CIPANDE CA KUSAMBILILAMO 47
LWIMBO NA. 38 Alamwazwa Ukuya Akome
“ Watemwikwa Sana”
“Watemwikwa sana.”—DAN. 9:23.
VINO TUMASAMBILILAPO
Ukwazwa yayo aakaelenganya ukuti yatacindama ukusininkizya ukuti Yeova wayatemwa nupya yacindama sana kuli aliwe.
1-2. I cani cingatwazwa ukusininkizya ukuti twacindama kuli Yeova?
APA yaomvi yakwe Yeova paya yamwi aakayuvwa ukuti Yeova ataayatemwa sana. Limwi icikalenga yayuvwa ukuti yataacindama, a pa mulandu na vino umwi wayacitiile. Uzye namwe mwatala mwayuvwapo vivyo? Ndi cakuti ivya musango uu vyamucitikilapo, i vyani vino mungacita pakuti musininkizye ukuti mwacindama kuli Yeova?
2 Cintu conga icingamwazwa, u kubelenga malyasi aaya muli Baibo pali vino Yeova akalonda twalola antu yauze. Yesu wacindike sana antu nupya wali ni cikuuku. Vino wacitanga vyalangililanga vino wene na Isi yacindika antu aakayuvwa ukuti yatacindama. (Yoa. 5:19; Aeb. 1:3) Umu cipande cii tumasambilila pali: (1) vino Yesu wazwile antu ukusininkizya ukuti yacindama na (2) vino tungasininkizya ukuti umu cumi twacindama kuli Yeova.—Hag. 2:7.
VINO YESU WAZWILE ANTU UKUSININKIZYA UKUTI YACINDAMA
3. Uzye Yesu walolanga uli Aina Galili aile kuli aliwe mu kuleenga uwazwilizyo?
3 Lino Yesu wasimikilanga umu Galili, antu aingi yayanga umu kukutika kuli aliwe nu mukupoziwa. Yesu walanzile pa yantu yaya ukuti “yaali atazyelwe wa mfwele izyaula kacema.” (Mate. 9:36) Intunguluzi zya mapepo zyalolanga antu yaya ukuti yatacindime akuti yaikako amano icakuti yayamanga nu kuti ‘yatipwa.’ Lelo Yesu walenzile yayuvwa ukuti yali acindame lino wayasambilizyanga alino nu kuyapozya. (Mate. 9:35) Alino pakuti aazwe antu aingi, wasambilizye atumwa yakwe ivya kuomba umulimo wa kusimikila nupya wayapeezileko na amaka ya kupozya alwale.—Mate. 10:5-8.
4. I vyani vino tungasambilila kuli vino Yesu wacindike yauze?
4 Vino Yesu wisile amano kuli yano yakutikanga kuli aliwe na vino wayacindike vyalangililanga vino wene na Isi yakaika amano kuli yano yakailola ukuti yatacindama. Ndi cakuti mukaombela Yeova lelo mukatwisika nga mwacindama, mwaelenganya pali vino Yesu wisile amano uku antu aicefye alondeshanga ukusambilila kuli aliwe. Ukucita vivyo kulamwazwa ukulola vino mwacindama kuli Yeova.
5. I vyani vino twamanya pa mwanaci wino Yesu wazanyile umu Galili?
5 Nupya Yesu wasambilizye antu alino nu kuyazwa cila muntu. Wakwe, lino wasimikilanga umu Galili wazanyile umwanaci uwaculanga ku ulwale wa kufuma uwazi pa myaka 12. (Mako 5:25) Ukulingana na Masunde, umwanaci wiya wali u mukowele nupya aliwensi uwamulema wali nu kuya umukowele. Fwandi insita izingi wayanga sile wenga. Nupya atapepelanga Yeova pamwi na antu yauze nanti lino kuli ukuzevya. (Levi 15:19, 25) Umwanaci wii waculanga pa mulandu nu ulwale nupya wayuvwanga nu kuti atacindiime.—Mako 5:26.
