Mwaelenganya Pali Simapepo Mukalamba Yesu Aakatulangulukilako

1-2. (a) U mulandu ci uno Yeova watumile Umwanakwe pano nsi? (b) I vyani vino tumasambilila umu cipande cii? (Aebele 5:​7-9)

IMYAKA umupiipi na 2,000 iyatipita, Yeova Leza watumile Umwanakwe ukwiza pano nsi. U mulandu ci? Umulandu onga uno wamutumile, u kwizakulula antu uku luyembu ni mfwa alino nu kufumyapo iviipe vino Satana waleta. (Yoa. 3:16; 1 Yoa. 3:8) Nupya Yeova wamanyile ukuti ivyali nu kucitikila Yesu pano nsi vyali nu kumwazwa ukwizaya Simapepo Mukalamba aakalangulukilako nupya uwa cikuuku. Yesu wizile aya Simapepo Mukalamba pa cisila ca kubatiziwa umu 29 C.E.a

² Umu cipande cii, tumasambilila pa vyacitikile Yesu lino wali pano nsi ivyalenzile afikepo ukuya Simapepo Mukalamba aakatulangulukilako. Icicindama sana ukusambilila pali vino vyacitikile Yesu pano kumalenga catwangukila ukupepa kuli Yeova alino nu kupalama sana kuli aliwe, sana sana lino tuli nu ulanda na lino twaluvyanya.—Belengini Aebele 5:​7-9.

UMWANA WAKWE LEZA WIZA PANO NSI

3-4. I vintu ci vino Yesu wasiile lino wizile pano nsi, nupya umi wakwe wali uli pano nsi?

³ Sweingi ivintu vyasenukapo umu umi witu, limwi apa mulandu wakuti twalondekwanga ukufuma uku ncende ino twatemilwe nu kukuukila uku ncende yuze nu kusha ya lupwa lwitu alino ni vyuza. Ukusenuka kuu kutangupala. Nomba ivyacitikile Yesu vitacitikilapo umuntu aliwensi. Wali malaika wa kutandikilapo nupya umucindame sana ukwi yulu. Yeova wamutemilwe nupya lyonsi wayanga ni nsansa pano waombelanga pamwi na Isi. (Masa. 16:11; Mapi. 8:30) Nomba pali Filipi 2:7 pakati “wasile vyonsi vino wakweti,” kuli kuti icifulo cino wakweti ukwi yulu nu kwizaikala na antu aatamalilika pano nsi.

⁴ Nupya elenganyini pa myaka iya kutandikilapo ino Yesu wali pano nsi. Yesu wavyalilwe umu lupwa ulupiina, twamanya vivyo pa mulandu ni lambo ilinono lino avyazi yakwe yapeezile api tempele. (Levi 12:8; Luka 2:24) Lino Umwene Helodi wamanyile pa kuvyalwa kwakwe Yesu, walondanga ukumukoma. Pakuti yapusushe Yesu, avyazi yakwe Yesu yakuukile uku Ijipti pa nsita imwi. (Mate. 2:​13, 15) Fwandi umi wakwe Yesu pano nsi wapusiine sana na vino umi wakwe wali ukwi yulu.

5. I vyani vino Yesu waweni lino wali pano nsi, nupya ivyamucitikiile vyamwazwile uli ukuipekanya ukwizaya Simapepo Mukalamba? (Loliniko ni cikope.)

⁵ Lino Yesu wali pano nsi walolanga kuno antu yakucula. Uvwile vino cikauvwika ndi cakuti umuntu wino watemwa wafwa. Ukwaula nu kutwisika, kufwile kwali antu yano wamanyile afwile. Lino wasimikilanga, wazananga antu alwile tembwe, impafu, aali ivite, afwililwe ana, nupya yonsi yaa wayuvwilile uluse. (Mate. 9:​2, 6; 15:30; 20:34; Mako 1:​40, 41; Luka 7:13) Ica cumi ukuti Yesu walolanga kuno antu yaculanga lino wali ukwi yulu. Lelo lino wizile pano nsi ngu umuntu, wizile amanya vino cikauvwika ukucula. (Eza. 53:4) Vino Yesu waweni ni vyamucitikile vyalenzile amanye vino cikauvwika ndi cakuti antu yakucula. Wakwe vino caya uku antu yonsi, Yesu nawe kwene watontanga, kusakamikwa, alino nu kuya nu ulanda.

