Asarayeli yaahokhuluveliha umwiiwelela Nluku

Cinavinreene myeeri miili asarayeli anakhumileene Wiciipitu, yaahophiya umwaakoni weehaniya Sinai ni yaahoviriha ukati anari wonwo. Vano Yehova aahonruma Moocesi uwela waculu uyo mwaakooyo ni uphiya wawe, Yehova aahomwiirela co: “Phimiiva kiwooponle asarayeli. Wakhala wiira anaapanka citthu cotheene kinaarumaaka, anaahala ukhala apoovwaaka.”Moocesi ukhuruwa wawe umwaakoni nwo, ahaahimerya asarayeli citthu cotheene Yehova anhimenryaawe. Nnaacuwela mananna asarayeli yaakhunlyaaya? Ayo yenre co: “Ninaahala upanka citthu cotheene Yehova cinhalaawe uniruma.”

Moocesi ahoturuwela-tho umwaakoni Sinai. Ula nkwahoola Yehova aahomwiirela co: “Nrotto kinaahala uwuulumana asarayeli. Waahimerye wiira akhale owiitthenkaceene ni ahiwele ula mwaakoola.” Vano Moocesi ahokhuruwa umwaakoni nwo ni ahaahimeerya asarayeli wiira yiitthenkace kontha Yehova anhala waahimerya itthu yofayita cinene.

Uvira waya mahuku mararu, asarayeli yahoona uverunnya umwaakoni Sinai. Ciicammo yaaheewa yarumaka itari ni mapalapatta. Ni yahoona mooro wakhumaka waculu mwaako. Asarayeli yahoovaca cinene. Mwaakooyo waahocaracara mwiisi ni wanttettemela cinene ni mapalapattaayo yanvira yatepaka unyakula. Vano, wariyari moorooyo, asarayeli yaheewa ncu na Nluku niiraka: “Thi miiva Yehova. Nhaaswalele a Nluku akhwaawe.”

Moocesi aahoturuwela-tho uwela mwaako Sinai ni ula nkwahoola, Yehova ahaavaha malamulo asarayeli yaalamuliyaaya weettela. Ayo malamulwaayo yanhimya mananna asarayeli yaahalaaya unswalela Nluku. Ayo malamulwaayo yaahimya citthu asarayeli yaalamuliyaaya upanka ni citthu cahaalamuliyaaya upanka. Moocesi ahantikha ayo malamulwaayo ni ahosoma uhoolo wa asarayeli. Vano, asarayeli yaahonkhuluveliha Nluku yiiraka: “Yehova, hi ninaahala upanka cotheene unhalaa unilepela.” Masi niireke asarayeli yahopanka citthu yaakhuluvelihilyaaya?