Ivingazwa Anaci Yano Yakacuzya
“Umu nsi yonsi, anaci alino na akazyana aingi yakucuziwa. Uzye vikwene i vikumucitikila namwe kwene? Manyini umulandu uno ukucingililwa kwa yanaci kwacindamila kuli Leza alino na vino alacita pali vino anaci yakacuziwa.”
Vikwene ali vino icipande cakuti “Kucingililwa Kwa Anaci—Vino Baibo Yalandapo” icaya pa jw.org cikalandapo. Apisika lya cipande cii pali linki ino mungatinikapo pakuti mucite daunilodi cipande cii, nupya mungapulinta api ifwa lino mungapeta wakwe ka tilakiti. Nkazi Stacy uwa ku United States watiile: “Napulinsile icipande cii nupya nemo na nkazi munji twatwazile kuno yasungilanga anaci yano maumi yao yaya umu uzanzo pa mulandu na vino yakayacuzya.”
Uwaombanga pa cikuulwa cii walenzile ndi cakuti tungatwala matlakiti na yauze pa cikuulwa cici. Fwandi ya nkazi yaili yatwazile matilakiti 40 kumwi nu tumakaadi twakwe jw.org utuli 30. Lino papisile insita, uwangalilanga icikuulwa walondanga ukuti ya Nte yakalange anaci vino isambililo lya Baibo likaya.
Ya Stacy na ya nkazi yauze yaili yaile pa cikuulwa cuze pano anaci yazumile ukupoka matilakiti 5 nupya yalenzile ukuti yakayatwalile na yauze. Umuomvi wenga pa cikuulwa cii watiile, “Tilakiti yii imaazwa anaci aya pano. Tukulondekwa ivyeo vii.” Lino ya nkazi yaswilile, anaci yamwi yalondanga ukumanya vino isambililo lya Baibo likaya, nupya yaili pa yanaci yaya yalanzile ukuti yangatemwa sana ukuzanwa umu kulongana.
Ya Stacy yatiile: “Twazungwike sana vino antu yali ni nsansa ukubelenga icipande cici. Twapulinsile alino nu kukapeta, nupya yii yali i nzila isuma iya kusimikila ilyasi lisuma. Twatemilwe sana ukulola vino antu yali ni nsansa ukupokelela ivyeo vivi nupya tuvwile ningo sana vino Yeova watwazwile ukusimikila ilyasi lisuma uku yantu yaya.