Inhala Ukhumelela Isiyani ni Ittiini Cirivo?

1. Ittiini coothene comaana?

Ahaavo atthu ookupaleeha mmattiinini moothene. Ucuwela wiira Nluku nawaaweha yala atthwala ni nawaapheelaca iyo ihapari yomaana. Masi woocukulaca, ittiini cirii moopanka citthu coohiloka. (2 Akorintu 4:3, 4; 11:13-15) Toko cinhimyaaya anahapari, ittiini cikhwaawe cinaakavihera iterrorismu, wiivanana, ikhotto, waarupihaca ni waatulumu asinamwane. Citthu toko cila cinawaacukulihaca atthu onkupaleeha Nluku!​—Unsome Matewus 24:3-5, 11, 12.

Mphantte nkhwaawe, ittiini yokhweeli inanttittimiha Nluku, ittiini yowootha khinoncivihera. Ila ineetthuciha moopuwelelo ahirivo mbiiblyani, toko umootheryaca citthu Nluku ni hataa myaha caatthu ookhwa cowoothoothiya. Masi Yehova naapheela wiira atthu acuwele ikhweelyaawe.​—Unsome Ezekiyeli 18:4; 1 Timotiyu 2:3-5.

2. Inhala Ukhumelela Isiyani ni Ittiini Cirivo?

Nluku khaneehiya uthepiya ni ittiini yowootha inhimyaa unfenta, masi ifentaka ituniya ya Sotwani. (Tiyaku 4:4) Nuulumo na Nluku ninaahimya wiira ittiini yowootha ikhanlee “Ibabiloniya, Yuulupale.” Babiloniya yarii isitati yookhalayi mapuro yancenryaaya ittini yowootha, unavinreene ukathi wa Nowe, waacanryaaya maaci menci ntuniyani. Woohipica, Nluku naahala ututusera umala wo ittiini cinaathepya ni cinaahuviha apinaatamu.​—Usome Apokalipise 17:1, 2, 5, 16, 17; 18:8.

Ihapari comaana khacimmalela vaa paahi. Yehova khanaaliyala atthu ale ampheela ikhweeli ari mmattiinini cowootha ntuniyani moothene. Uyo naweetthuciha ikhweeli, aakaviheraka wiira akhume mmattiinini cowootha.​—Unsome Mikeya 4:2, 5.

3. Atthu ookupaleeha ahaana upanka isiyani?

Yehova nawaawacera atthu ampheela ucuwela ikhweeli ni upanka yomaana. Uyo nawaahimerya wiira ahiye ittiini yowootha. Atthu anonfenta Nluku anaapheela uhiya upanka cootakhala wiira ancivihere Nluku.​—Usome Apokalipise 18:4.

Iseekulu yoopacera, atthu ookupaleeha weewalyaaya ihapari comaana ca Nluku caataphuleliya ni maapostolu, ayo yahaakhelela ni nrima wootteeliya. Yehova aheetthuciha meettelo makina, ootteeliha nrima cinene, ookhalana maana ni nweherero. Ayo atthwaayo akhanlee nthoonyero nomaana noopheela hiiva utakiha, kontha yahaakhelela moolumo a Yehova yeseraka wanrimaniwaya ukhala itthu yoopacera muukuminiwaya.​—Usome 1 Atesalonika 1:8, 9; 2:13.

Yehova nawaakhelela wanlokoniwawe waatthu onswalela, ale ahiyale ittiini yowootha. Weeva waakhelelaka nlattulo nonttukuttha na Yehova, unaarwaa uphwanya upatthanyaawe, umuci nkhwaawe wo nifento mwaatthuni onswalela Yehova, ni ukumi woohimala.​—Unsome Markus 10:29, 30; 2 Akorintu 6:17, 18.

4. Kontha isiyani umala wo ittiini yowootha ikhanlee ihapari yomaana?

Uwakathi unrwaawe utankanya ittiini yowootha, Nluku naarwaa umaliha uhuvihana urivo ntuniyani moothene. Ittiini yowootha khinrwaa-tho waathepyathepya ni waawanyaniha-tho apinaatamu. Atthu oothene ankookhala wamoca answalelaka Nluku mmoca paahi, eekhweeli.​—Usome Apokalipise 18:20, 21; 21:3, 4.