6. I vyani vino umwanaci wacisile pakuti apoziwe?
6 Umwanaci wii uwaculanga sana walondanga ukuti Yesu amupozye. Lelo ataile kuli Yesu umu kulungatika nu kumunena ukuti amupozye. U mulandu ci? Afwile uvwanga insonyi pa mulandu nu ulwale uno wakweti. Nanti limwi wasakamalanga ukuti Yesu amamuzinga pa mulandu wakuti wali u mukowele nupya ataalinzile ukuya pa yantu aingi. Fwandi waile alema uku cakuzwala cakwe Yesu pano wataile ukuti ukucita vii kwali nu kulenga apole. (Mako 5:27, 28) Nupya utailo uno wakweti walenzile ukuti apole. Lyene Yesu uzizye uwamulemile uku cakuzwala, umwanaci waile kuli aliwe nu kumunena ukuti u wamulemile uku cakuzwala. Uzye Yesu wacisile uli?
7. I vyani vino Yesu wacitiile umwanaci uwaculanga sana? (Mako 5:34)
7 Yesu wacindiike umwanaci wiya nupya wali ni cikuuku kuli aliwe. Waweni ukuti umwanaci wiya “uvwile intete.” (Mako 5:33) Fwandi wamulanzile icikuuku nupya wamukomelizye. Nupya wamwamile nu kuti “mwana we” izwi ilyalangililanga ukuti wali nu mucinzi nupya wali ni cikuuku kuli aliwe. (Belengini Mako 5:34.) Uu ali muku sile onga uno Yesu wamile umwaci ukuti “mwana we” muli Baibo. Afwile waomvizye izwi lii pa mulandu wakuti waweni ukuti umwanaci wiya wali sana ni ntete. Ukwaula nu kutwisika umwanaci afwile uvwile ningo! Vino wamunenyile vifwile vyamuteekizye nupya vyalenzile atuvwa uyi pali vino waile apaali antu aingi na vino wamulemile ku cakuzwala. Yesu walondanga ukumucitila na vyuze ukucila sile pa kumupozya. Walondanga amanye ukuti wacindime sana kuli Isi wakwe uwa kwi yulu.
8. Iintazi ci zino nkazi uwa ku Brazil wakweti?
8 Na ndakai kwene, aomvi yakwe Yeova yamwi yakalwalilila. Ya Mariaa ya painiya ya nsita yonsi aku Brazil yavilwe ukwaula makuulu ni ikasa lyonga. Yatiile: “Ilingi yansekanga uku sukulu pa mulandu na vino nalemala. Yangamanga mazina aipe. Nupya na amu lupwa yalandanga iviipe pali nene.”
9. I cani icazwile ya Maria ukumanya ukuti yacindama kuli Yeova?
9 I cani cazwile ya Maria? Lino izile iyaya Ya Nte Yakwe Yeova, aina na ya nkazi umu cilongano yayateekezyanga nu kuyazwa ukulailola wakwe vino Yeova akayalola. Yatiile: “Aina aingi na ya nkazi yangazwile. Nkataizya Yeova pa kumpeela ulupwa luu ulusuma umu cilongano.” Aina yaa na ya nkazi yazwile ya Maria ukumanya ukuti umu cumi yacindama kuli Leza.
10. Iintazi ci ino Maliya uwa ku Magadala wakweti?
10 Lolini vino Yesu wazwile umwanaci na muze, kuli kuti Maliya uwa ku Magadala. Iviwa 7 vyamucuzyanga. (Luka 8:2) Iviwa vyalenzile acita ivintu umu nzila ipusane, na cii calenzile antu yataapalama kuli aliwe. Lino waculanga sana, afwile wayuvwanga ukuti antu yataamutemilwe nupya kutaali uwa kumwazwa. Yesu wafumizye iviwa umu mwanaci wiya nupya wizile aya umulondezi wakwe. U mu nzila ci na yuze muno Yesu wazwile Maliya uwa ku Magadala ukumanya ukuti wacindime kuli Leza?
Uzye Yesu wazwile uli Maliya uwa ku Magadala ukumanya ukuti wacindime kuli Yeova? (Lolini mapalaglafu 10-11)
11. Uzye Yesu wazwile uli Maliya uwa ku Magadala ukumanya ukuti wacindime sana kuli Leza? (Loliniko ni vikope.)
11 Yesu wapeezile Maliya uwa ku Magadala ishuko lya kulapita pamwi nawe na asambi umu mulimo wa kusimikila umu mizi ipusanepusane.b Fwandi wakutikanga lino Yesu wasambilizyanga yauze. Nupya Yesu walolekiile kuli aliwe pa wanda uno watuutulwilwe. Wali pa yasambi ya kutandikilapo yano walanzile nayo pa wanda uwa. Yesu wamupeezile nu mulimo wa kuyanena atumwa yakwe ukuti watatuutululwa. Umu nzila zii zyonsi, Yesu wamwazwile ukumanya ukuti wacindime sana kuli Yeova.—Yoa. 20:11-18.
