Daniele ahovonnyeriya munlikittini naari akharamu

Mwene nkhwaawe o Babilooniya, aari Dariyu. Uyo, ancuwela wiira Daniele aari ntthu omaana. Phimaana, aahonthala wiira akhale nhooleli o Babilooniya. Masi Alopwana akhwaawe yanonrama Daniele ni yaapheela wiira eeviye. Ayo yancuwela wiira Daniele anonlompa Yehova ikwaha tthaaru khula nihuku. Phimaana, yaahorwaa waatheperya amwene Dariyu yeerelaka co: “Amwene Dariyu, nkumiherere nlamulo ninhimya wiira atthu otheene ahaana wuulompani nyuuva paasi. Ni ntthu nohala unlompa nluku akhwaawe nhikhanle nyuuva paasi, nolamuliya uvonyeriya munlikittini naakharamu.” Amwene Dariyu wahaacivela uyo nrukuuyo ni yahasinari nno nlamulonno.

Ukati Daniele aacuwenlyaawe aahorwaa uwanyawe, aahokhoroma uhoolo wo janela ni ahopacera unlompa Yehova. Ukati wanlompaawe Yehova, awanannyaawe yahaaka nkhorooyo. Vano, ukati waamonnyaaya alompaka, ayo yahokhuma atthawaka ni yaahorwaa waahimerya amwene Dariyu wiiraka co: “Daniele khawiiwelenleni! Uyo nonswalela Nlukwaawe ikwaha tthaaru khula nihuku.” Masi amwene Dariyu aanoncivela cinene Daniele ni khayaapheela wiira uyo eeviye. Phimaana, naahovira nihuku nteru yaavyaka mananna oomoopola Daniele. Masi khayaakhitinri. Kontha ayo yahaasinari nlamulonno ni khayaalamuliya urukunusa. Phimaana, yahaaruma anantekwaaya wiira anvare Daniele ni anvonyere munlikittini naakharamu owoopiha.

Ule uhiyuule, amwene Dariyu yaahosanka cinene ni Daniele. Mpaka khayaakhitinri urupa. Usa waya wicisu, yahotthawelela unlikittininwo ni yahokhuwela yiiraka co: “Daniele, Nlukwooyo howoopola?”

Wootutusera, Daniele ahaakhula eeraka co: “Iyeni! Ki nkumi! Nlayikha na Yehova nootthuka malaku aakharamu.” Amwene Dariyu wahaatteela nrima cinene ni yahaaruma anantekwaayo wiira ankumihe Daniele munlittini. Daniele khaakharavuliye hataa vakaani! Vano amwene yahaaruma anantekwaaya wiira yaavare ni yaavonyere munlikittini alopwana otheene yaatheperya wiira Daniyeli avonyeriye munlikittini. Ni uvonyeriya waya munlikittinimmo, yaahowiira waakheleliya naakharamwaayo.

Vano amwene Dariyu, aahoruma uhimeeriya apoovu otheene co: “Atthu otheene anlamuliya unswalela Nluku a Daniele. Kontha uyo homoopola Daniele munlikittini naakharamu.”

Unoonela cani untakiha Daniele ni unswalela Yehova mahuku otheene?