YESU UVWILANGA ANTU ULUSE

6. I vyani vino tungasambilila uku usesemo wakwe Ezaya uukalanda pali vino Yesu wali nu kuya ni cikuuku uku yantu? (Ezaya 42:3)

⁶ Lino Yesu waombanga umulimo wakwe uwa kusimikila, wayanga nu luse uku yantu yano yacitilanga iviipe. Wafikilizye usesemo uno Yeova walanzile ukupitila muli Ezaya. Umu Malembo aa Ciebele, yayo aya nu utailo ukome yayakolanya uku calo icakwata umuvundo nanti uku cimuti icikulu nupya icitali. (Masa. 92:12; Eza. 61:3; Yele. 31:12) Lelo aatakwata akuyazwa nupya yano yakacitila iviipe, yayakolanya ukwi tete ilifwampe nu kunyali iili umupiipi nu kuzima ivikaloleka kwati vitanga vyazwe umuntu. (Belengini Ezaya 42:3; Mate. 12:20) Yeova walenzile kasesema Ezaya ukuomvya ivilangililo vii ku kulanda pa kutemwa ni cikuuku vino Yesu wali nu kulanga uku yantu yano yauze yalolanga ukuti asile sile.

7-8. Uzye Yesu wafikilizye uli usesemo wakwe Ezaya?

⁷ Kalemba wi lyasi lisuma Mateo walangilile ukuti Yesu wafikilizye usesemo wakwe Ezaya lino walemvile ati: “Atalavuna itete ilifwampe, nupya atalazimya utambi uuli apiipi nu kuzima.” Yesu wacisile ivizungusho ivingi sana ivyazwile antu yano yacitilanga iviipe alino na yayo aatakweti upaalilo uwakuti ivintu vyali nu kuzipa umu umi wao. Pa yantu yaa pali nu monsi uwalwile tembwe. Umonsi wii afwile walolanga kwati ataali nu kupola alino nu kulaipakizya kuya pamwi na ya lupwa yakwe alino ni vyuza. (Luka 5:​12, 13) Nupya wazanyile umonsi na muze uwali ciulu nupya aatavwanganga ningo. Elenganyini vino wayuvwanga lino walolanga yauze yakulanda lelo asikuvwa vino yakuvwanga. (Mako 7:​32, 33) Lelo kuli na vyuze.

⁸ Umu manda yakwe Yesu, Ayuda aingi yazumile ukuti antu yaculanga pa mulandu ni membu zyao nanti imembu zya yavyazi yao. (Yoa. 9:2) Pa mulandu na vii vino antu yazumilemo, calenzile ukuti yalola aaculanga ukuti asile sile. Lelo Yesu wayapozizye nupya wayazwile ukumanya ukuti Leza waisileko sana mano. Uzye cii cikutusambilizya vyani pali vino Yesu akayuvwa pali sweswe ndakai?

9. Uzye ilembo ya Aebele 4:​15, 16 likalangilila uli ukuti Simapepo witu Mukalamba uwa kwi yulu akauvwila antu aatamalilika uluse?