12. I cani icalenzile nkazi Lidia ayuvwa ukuti ataatemwikwa?
12 Wakwe vino cali kuli Maliya uwa ku Magadala, na ndakai kwene antu aingi yakayuvwa ukuti kutaya uwayatemwa. Nkazi Lidia uwa ku spain walanzile ukuti lino atatala wavyalwa, ya nyina yalondanga ukuponya inda. Lidia akaiusha ukuti na lino wali sile u munono, ya nyina yatamwikangako mano nupya yamunenanga amazwi aipe. Watiile: “Pa mulandu wakuti ya mayo yataantemilwe, nalondanga antu ukuntemwa nu kuya ya cuza yane. Nayuvwanga ukuti ntalinzile ukutemwikwa nu muntu aliwensi pano ya mayo yalenzile nayuvwa ukuti nene muntu umwipe.”
13. I vyani ivyazwile ya Lidia ukulailola ukuti yacindama kuli Yeova?
13 Pa cisila cakuti ya Lidia yasambilila icumi, ipepo, kuisambilizya Baibo alino na mazwi yano Aina Klistu yauze yayanenanga na vino yacitanga, vyalenzile yasininkizye ukuti yacindima sana kuli Yeova. Yatiile: “Insita izingi ya wane yakanena ukuti yantemwa sana. Lyonsi yakalanda pa miyele isuma ino nakwata. Vikwene ali vino na ya cuza yane yakacita.” Uzye mungelenganyako pali umwi aangalondekwa ukumwazwa ukusininkizya ukuti wacindama sana kuli Yeova?
VINO TUNGAILOLA WAKWE VINO YEOVA AKATULOLA
14. Uzye ilembo lyakwe 1 Samweli 16:7 lingatwazwa uli ukulalola antu wakwe vino Yeova akayalola? (Loliniko na kambokosi kakuti “U Mulandu ci Uno Antu Yakwe Yeova Yacindamila Kuli Aliwe?”)
14 Mwaiusha ukuti Yeova asimulola wakwe vino antu amu nsi yakamulola. (Belengini 1 Samweli 16:7.) Antu aingi yakalola ukuti umuntu wacindama ukulingana na vino akaloleka, impiya zino wakwata alino na masambililo yano wasambilila. (Eza. 55:8, 9). Fwandi mwaezya na maka ukulailola wakwe vino akamulola, asi vino antu amu nsi ii yakamulola. Mungabelenga malyasi amuli Baibo aakalanda pa yaomvi yakwe Yeova atwisikanga ukuti yatacindime wakwe Eliya, Naomi na Hana. Mungalembako na vimwi ivyamucitikila umu umi ivikalangilila ukuti Yeova wamutemwa nupya mwacindama kuli aliwe. Nupya mungalondelezyako nu mu mpapulo zitu api lyasi ilikalanda pali vino mwacindama.c
15. U mulandu ci uno Yeova walandiile ukuti Danieli “watemwikwa sana”? (Danieli 9:23)
15 Ucisinka winu walenga mucindame kuli Yeova. Pa nsita imwi ala kasesema Danieli ali ni myaka umupipi na 100, ‘watonsile sana’ nupya watoovwike. (Dan. 9:20, 21) Uzye Yeova wamukomelizye uli? Leza watumile malaika Gabilieli uku kwiushako Danieli ukuti “watemwikwa sana” nupya mapepo yakwe yaswikwe. (Belengini Danieli 9:23.) I vyani ivyalenzile Danieli atemwikwe kuli Leza? A pa mulandu wakuti wali u mulungami nupya wali na ucisinka. (Ezek. 14:14) Yeova walenzile ilyasi lii ukulembwa muli Baibo pakuti twateekeziwa. (Loma 15:4) Namwe kwene Yeova akakutika uku mapepo inu nupya wamutemwa pa mulandu na vino mwatemwa ukucita ivilungame alino na vino mukamuombela na ucisinka.—Mika 6:8 futunoti; Aeb. 6:10.
