Ulwale wa mu Melenganyo Waya Umu Nsi Yonsi
“Nanti indi nenga umu muputule, nkasakamikwako panono.”
“Namanya ivikancitikila; ndi cakuti nuvwa ningo ala panono sile nimaya nu ulanda.”
“Cila wanda nkaezya ukwika mano kuli vino vikucitika, nomba insita zimwi cikazanwa ukuti natandika ukusakamikwa pa ntazi na zyuze.”
Alanzile vii antu yamwi aaculapo uku ulwale wa mu melenganyo. Uzye namwe nanti yamwi yano mwamanya mukacula wakwe vikwene?
Manyini ukuti mutaya mwenga. Antu aingi ndakai yakacula uku ulwale wa mu melenganyo, ciye aliyo kwene nanti antu yano yatemwa.
Ukwaula nu kutwisika tukwikala, “umu manda akusyalikizya” aakalenga aingi ukulasakamikwa. (2 Timoti 3:1) Umwi uwasambilila sana wazanyile ukuti umu nsi yonsi apali antu 8 ala umuntu wenga walwala ulwale uwa mu melenganyo. Pa mulandu nu ulwale wakwe COVID-19 umu 2020, antu amapesenti ukufika kuli 26 yaculanga na masakamika ukucila vino cali umu 2019.
Cacindama ukumanya antu aakacula uku masakamika ndakai. Lelo cacindamisya ukumanya vino mwemo na ya lupwa inu mukayuvwa.
Uzye ukuya na melenganyo asuma ali kutuli?
Ukuya na melenganyo asuma kungalenga umuntu auvwa ningo nu kuomba ningo ivintu. Nupya angazizimizya lino wasakamikwa, angaipakizya nu umi.
Ulwale uwa mu melenganyo . . .
USIIZA pa mulandu nu utonte wa muntu.
ULWALE ukalenga umuntu ukusakamikwa, ukuta ukwelenganya ningo, ukukanaikanya, alino ni miyele yuze.
Ungalenga umuntu camutalila ukupanga ivyuza nu kuomba imilimo.
Indwala ii ingalema antu amisinku ni imitundu yonsi, aasambilila na aatasambilila, aakwata ivyuma nanti aatakwata ivyuma, na amu mipepele yonsi.
Mwalenga uwazwilizyo ndi cakuti mwakwata intazi ya mu melenganyo
Insita zimwi umuntu angatandika ukucita nanti ukuyuvwa ivipusaneko na vino wayuvwanga mpiti, angalaala sana nanti kukanalaala icilinge, ukulya sana nanti ukulya sile panono, ukusakamikwa sana nanti ukusoka; ndi cakuti vya musango uu vyatandika ukucitika limwi angalondekwa ukulola dokota angamwazwa ukumanya icikulenga vivyo na vino angamala intazi iyo. Nomba aekwi kuno tungalenga uwazwilizyo?
Yesu Klistu, umuntu uwakwatisye sana amano pano nsi watiile: “Antu apuma yasilondekwa uwa kuyapozya, suka alwale.” (Mateo 9:12) Yonsi aakalwala yano yakaya kuli ya dokota iyayalwazya nu kuyapeela umulembo, yakacefyanyako intazi umu umi na cico cikalenga iyaya ni nsansa. Nupya cacindama sana ukuya uku cipatala nu kuyapoka umulembo ndi cakuti ulwale watwalilila.a
Nanti cakuti Baibo isilanda pa vyamilwazizye, lelo ivyayamo vingatwazwa ukuya na melenganyo asuma. Tukumulalika ukubelenga ivipande ivyalondelelapo ivikulanda pali vino Baibo ingatwazwa ndi cakuti twakwata intazi iya mu melenganyo.
a Magazini ii isikukomelezya pa milwazizye imwi. Lelo cila muntu alinzile ukupingulapo ningo lino atatala wasololapo apa milwazizye imwi.