⁹ Belengini Aebele 4:​15, 16. Tungasininkizya ukuti Yesu alatwalilila ukutulangulukilako. Uzye cii cikupiliula cani? Umuntu aakalangulukilako yauze akaya nu luse ndi cakuti walola yauze yakucula. Izwi lya Cigiliki lino yaomvya paa ilyakuti “kulangulukilako” likalozya uku kuvwa uyi nu ulanda pali vino umuntu muze akuyuvwa. Nupya umutumwa Paulo waomvizye izwi kwene lii ilya Cigiliki pa Aebele 10:34 pa kulangilila vino tukauvwila uluse aali umu cifungo. Malyasi aakalanda pa vizungusho vino Yesu wacisile yakalangilila ukuti uvwanga uyi yauze nga yakucula. Atapozyanga antu pa mulandu wakuti ali vino walinzile sile ukucita. Lelo waisileko sana mano nupya walondanga ukuyazwa. Wakwe, lino wapozyanga umonsi uwalwile tembwe, alonda nga wamupozizye ala ataimilila patali lelo wapalime nu kulema umonsi uwalwile tembwe, nupya uu ufwile wali ali muku wa kutandikilapo umuntu ukulema umonsi wii. Umu cikuuku Yesu wasenzile umonsi wii uku ncende ukutaali antu alino amupozya. Nupya lino Afaliseo yataali ni cikuuku uku mwanaci uwalapile nupya uwafuzile ingazo zyakwe Yesu na minsozi alino nu kumupukuta ni nyele zyakwe, Yesu wamucingilile nu kulungika Afaliseo. (Mate. 8:3; Mako 7:33; Luka 7:44) Fwandi tungalola ukuti Yesu ataasuzile antu alwile alino nacisile imembu izipishe. Lelo walondanga ukuti yaya kuli aliwe nupya wayalanganga ukutemwa. Fwandi tungasininkizya ukuti naswe kwene akatuvwila uluse.

MWAKOLANYA SIMAPEPO WITU MUKALAMBA NDAKAI

10. I vintu ci vino tungaomvya ndakai pakuti twazwe ya ciulu alino ni mpafu? (Loliniko ni vikope.)

¹⁰ Pa mulandu wakuti tukakolanya Yesu, tukalondesha ukulalanga ukutemwa ni cikuuku kuli yauze. (1 Pet. 2:21; 3:8) Nanti cakuti tutanga tupozye ya ciulu alino ni mpafu, tungayazwa ukusambilila pali Yeova nu kupalama kuli aliwe. Wakwe, impapulo izikalanda pali Baibo umu ndimi zyakwe ya ciulu akuno zili ukucila pa ndimi 100. Nupya pakuti impafu na aasilolekesha yaipakizya, kwaya impapulo izya vilembo vya mpafu alino na mavidyo umwaya amazwi aakulondolola ivikucitika ukucila umu ndimi 100. Vyonsi vii vikaazwa ya ciulu ni mpafu ukupalama sana kuli Yeova nu ku Mwanakwe.

11. Uzye iuvi lyakwe Yeova likakolanya uli vino Yesu wali ni cikuuku uku yantu yonsi? (Milimo 2:​5-7, 33) (Loliniko ni vikope.)

¹¹ Iuvi lyakwe Yeova likaezya na maka ukwazwa antu amisango yonsi. Iushini ukuti pa cisila cakuti Yesu watuutululwa, wapongolwile umupasi wa muzilo pa yantu yonsi alongiine pa kuzevya ukwaliko pa Pentekositi pakuti yonsi yanguvwa ilyasi lisuma, cila muntu “umu lulimi lwakwe.” (Belengini Milimo 2:​5-7, 33.) Iuvi itu likalondela utunguluzi wakwe Yesu, nupya ndakai likapanga impapulo izikalanda pali Baibo ukucila umu ndimi 1,000 nupya indimi zimwi pali zii zikalandwa sile na antu anono. Wakwe, indimi zimwi zikalandwa sile na antu anono aakaikala uku North nu ku South America. Nomba impapulo ukucila pali 160 zyapangwa umu ndimi zii pakuti antu aingi yanguvwa ilyasi lisuma. Impapulo zitu zyaya nu mu ndimi 20 izya Ina Roma. Antu aingi akavwanga indimi zii yatandika ukuombela Yeova.

12. I vyani na vyuze vino iuvi lyakwe Yeova likacita pa kwazwa antu ndakai?

¹² Ukulunda pa kwazwa antu ukuvwa ilyasi lisuma, iuvi lyakwe Yeova likaazwa na yayo aakacula pa mulandu na mazanzo aakuiponela. Na cii cikalenga aina na ya nkazi ukuipeelesha ukwazwa aina na ya nkazi aakulondekwa uwazwilizyo. Nupya iuvi litu likapanga ivikuulwa ivya kulonganilamo ivyangupale muno antu yangalonganila pakuti yangasambilila pali vino Leza wayatemwa.

