MWAHA WOOSOMIYA 33
Wunwelelihiya waatthu ookhwa unthoonyera nifento, ucuwelaca ni uvilela urinaawe Nluku
“Wahoolo unaahala ukhala wunwelela waatthu ookhwa.”—MITE. 24:15.
NCIPO 151 Ele Chamará
NINHALA WIITTHUCANI?a
1. Nlattuni Yehova ulakenlyaawe wumpa citthu?
UHAAVO uwakati Yehova waaryaawe veekha. Masi uyo khaakhala acukulacaka nlattu wookhala veekha. Kontha khiivo inonhaleela. Masi uhookhalaru commo, Nluku ahopheela waavaha ukumi atthu akhwaawe wiira ayo akhale ootteeliya. Nlattu wo nifento nirinaawe, Yehova ahancera wumpa citthu.—Isaa. 36:9; 1 Jo. 4:19.
2. Manannani Yesu ni malayikha caakhanlyaaya ukati woonaaya citthu Yehova cumpaawe?
2 Woopacera, Yehova ahomumpa mwanawe Yesu wiira anvarane nteko. Wamoca ni Yesu, Yehova humpa citthu cotheene ni malayikha menci. (Akol. 1:16) Yesu wahontteela nrima cinene nlattu wo waavarana nteko nkhayi Athumwaane. (Miru. 8:30) Malayikha ciicammo yahokhala ootteeliya. Kontha ayo malayikhaayo yahaavo ukati Yehova wamoca ni Nantekwaawe Oocuwelaca, Yesu, yompaaya irimu ni itthaya. Ukati woonaaya yumpiyaka irimu ni itthaya, ayo malayikhaayo yaakhanle cani? Ayo ‘yankhuwela yattottopelaka’ ukati wompiyaaya itthaya. Ni ukati Yehova waamalihaawe wumpa khula itthu, ayo yaanaatthapelela. Ni unawoonannya wiira ayo yahokhala ootteeliya cinene ukati woonalyaaya itthu yoomalela Yehova yumpalyaawe watuninyani: apinaatamu. (Jó 38:7; Miru. 8:31, niwehero) Khula itthu Yehova yumpalyaawe inthoonyera nifento ni ucuwelaca urinaawe.—Isaa. 104:24; Aroo. 1:20.
3. Toko cinhimyaaya 1 Akorintu 15:21, 22, wiivaherera wa Yesu ukhitirihale isiyani?
3 Yehova aapheela wiira apinaatamu otheene akhalane ukumi woohimala watuninyani yomaana yumpalyaawe. Masi Atamu ni Hawa yahovara matampi. Nlattu wo iyo, ayo yahokhwa ni ilelo apinaatamu otheene anaakhwa. (Aroo. 5:12) Yehova pankale isiyani? Atamu ni Hawa uvara waya matampi, Yehova ahohimya itthu yaahalaawe upanka wiira awoopole apinaatamu. (Upha. 3:15) Yehova anhala unveleeliha Mwanawe, Yesu, wiira awoopole asaana a Atamu ni Hawa mmatampini ni muukhwani. Khula ntthu haana athanlaka unswalela Yehova wiira aphwanye ukumi woohimala.—Joau 3:16; Aroo. 6:23; nsome 1 Akorintu 15:21, 22.b
4. Makohoni anhala waakhuliya nhina ula mwahoola?
4 Wunwelelihiya waatthu ookhwa unaakumihaca makoho menci, toko ala: Wunwelelihiya waatthu ookhwa unhala wiirannya cani? Niireke ninaahala ukhitiri waacuwelela amuciihu ni apatthaniihu anhala wunwelelihiya? Utteeliyani unhaleehu ukhalana ukati unhalaaya wunwelelihiya atthu ookhwa? Ni wunwelelihiya waatthu ookhwa unniitthuciha isiyani nhina nifento, ucuwelaca ni uvilela urinaawe Yehova? Ninaahala woopela mwaha ala makohwaala.
WUNWELELIHIYA WAATTHU OOKHWA UNHALA WIIRANNYA CANI?