16. I cani icingamwazwa ukulalola Yeova ukuti a Tata uwaya nu kutemwa?
16 Mwalola Yeova ukuti a Tata winu uwamutemwa. Akalonda ukumwazwa, asi ukwika mano kuli vino mukaluvyanya. (Masa. 130:3; Mate. 7:11; Luka 12:6, 7) Ukwelenganya pali vii kwazwa sana antu aakailola ukuti yatacindama. Wakwe, elenganyini pali nkazi Michelle aakaikala uku Spain uwayuvwanga ukuti uwa sile sile pa mulandu na vino ya iya yamutumfyanga pa myaka iingi. Ya Michelle yatiile: “Ndi cakuti natandika ukuilola ukuti ntacindama, nkaelenganya ukuti Yeova watamfukatila nupya akundanga ukutemwa nu kulondesha ukuncingilila.” (Masa. 28:9) Nkazi Lauren uwa ku South Africa watiile: “Ndi cakuti Yeova wampalamike kuli aliwe pa mulandu nu kutemwa nupya watwalilila ukungazwa pa myaka yonsi yii nupya wambomvizye uku kusambilizyako yauze, ale akandola ukuti nacindama sana kuli aliwe.”—Ose. 11:4.
17. I vyani ivingamwazwa ukusininkizya ukuti Yeova wamutemwa? (Masamu 5:12) (Loliniko ni cikope.)
17 Mwasininkizya ukuti Yeova wamutemwa. (Belengini Masamu 5:12) Devedi wakolinye ukutemwa kwakwe Yeova uku “cisyangu icikalamba” icikacingilila antu yakwe. Ukumanya ukuti Yeova wamutemwa nupya akamwazwa, kungamicingilila ndi cakuti mwatandika ukwelenganya ukuti mutacindama. Mungamanya uli ukuti Yeova wamutemwa? Wakwe vino itulola, Yeova watupeela Baibo iikatunena vino akayuvwa pali sweswe. Nupya akaomvya ya eluda, ya cuza itu, alino na antu yauze uku kumwiushako ukuti mwacindama kuli aliwe. I vyani vino mulinzile ukucita ndi cakuti yauze yakulanda ivisuma pali mwemwe?
Tungata ukwelenganya ukuti sweswe asile sile ndi cakuti tukwiusha ukuti Yeova watutemwa (Lolini palaglafu 17)
18. U mulandu ci uno mulinzile ukuzumila ndi cakuti yamwi yalanda ivisuma pali mwemwe?
18 Ndi cakuti aamimanya nupya amitemwa yalanda ivisuma pali mwemwe, mutaakana. Mwaiusha ukuti Yeova angayaomvya ukumwazwa ukusininkizya ukuti wamutemwa. Ya Michelle yano itulandapo yatiile: “Panono panono natandike ukuzumila mazwi asuma yano yauze yanenanga. Cikantalila ukuzumila, lelo namanya ukuti vikwene ali vino Yeova akalonda incite.” Nupya ya eluda yazwa ya Michelle ukulola ukuti Yeova wayatemwa. Ndakai aa painiya nupya yakaazwilizyako imilimo ya pa Bethel uku ng’anda.
19. U mulandu ci uno tungasininkizizya ukuti twacindama kuli Leza?
19 Yesu walanda ukuti twacindama sana kuli Tata witu uwa kwi yulu. (Luka 12:24) Fwandi tungasininkizya ukuti twacindama kuli Yeova. Tutalinzile ukwilila icisinka cii. Nupya lekini tutwalilile ukwazwa yauze ukulailola ukuti yacindama kuli Leza.
LWIMBO NA. 139 Mwaelenganya Ukuti Muli Umu Nsi Ipya
a Asi mazina yao.
b Maliya uwa ku Magadala wizile aya pa yanaci apitanga pamwi na Yesu umu mulimo wa kusimikila. Anaci yaa yaomvyanga impiya zyao pa kusakamala Yesu na atumwa yakwe.—Mate. 27:55, 56; Luka 8:1-3.
c Wakwe, lolini icipande 24 umwi buku lyakuti Palimini kuli Yeova, umu Ciyemba ni Ciswahili, nupya mubelenge malembo na malyasi amuli Baibo aya pa mutwe wakuti “Kuitwisika” umwi buku lyakuti Malembo Aangazwa Aina Klistu.