SIMAPEPO WITU MUKALAMBA ANGAMWAZWA

13. Iinzila ci zimwi zino Yesu akatwazwilamo?

¹³ Nga kacema witu, Yesu akaika sana mano kuli vino tukalondekwa muli ukapepa. (Yoa. 10:14; Efes. 4:7) Insita zimwi tungatoovoka nu kulayuvwa kwati i nyali iili umupiipi nu kuzima. Limwi tungatoovoka pa mulandu nu kulwala, nanti pa mulandu na vino twaluvyanyizye, nanti limwi tusiuvwana na umwi umu cilongano. Cingatutalila ukwika mano uku vya ku nkoleelo ndi cakuti tukwika sile mano uku ntazi zino tukakwata ndakai. Mwaiusha ukuti Yesu akalola intazi zino mukakwata nupya akamanya na vino mukuyuvwa. Pa mulandu wakuti Yesu waya ni cikuuku kuli mwemwe, akalondesha ukumwazwa. Wakwe, angaomvya umupasi wa muzilo uku kumukomya lino mutakweti maka. (Yoa. 16:7; Tito 3:6) Nupya Yesu angomvya “ivya upe umu yantu” alino na ya kapepa yanji ku kumukomelezya alino nu kumwazwa.—Efes. 4:8.

14. I vyani vino tungacita ndi cakuti twatoovoka?

¹⁴ Ndi cakuti mwatoovoka, mwaiusha ukuti Yesu a Simapepo witu Mukalamba nupya mwaelenganya pali vino cii cikapiliula kuli mwemwe. Mwaiusha ukuti Yeova atatumile Yesu pano nsi ukuti aize apeele umi wakwe ngi lambo sile lelo wamutumile na pakuti amanye ningo intazi zino antu aatamalilika yakakwata. Ndi cakuti twatoovoka pa mulandu ni membu zitu nanti utonte witu, Yesu waiteyanya ukutwazwa “pa nsita ino tukulondekwa uwazwilizyo.”—Aeb. 4:​15, 16.

15. Landiniko pali vino vyazwile umwina umwi ukuwela umu cilongano.

¹⁵ Nupya Yesu akatungulula antu yakwe ukwazwa yayo afuma kuli Yeova pakuti yaswilile kuli aliwe. (Mate. 18:​12, 13) Elenganyini pali vino vyacitikile ya Stefano.b Pa cisila ca kufumiziwa umu cilongano pa myaka 12, yapingwilepo ukuzanwa uku kulongana. Yatiile: “Nanti cakuti citanjangukiile, nalondanga ukulaombela Yeova pamwi na ina na ya nkazi. Ya eluda yano twalanzyanyizye nayo yampokelile ningo. Insita zimwi nuvwanga kwati nasiile Yeova nupya nalondanga ukutoovoka. Lelo aina yanjiwisheko ukuti Yeova na Yesu yakalonda nazizimizya. Lino nawezile umu cilongano, yonsi umu cilongano yampokeliile kumwi nu lupwa lwane. Lino papisile insita, mamane wizile atandika ukusambilila Baibo nupya ndakai tukaombela Yeova pamwi. Simapepo witu Mukalamba akauvwa ningo ukulola kuno amu cilongano yonsi yakuombesha ukwazwa atiyalapila ukuwela kuli aliwe.

16. U mulandu ci uno mukataizizya pa kukwata Simapepo Mukalamba aakatulangulukilako?

¹⁶ Lino Yesu wali pano nsi, wazwanga antu aingi sana pa nsita ilinge. Na ndakai kwene tungasininkizya ukuti alatwalilila ukutwazwa lyonsi lino tukulondekwa uwazwilizyo. Nupya umu nsi ipya ili nu kuyako likwene, alaazwa antu aaya ni cuvwila ukuya amalilike. Tukataizya sana Leza witu Yeova uwaya nu kutemwa pa kusonta Umwanakwe ukuya Simapepo Mukalamba aakatulangulukilako.