5. Nlattuni nineereehu wiira atthu ookhwa khanhala wunwelelihiya wonkwaha mmoca?
5 Upeephoni, Yehova naahala unruma Mwanawe wiira awunwelelihe atthu imiliyawu cene. Ukhala wiira anhala ukhala atthu enci, ayo khanhala wunwelelihiya wonkwaha mmoca. Kontha isiyani? Kontha yarwaaka wunwelelihiya atthu enci weemaara imoca, upeephoni khaninhala ukhala nnema. Ni Yehova khanakhala Nluku oohiithotokaniha; uyo nopheela wiira citthu cotheene cikhale saana wiira atthu akhale ninnema. (1 Akor. 14:33) Ukati Yehova wamoca ni Yesu wumpaawe ituninya, uyo ahothoonyera ucuwelaca ni uvilela, ni khompale citthu cotheene wonkwaha mmoca. Yesu naahala waatakiha Athumwaane ukati unhalaawe uvara nteko nkhayi naale anhala woopwa u Harmacetom, wiira aatthenkacere inupa, iyooolya, ikuwo ni citthu cikhwaawe ale anhala wunwelelihiya.
Atthu anhala woopwa ukhottoni yo Harmacetom anaahala urwaa uwiitthuciha myaha co Umwene wa Nluku ni malamulo a Yehova ale anhala wunwelelihiya (Nwehe iparaagarafu 6)f
6. Toko cinhimyaaya Miteko 24:15, ukati Yehova unhalaawe uwunweleliha atthu ookhwa, atthuni-tho anhala wunwelelihiya?
6 Ale anhala woopwa ukhottoni yo Harmacetom, ahaana yarwaaka uvara nteko muulupale cinene: uwiitthuciha atthu anhala wunwelelihiya myaha co Umwene wa Nluku ni malamulo a Yehova. Nlattuni anlamuliyaaya wiitthucihiya? Kontha enci anhala wunwelelihiya, anhala ukhala atthu “yaheettenle” isariya. (Nsome Miteko 24:15.c) Ayo atthwaayo ahaana yarwaaka urukunusa mirima caya wiira yaakhele iparakha cinhaleehu waakhela nlattu wo woopoliya wihu ni Yesu. Woowiitthuciha ikhweeli atthu enci yahancuwela Yehova, niireke khula ntthu nohala usomihiya Ibiiblya ni ntthu mmoca, toko cinaasomiheehu Ibiiblya atthu ilelo? Uyo ukatyuuyo, niireke anaahala ukhala maloko unhalaaya ukela atthu anhala wunwelelihiya? Hiiva khanincuwela. Masi ninaacuwela wiira wuumaleloni Umwene wo Myaakha 1.000 wa Yesu Kristu, “Yehova naahala ucuweliya ntuninyani motheene toko maaci wankhuneelaaya ipahari.” (Isai. 11:9) Ninaahala ukhalana nteko mwinci ukati wo myaakha 1.000. Masi unhala ukhala nteko woonitteeliha nrima!
7. Kontha isiyani apoovu a Yehova anaahala waavilela ale anhala wunwelelihiya ukati woowiitthuciha malamulo a Yehova?
7 Ukati wo Umwene wo Myaakha 1.000 wa Kristu, otheene ale anhala unswalela Yehova watuninyani khanhala uhiya urukunusa mirima caya wiira ancivelihe. Phimaana, ukati woowiitthuciha atthu anhala wunwelelihiya, anaahala waavilela. Kontha anaacuwela wiira ntthu uhiya upanka citthu coohiloka wiira eettele malamulo a Yehova inkhala itthu yoorika. (1 Pet. 3:8) Ale anhala wunwelelihiya wiira akhale watuninyani anaahala upheela ukhala wamoca naapoovu o wiiyeviha a Yehova, ahinhala uhiya wiikurumica ‘utotha woopwa waya.’—Afili. 2:12.
NIIREKE NINAAHALA UKHITIRI WAACUWELELA AMUCIIHU NI APATTHANIIHU ANHALA WUNWELELIHIYA?
