwela iyo kontha uyo ahoromola moolumo o mbiiblyani ikwaha cinci. (Luka 1:46-55) Atthunaka Yusufu ni Maria khayaarina nsurukhu mwinci wiira akhalane Cowantikhiya Cowaarya. Vano wiira ahele mmuru, ayo yanawiikurumica wiiwelela sana-saana ukati waasomiyaaya Nuulumo na Nluku usinakooka.
d Luka 10:25 Vano, nlopwana mmoca aacuwelaca Nlamulo aheemela wiira anttehe, ni ahonkoha co: “Mwiitthucihi, isiyani inlamuliyaaka upanka wiira kiphwanye ukumi woohimala?” 26 Uyo ahowiirela: “Isiyani yantikhiye munlamulo? Nyuuva nnosoma cani?” 27 Woomwaakhula, uyo nlopwanooyo enre co: “‘Unfente Yehova, Nlukwaa, ninrimaa wotheene, niiroohwaa yotheene, niikuru caa cotheene ni nimoopuwelelwaa otheene’ ni ‘unfente nkhunanaa toko cineefentaa.’” 28 Yesu aheera: “Nhaakhula ratta; nhihiye upanka iyo itthwiiyo ni nnaahala uphwanya ukumi woohimala.” 29 Masi uyo nlopwanooyo aapheela wooniya ukhala nasariya. Phimaana, ahonkoha Yesu co: “Nkhunanaka khanle tipani?”
e Matewus 24:15 Phimaana, moonaka itthu yoohiirya inwaana ihasara, yuulumilyaawe porofeeta Daniele, inari nipuro nowaarya (ntthu nosoma akhalane ankhili wiira eeweehe ila itthwiila).
f Nwehe mwaha “Achegue-se a Deus— ‘Ele é o Deus . . . de vivos’” nhina irevista Ukhalenla 1 yo Fevereiro yo 2013.
g 2 Timotiyu 3:16 Cowantikhiya cotheene ciphattuwale wa Nluku ni cihaana ifayita yo wiitthuciha, yoovaanyiha, yo wookolela citthu, yoolaka niisariya, 17 wiira ule nontthara Nluku akhale ookhitiri ni oolikaneliya wiira avare miteko comaana.
h Nwehe ciicammo Matewus 19:4-6. Nhina nnyo iveerusunnyo, Yesu ahaakoha mafariseu itthu toko iyo. Ayo yahosoma ihantisi inooluma upattusiya wo citthu cotheene, masi ayo khayakhitinri ucuwelela isiyani iyo ihantisiiyo ineetthucihaaya nhina mananna Nluku cinoonelaawe uthelanaca.
i ILATARATO: Unkutthaanoni, munna mmoca nowacera mphantte wo awudiyu ni ividiyu naavonyakaca venci. Uhookhalaru commo, umala waya mikutthaano, mayamunna ananttottopela nlattu wo wiikurumica wawe ni khantepa uwacera citthu caavonyanihacaawe.