VINO TUNGACITA LINO IVINTU VYAKOMA IMITENGO

Mwaya nu Upaalilo

Uzye ivintu ivikoma sana umutengo umu mpanga inu ukucila impiya zino mukakwata? Uzye mukusakamala pali vino mungacita pakuti muzane vino mukalondekwa pamwi na amu lupwa lwinu? Ndi cakuti ali vino cili, mungasakamala pali vino vilacitika uku nkoleelo. Nomba nanti icakuti cingaya vivyo, ukupaalila ukuti ivintu vilazipa kungamwazwa sana.

MULANDU UNO ICICINDAMILA UKUCITA VII

Antu aaya nu upaalilo yasielenganya sile ukuti ivintu vilazipa. Lelo, upaalilo ukalenga ukuti yacitepo vimwi pali vino vikuyacitikila pakuti vintu viyeko ningo. Wakwe ukulingana na vino yamwi yalondelezya, antu yano yaya nu upaalilo cikayazwa . . .

ukuzizimizya intazi
ukusenuka zuwa ndi cakuti ivintu vyasenuka
ukupingulapo ningo pa vyakucita umu umi, alino nu kucita vintu ivingayazwa ukuya nu umi usuma

VINO MUNGACITA

Cakutandikilapo, mwalola vino Baibo ingamwazwa ndakai. Muli Baibo mwaya ivingamwazwa ukuzizimizya intazi ya kukoma kwa mitengo. Ivyaya muli Baibo vingalenga mwaelenganya ukuti uwanda umwi ivintu vilazipa, nupya vingamwazwa nu kumanya ukuti kuli vimwi vino mungacita ndi cakuti ivintu vyatala pali ndakai nanti uku nkoleelo.

“Lyene maka ya kwelenganya [mano asuma] yalakulinda nu kwiluka kulakucingilila.”—Mapinda 2:11.

Cakwe ciili, mwaelenganya pali vino Baibo yalanda ukuti ivilacitika uku nkoleelo. Ndi cakuti mwiluka ukuti muli Baibo mwaya ukupanda mano ukungamwazwa, cingamwazwa ukulalondesha ukumanya vino yalanda pali vino vilacitaka uku nkoleelo. Wakwe, mulasambilila ukuti Leza asilonda sile ukuti mukaye nu “umi usuma uku nkoleelo alino nu upaalilo” lelo wikako ni cintu icingalenga ukutimuye nu upaalilo ukome ndakai. (Yelemiya 29:11) Icintu cico u Wene Wakwe Leza.

UZYE UWENE WAKWE LEZA I CANI, NUPYA I VYANI VINO ULACITA?

Uwene wakwe Leza, uteeko uno ulateeka insi yonsi. (Danieli 2:44; Mateo 6:10) Pa nsita iyo, kutalaya yano yalacula nanti apiina nupya yonsi yalaikala umutende nu kukwata vyonsi vino yalalondekwa pakuti yaya ni nsansa, wakwe vino malembo alondelelapo yakalangilila.

“Ulaya ni nsansa nupya ulaipakizya ivintu visuma.”—Masamu 128:2.

“Yatalaaombesya sile apa sile sile [kuli kuti yano yalateekwa nu Wene uu].”—Ezaya 65:23.

“Umu nsi mulaya sana vyakulya.”—Masamu 72:16.

Antu aingi sana yataila malayo yaa, pano yasininkizya ukuti “Leza aatanga abepe.” (Tito 1:2) Uzye mutanga mutemwe ukuilolela muli Baibo mweineco? Upaalilo uno Baibo ikalenga umuntu ukukwata ungamwazwa ukuzizimizya intazi ya kulizya impiya alino nu kutaila ukuti ivintu vilazipa uku nkoleelo.