8. Citthuni cinnikupaliha wiira ninaahala waacuwelela amuciihu ni apatthaniihu anhala wunwelelihiya?
8 Cihaavo citthu cinci cinnikupaliha wiira ninaahala waacuwelela amuciihu ni apatthaniihu anhala wunwelelihiya. Wootakihera, nawuupuwelaka atthu Yehova yaawunwelelihalyaawe khalayi, unawoonannya wiira uyo nohala uwunweleliha atthu niirutthu yaarinaaya ahinaaya ukhwa. Awula nohala uwunweleliha niikhovyaaya, niinanna coolumacaaya ni coopuwelaaya. Muupuwele wiira Yesu likanihale ukhwa nuurupa ni wunwelelihiya likanihale nuuwusiya ntthu norupa. (Mat. 9:18, 24; Joau 11:11-13) Ntthu norupa onwaka khanvirikana niinanna caaryaawe hinaaya urupa. Ikhove yaarinaawe ni citthu coopuwelaawe hinaaya urupa khacinvirikana. Mmuupuwele Laazaru. Uyo ahokhala mahuku macese nakhwaale, ni irutthwaawe yahanca wunttwa. Masi ukati wonwelelihiyaawe ni Yesu, Laazaru ahocuweleliya naasirokorawe ni uyo ahaacuwelela.—Joau 11:38-44; 12:1, 2.
9. Citthuni cinnikupaliha wiira ninaahala waacuwelela amuciihu ni asipatthaniihu anhala wunwelelihiya?
9 Yehova naakhuluveliha wiira upeephoni khaavo ntthu nohala wiira: “Kinaawerennya.” (Isai. 33:24; Aroo. 6:7) Phimaana, atthu ookhwa anhala wunwelelihiya niirutthu yoohiwerennya. Masi nanlelo anaahala ukhalana upahuwa waya. Waari wiira ayo yaahala wunwelelihiya woohipahuwa, atthunaka khayaahala ucuweleliya naamucyaaya ni naasipatthannyaaya. Unkhala toko wiira ukati wo Umwene wo Myaakha 1.000 wa Kristu, apinaatamu anhala ukhala oohipahuwa vakaani-vakaani. Wamalaka ukati wo myaakha 1.000, Yesu phinhalaawe waahokolosera Umwene Athumwaane. Uyo ukatyuuyo, Umwene wa Nluku unaahala wiirannyeeha citthu cotheene Yehova caapheelaawe ni waakhaliha apinaatamu oohipahuwa.—1 Akor. 15:24-28; Apoka. 20:1-3.
UTTEELIYANI UNHALEEHU UKHALANA UKATI UNHALAAYA WUNWELELIHIYA ATTHU OOKHWA?
10. Nnohala ukhala cani ukati nnohaleenyu uwoona yunwelelihiyaka atthu akhwile?
10 Nnaakhitiri wuupuwela inanna cinhaleenyu ukhala ukati woomwaakhelela mmuciinyu awula mpatthaniinyu khwaale anfenteenyu cinene? Uyo ukatyuuyo, nyuuva nnohala utteeliya mpaka wankumiheenyu minthori awula nnohala uthyaa? Nnaahala untthapela ni umwiipela macipo Yehova wiira munsukhuru? Pooti wankupaliihu wiira wunwelelihiya waatthu ookhwa unaahala uniiriha utepa unfenta Yehova ni Yesu. Waari wiira Yehova ni Yesu khannifenta, khanaahala waakhela iyo iparakha yuulupaleeyo.
11. Khampa cihimyalyaawe Yesu nhina Joau 5:28, 29, isiyani inhala waakhumelela ale anhala utthara malamulo osariya a Nluku?
11 Muupuwele utteeliya unhalaaya ukhalana ale anhala wunwelelihiya yanceraka vakaani-vakaani uhiya meettelo o khalayi ni wancera weettela malamulo a Nluku. Ale anhala urukunusa mirima caya anaahala waakhela ukumi woohimala upeephoni. Masi ale ahinhala utthuna urukunusa mirima caya, Yehova khanhala waahiya yatankanyaka nnema ninhala ukhala upeephoni ni naahala waamalamaliha.—Isai. 65:20; nsome Joau 5:28, 29.d
