Mwaleka Umupasi wa Muzilo Wamwazwa Ukutwalilila Ukuya Alemane
MUTUMWA Paulo wakomelizye Aina Klistu amu Efeso ukutwalilila ukuleka ‘umupasi wa muzilo walenga kuti yaye alemane. Ukwezya na maka ukutwalilila ukuya alemane, ukupitila mu kuya nu mutende kuli yauze.’—Efes. 4:2, 3.
Umupasi wa muzilo u walenga ukuti tuye alemane. Fwandi cii cikupiliula ukuti twalemana pa mulandu nu mupasi wa muzilo. Lelo wakwe vino Paulo walanzile, cikalondekwa ukuombesha pakuti tutwalilile ukuya alemane. Aaweni alinzile ukuombesha? Umwina Klistu wenga na wenga alinzile ukuombesha pakuti ukulemana kutwalilile.
Katulangilile. Tuti umwi wamupeela motoka ipya. Uzye a weni alinzile ukusininkizya ukuti ikuomba ningo? Icasuko i cimanyikwe. Mutanga mupeele umulandu uwamupeezile motoka ndi cakuti motoka wata ukuomba ningo pa mulandu nu kukanaisakamala ningo.
Umu nzila ili imwi kwene, ukulemana kuno twalemana uupe ukufuma kuli Yeova, lelo swensi wenga na wenga tulinzile ukusininkizya ukuti tukucingilila upe uu. Ndi cakuti tusiuvwana nu mwina nanti nkazi, tulinzile ukuyuzya ukuti, ‘Uzye nkwezya na maka pakuti umu cilongano mutwalilile ukuya umutende?’
MWAEZYA NA MAKA UKUTWALILILA UKUYA ALEMANE
Wakwe vino umutumwa Paulo walemvile, insita zimwi tungalondekwa ukuombesha pakuti umupasi wa muzilo watwazwa ukutwalilila ukuya alemane. Nupya cii cingalondekwa sana ndi cakuti umwina nanti nkazi wacita vimwi ivya kumisosha. Uzye a lyonsi lino mulinzile ukulanda nu muntu uwatamusosha pali vino mukuyuvwa? Asi lyonsi. Mungayuzya mweineco ukuti, ‘Uzye nga nacita vii, cimalenga intazi isile nanti alino imakulilako sile?’ Insita zimwi, icintu icampomvu cino tungacita u kusuulako sile nanti ukwelela umuntu uwatatuluvyanya.—Mapi. 19:11; Mako 11:25.
Mungayuzya mweineco ukuti, ‘Uzye nga nacita vii, cimalenga intazi isile nanti alino imakulilako sile?’
Wakwe vino umutumwa Paulo walemvile, lekini tutwalilile ‘ukulateekelelana umu kutemwa.’ (Efes. 4:2) Lupapulo lwa kulondelezyamo ivyeo lwalanzile ukuti amazwi yaa yangapiliula nu kuti “kuyapokelela ukulingana na vino yaya.” Cii cikupiliula ukuti tulinzile ukulaiusha ukuti aina na ya nkazi yakaluvyanya wakwe vino naswe kwene tukaluvyanya. Ukuya kwene tukaezya “ukuzwala untu upya.” (Efes. 4:23, 24) Lelo swensi kwene tutanga tucite vii wa yantu amalilike. (Loma 3:23) Ndi cakuti tukwiusha icisinka cii cilatwazwa ukuya ateekele nu kulaelelana, na cii cilalenga tutwalilile ukuya alemane.
Tulaya alemane mu cilongano ndi cakuti tukwelela yauze nu kwililako lino yatuluvyanya. Izwi lya Cigiliki ilyaomviwa pali Efeso 4:3 lyakolanako ni izwi ilyaomviwako pali Kolose 2:19 ilyakuti “mikole.” Mikole iikalenga mafupa ukuya alemenkane. Umu nzila ili imwi kwene, mutende nu kutemwa i vikalenga tutwalilile ukuya na ucuza upalamishe na ina na ya nkazi asi mulandu na vino yakatuluvyanya.
Fwandi ndi cakuti umwi watuluvyanya nanti ukucita vimwi ivya kutusosha, tulinzile ukumuvwikisha ukucila ukwika amano uku viipe vino watacita. (Kolo. 3:12) Pa mulandu wakuti swensi tutamalilika, naswe kwene pa nsita zimwi twacisilepo ivyasosizye yauze. Fwandi ukulaiusha icisinka cii kulalenga umupasi wa muzilo wamwazwa ukutwalilila ukuya alemane.