VINO TUNGACITA LINO IVINTU VYAKOMA IMITENGO
Mwaya na Ukapekape
Ndi cakuti mukucuula pa mulandu nu kukoma kwa mitengo, mungayuvwa ukuti mutanga mukwanishe ukupeelako yauze vimwi. Nomba ukupeelako yauze vino mukweti kungamwazwa. Mungakwanisha ukusungako impiya zimwi na lino mukupeelako yauze.
MULANDU UNO CACINDAMILA UKUCITA VII
Ukuya na ukapekape nanti sile umu tuntu utunono, kukalenga ukuti twaya ni nsansa nu kulayuvwa ukuti twacindama. Ya dokota yamwi yakalanda ukuti ukupeelako yauze vino tukweti kungalenga ukuti tuye nu umi usuma alino na melenganyo asuma. Wakwe, ukupeela kungalenga ukuti tutalwala ulwale uwa mu melenganyo nanti ukulasakamikwa sana, nupya cingalenga tutalwala ulwale wakwe BP nanti ukulauvwa umwili ukuwaya. Ukupeela kungalenga nu kuti umuntu alaala ningo.
Ndi cakuti tukupeelako antu yauze impiya nanti vintu vyuze, cingatwangukila ukupokeelela uwazwilizyo lino tukulondekwa. Ya Howard, yano yakaikala uku England yalanzile ukuti: “Ndi cakuti tukupeelako yauze vino tukweti nanti ukuyazwa muli vino yakulondekwa, nemo na mamane cikatwazwa ukukanalola ukuti tukucuzya yauze lino yakutwazwa.” Kwene, antu aya na ukapekape wa cumi cumi, yasienekela ukuti nayo yamayapeela vimwi. Nomba yangapanga ya cuza asuma aangayazwa lyonsi lino yakulondekwa uwazwilizyo.
VINO MUNGACITA
Mwapeelako yauze vino mukweti. Nanti icakuti mutakweti ivintu ivingi, mungakwata vimwi vino mungapeela, nanti sile utwakulya tunoono. Ya Duncan aa ku Uganda, pamwi nu lupwa lwao, yatakwata ivintu ivingi lelo yaya na ukapekape. Ya Duncan yatiile: “Nemo na mamane, cila mulungu tukaamako umwi uku kuliila pamwi ivyakulya. Tukaipakizya ukuya pamwi na antu yauze.”
Kwene, lino mukupeelako yauze mulinzile ukwelenganyapo ningo. Citanga cizipe ukupeela ivingi icakuti imulizya na vino mukulondekwa pa ng’anda.—Yobo 17:5.
Ezyini ukucita vii: Mungapeelako umwi ivyakulya nanti sile ivya kumwa vimwi. Ndi cakuti imukwata ivintu vimwi vino mwemo mutakulondekwa sana, uzye citanga cizipe kupeelako ya cuza inu nanti ina mupalamano inu yano yangavitemwa?
Mwapeela umu nzila zyuze. Ivya upe vimwi ivisuma sana visilondekwa impiya. Wakwe, tungaomvya insita itu uku kwazwa yauze muli vino yakulondekwa. Amazwi asuma nayo kwene yangaya upe! Fwandi mwaneenako yauze vino mwatemwa pali aliyo.
Mungezya ukucita vii: Mwaazwako yauze imilimo ya pa ng’anda, kulungisha vimwi nanti ukuyasendelako vimwi. Mungalembelako ya cuza inu kadi nanti meseji, nanti sile ukuyaneena ukuti imukwelenganya pali aliyo.
Ndi cakuti muli na ukapekape, mulaya sana ni nsansa.