12. Yehova nohala waacaaliha cani ale anhala ukhala watuninyani?
12 Ukati Umwene wa Nluku unhalaaya wancera ulamulela, apoovu a Nluku anaahala woona yiirannyaaka moolumo ari nhina Miruku 10:22, aneera: “Iparakha invahaawe Yehova phimphwanyiha nhakhu, ni uyo khanoncerera iyo iparakheeyo masankiho.” Yakaviheriyaka ni nnepa wowaarya, ale anonswalela Nluku anaahala ukhalana nhakhu muulupale, awula anaahala vakaani-vakaani unlatta Kristu. (Joau 13:15-17; Efesu 4:23, 24) Khula nihuku irutthwaaya inaahala ukhala yookhomaala ni anaahala ukhalana ukumi womaana. Atthu anaahala ukhalana ukumi wootteeliya! (Jó 33:25) Masi niireke wiira wuupuwela wunwelelihiya waatthu ookhwa unaanikavihera nenna va?
NIFENTO NA YEHOVA NINNIITTHUCIHA ISIYANI?
13. Toko cinhimyaaya Isaalimu 139:1-4, wunwelelihiya waatthu ookhwa unthoonyera cani wiira Yehova naanicuwela ratta otheene cihu?
13 Toko coonaleehu, Yehova amunwelelihaka ntthu, uyo nhala umunweleliha niirutthu, moopuwelelo ni makhalelo yaarinaawe hinaaya ukhwa. Iyo maanaaya wiira Yehova nawuufentani cinene. Kontha uyo naawacera citthu cinoopuweleenyu, cinwiirani, cinoolumeenyu ni cimpankeenyu, ni naakhitiri wuupuwela nnyo citthunnyo. Phimaana Yehova awunwelelihakani, naahala ukhitiri wuuhokoloserani moopuwelelo ni makhalelo yaarineenyu nhinaaya ukhwa. Mwene Davidi ancuwela wiira Yehova naaniwacera otheene cihu. (Nsome Isaalimu 139:1-4.e) Noopuwelaka wiira Yehova naanicuwela ratta, nineetthuca isiyani?
14. Wuupuwela wiira Yehova naanicuwela ratta unnikavihera cani?
14 Wuupuwela wiira Yehova naaniwacera ratta unaanikavihera uhitepa ukhala ni masukhuli. Manannani? Nhiliyale wiira Yehova nawuuwacerani. Uyo anancivela makhalelo omaana nyuuva anthoonyereenyu. Uyo nawuupuwela citthu cinookhumelelani muukumini winyu cinrukunusa makhalelweenyu. Ucuwela iyo unaanitteeliha nrima. Phimaana nhiicoone ukhala veekha. Yehova khula ukati naakhala ninyuuva atothaka wuukaviherani.—2 Ikor. 16:9.
UCUWELACA WA YEHOVA UNNIITTHUCIHA ISIYANI?
15. Univaha wawe niweherero noonunweleliha uhoolo, Yehova thoonyenre cani ucuwelaca?
15 Nlattu wo woova wiiviya, atthu enci anaatthuna upanka citthu cahaalamuliya upanka. Atthu anhooleliya ni Sotwani yapheelaka unkhanyereriha ntthu waarukunuwela apatthannyaawe awula upanka citthu cincuwelaawe wiira khacinakhala comaana, ayo ammoopopihera umwiiva. Masi khaninoova yaanoopopiheraka ukhwa. Ninaacuwela wiira awananiihu yaniivaka, Yehova naahala ununweleliha. (Apoka. 2:10) Hiiva ninaakupali wiira ayo khanhala unihiiha unswalela Yehova. (Aroo. 8:35-39) Khweeliini Yehova hothoonyera ucuwelaca univaha wawe niweherero noonunweleliha. Ukhala wiira Yehova honikhuluveliha ununweleliha, hiiva khaninwoova-tho atthu anhooleliya ni Sotwani annoopopiha univa wiira nipanke citthu cimpheelaaya. Ciicammo, ucuwela wiira ninaahala wunwelelihiya wahoolo unaanilipiha nrima wiira ninvaresese Yehova.
Niireke citthu cinlakeleehu upanka cinaathoonyera wiira ninankhuluvela Yehova wiira naahala univaha citthu cinhala unithwa? (Nwehe iparaagarafu 16)g
16. Isiyani inlamuliyeenyu wiikoha, ni waakhula winyu unthoonyera isiyani?
16 Isiyani inhaleenyu upanka moopopihiyaka wiiviya naawanani a Yehova? Uyo ukatyuuyo nnaahala unkhuluvela Yehova ni inatiri ipankalyaawe yoowunwelelihani? Inanna imooca yoocuwela wakhala wiira nnankhuluvela Yehova awula mena, ukhanle wiikoha co: ‘Citthu cinlakelaka upanka hataa cikhalaka cankaani, cinaathoonyera wiira kinankhuluvela Yehova?’ (Luka 16:10) Itthu ikhwaawe inlamuliyeenyu wiikoha phiila: ‘Makhalelwaaka anaathoonyera wiira kinaahoolelihera Umwene wa Nluku muukumini waka ni kinankhuluvela Yehova wiira naahala ukivaha citthu cinhala ukithwa?’ (Mat. 6:31-33) Wakhala wiira mwaakhunle ala makohwaala ‘iyee,’ nnothoonyera wiira anankhuluvela Yehova ni nholakela uhinhiya unswalela hataa yuukhumelelakani masakhani.—Miru. 3:5, 6.
UVILELA WA YEHOVA UNNIITTHUCIHA ISIYANI?
17. a) Wunwelelihiya waatthu ookhwa unthoonyera cani wiira Yehova naavilela? b) Ninhala uthoonyera cani wiira ninansukhuru Yehova nlattu woovilela urinaawe?
17 Yehova hothanla nihuku ni iwoora inhalaawe umalamaliha ila ituninya yoohinamaaneela. (Mat. 24:36) Yehova khanhala woocya uvilela ni khanhala umalamaliha ila ituninyeela nihinaphiya nihuku nilakenlyaawe. Hataa apheelaka cinene uwunweleliha atthu akhwile, uyo nanlelo naavilela. (Jó 14:14, 15) Uyo nweherera uphiya nihuku nilakenlyaawe wiira awunwelelihe atthu akhwile. (Joau 5:28) Khweeliini, uvilela wa Yehova unaaniitthuciha citthu cinci. Muupuwele ila itthwiila: Nlattu Yehova woovilela, nawaavaha ukati atthu enci hataa ni hiiva wiira ‘nittharuwe. (2 Pet. 3:9) Yehova nopheela wiira atthu enci ancuwele ni yaphwanye ukumi woohimala. Phimaana nihaana ninsukhuruku Yehova nlattu woovilela urinaawe. Ninhala uthoonyera cani wiira ninansukhuru? Neekurumicaka waatotha ‘ale anoonihera uratteene uphavela ukumi woohimala,’ ni naakavihera unfenta ni unswalela Yehova. (Mite. 13:48) Ala manannaala, ayo anaahala uphwanyera ifayita uvilela wa Yehova, toko hiiva.
18. Nlattuni ninlamuliyeehu waavilela akhunanihu?
18 Yehova naacuwela wiira hiiva ninhala ukhala oohipahuwa wiimaleloni Umwene wo Myaakha 1.000 wa Yesu. Uhinaphiya uyo ukatyuuyo, uyo khanhala uhiya univilela ni unilevelela makoosiihu. Phimaana ninlamuliya untakiha Yehova niikurumicaka uweheeha makhalelo omaana arinaaya mayamunneehu ni waavilela. Moone itthu yankhumelenle nrokorihu. Awanuwawe yahancera ukhala ni masukhuli menci ni yahohiya urwaa umikutthaanoni. Nrokorihu neera: “Iyo itthwiiyo yahokiriipiha nrima cinene. Citthu caalakenleehu upanka watthokoni wihu khacaaneettenle saana.” Masi hataa wakhalaka commo, nrokorihu khaahiile waavilela awanuwawe. Uyo ahonkhuluvela Yehova ni khoocyaale. Uyo khaaweheehale makhalelo oohinamaana aawannyawe, masi aaweheehale makhalelo omaana yaarinaaya. Uyo heera: “Awannyaka ahaana makhalelo omaana ni ari mowiikurumica umaliha masukhuli arinaaya.” Ntakihero na nrokorihu ninthoonyera wiira nihaana naavilelaka amuciihu ni mayamunneehu o wanlokoni aneekurumica utthema marikariko arinaaya!
19. Isiyani inlamuliyeehu ulakela upanka nna va?
19 Yesu wamoca ni malayikha yahokhala ootteeliya cinene ukati Yehova wompaawe ituninya. Muupuwele mananna cinhalaaya ukhala ootteeliya nrima yoonaka ituninya inacanre atthu oohipahuwa anonfenta ni anonswalela Yehova. Ni muupuwele mananna makristau oothanliya anhala ulamulela wamoca ni Yesu Kristu cinhalaaya ukhala ootteeliya nrima yoonaka wiira nteko waavaraaya uhaaphwanyiha iparakha apinaatamu. (Apoka. 4:4, 9-11; 5:9, 10) Mwiicuupuwele nkhalaka ituninya ihinhala ukhala-tho wunla nlattu woohuva ni ihinhala ukhala-tho uwerennya, ucukulaca ni ukhwa. (Apoka. 21:4) Uhinaphiya uyo ukatyuuyo, nlakele utakiha nifento, ucuwelaca ni uvilela wa Yehova. Mwapankaka commo, nnaahala ukhala ootteeliya, hataa yuukhumelelakani masakhani. (Tiya. 1:2-4) Ninansukhuru cinene Yehova nlattu woonikhuluveliha wiira “wahoolo unaahala ukhala wunwelela waatthu ookhwa”!—Mite. 24:15.
NCIPO 141 Ukumi unkhala itthuvo ya Nluku
a Yehova khanle Athumwanihu onifento, oocuwelaca ni oovilela. Ayo makhalelwaayo khanoonannya paahi nhina citthu cumpalyaawe, masi ciicammo anawoonannya nhina inatiri ipankalyaawe yoowunweleliha atthu akhwaale. Ula mwahoola unaahala wuuluma citthu cineekoheehu nhina wunwelelihiya waatthu ookhwa. Ciicammo, ninaahala woona manannani ninlamuliyeehu utakiha ninfento, ucuwelaca ni uvilela urinaawe Yehova.
b 1 Akorintu 15:21 Ukhala wiira ukhwa uwaale nlattu wa nlopwana mmoca, wunwelelihiya waatthu ookhwa ciicammo unwa nlattu wa nlopwana mmoca paasi. 22 Kontha, toko cinkhwaaya atthu otheene nlattu wa Atamu, Ciicammo atthu otheene anaahala waakhela ukumi nlattu wa Yesu.
c Miteko 24:15 Ni miiva kihaana niweherero ninweela wa Nluku, niweherero ala alopwanaala ciicammo nirinaaya, wiira wahoolo unaahala ukhala wunwelela waatthu ookhwa yeettenle isariya ni ale yaheettenle.
d Joau 5:28 Ihuutikhiniheeni ila, kontha unaahala uphiya ukati unhalaaya wiiwa ncu nawe otheene ari mmahiyeni 29 ni anaahala ukhuma, ale apankale citthu comaana, wiira akhale nuukumi, ale apankale citthu cootakhala wiira ahukhumwiye.
e Isaalimu 139:1 Yehova, weeva unaakiweheeha ni unaakicuwela. 2 Unaacuwela ukati unonkomaaka ni ukati unonwaaka. Unari uttayi, unaacuwela moopuwelelwaaka. 3 Unaakoona ukati uneettaaka ni ukati unrupaaka; unaacuwela sana-saana iphiro caka cotheene. 4 Kihinaaya ukumiha nuulumo wamalakuni waka, weeva Yehova unaacuwela ratta-raatta.
f ILATARATO: Nlopwana aakhwile khalayi nawunwelelihiya ukati wo Umwene wo Myaakha 1.000 wa Yesu. Munna mmoca oopwale ukhottoni yo Harmacetom naakhala ootteeliya ukati woomwiitthuciha isiyani inlamuliyaawe upanka wiira aakhele iparakha cinhaleehu waakhela nlattu wo woopoliya wihu ni Yesu.
g ILATARATO: Munna nawaahimyera aseefyaawe wiira ahaavo mahuku ahinhalaawe uvara nteko mpaka uhiyu. Uyo nawaahimyacera wiira ayo mahukwaayo uhiyu nvara miteko ca Nluku. Ciicammo, uyo nawaahimyacera wiira mahuku makhwaawe, wakhalaka nteko umpheela uvariya wowaakuvya, uyo naahala uvara mpaka uhiyu.