Mauzyo Yano Aakabelenga Yakauzya

I “pange” ci lino Yeova alalenga inko ukukwata uku nkoleelo?

Ilembo lya Kusokolola 17:​16, 17 lyalanda pa kutandika kwa ucuzi ukalamba ukuti: “Nupya impembe 10 zino watulola alino ni cilyanyi ca mu mpanga, vilapata cizelele nupya vilamupoka vyonsi nu kumusya tupu, nupya vilalya umwili wakwe nu kumoca wensi umu moto. Pano Leza wiika ipange lyakwe umu myenzo yao pakuti yafikilizye ipange lyakwe ukupitila umu kupeela uwene wao ku cilyanyi ca mu mpanga.” Mpiti, impapulo zitu zyalanzile ukuti “ipange” lino Yeova alalenga inko zikwate, i lyakonona imipepele ya ufi.

Lelo kukulondekwa ukusenuka. “Ipange” lino Yeova alalenga inko ukukwata i lya kupeela “uwene wao ku cilyanyi ca mu mpanga.” Pakuti tuvwikishe vino usesemo uu ulafikiliziwa, tumaasuka mauzyo yaa alondelelapo.

Aaweni aalumbulwa umu usesemo uu? “Cizelele” aakaamwa nu kuti “Babiloni Mukalamba” akaimililako imipepele ya ufi umu nsi yonsi. “Cilyanyi ciyenzu” ica mu mpanga, cikaimililako kaungwe ka League of Nations akapanzilwe umu 1919 kano ndakai yakaama ukuti United Nations. (Kuso. 17:​3-5) “Impembe 10” zikaimililako mauteeko yonsi aakatungilila icilyanyi ca mu mpanga.

Uzye cizelele ni cilyanyi iciyenzu ca mu mpanga vikauvwana uli? Cizelele ‘wikala’ pa cilyanyi ciyenzu ica mu mpanga, icikapiliula ukuti akacitungilila nu kwezya ukucitungulula.

I vyani ivilacitikila cizelele? Cilyanyi ica mu mpanga ni mpembe 10 izikacitungilila, “vilapata cizelele.” Pa kulangilila ukuti ivimupata, vilamupoka ivyuma vyakwe nu kusokolola iviipe vino akacita. Nupya yalamonona ukulingana na viivi kwene vino Yeova walanda ukuti i vilacitika. (Kuso. 17:1; 18:8) Yii ilaya ali mpela ya mipepele ya ufi. Lelo lino vii vitatala vyacitika, Yeova alalenga inko ukucita icintu icitatala cacitikapo.

I vyani vino Yeova alalenga inko ukucita? Alika “ipange lyakwe” umu myenzo ya mpembe 10, kuli kuti ipange ilya kupeela “maka ni nsambu zyao izya kuteeka uku cilyanyi [iciyenzu] ca mu mpanga,” kuli kuti kaungwe ka United Nations. (Kuso. 17:13) Elenganyini vino cii cikupiliula. Uzye mauteeko yalaipingwilapo sile aineco ukupeela icilyanyi ica mu mpanga amaka? Awe foo. Usesemo ukalangilila ukuti Leza umwineco aliwe alalenga ukuti yacite vivyo. (Mapi. 21:1; loliniko na Ezaya 44:28.) Uzye vii vilatandika ukucitika panono panono? Awe foo. Ukusenuka kuu kulacitika ukwaula ukwenekela. Lyene icilyanyi ica mu mpanga cilonona imipepele yonsi iya ufi.

I vyani lyene vino tukwenekela ukucitika uku nkoleelo? Tutalalondekwa ukuvwa kuli ya kalemba ya malyasi ukuti mauteeko iyatandika panono panono ukutungilila akaungwe ka United Nations. Vino tulinzile ukwenekela i vyakuti: Umu kupumikizya Yeova alalenga amauteeko ukupeela akaungwe ka United Nations amaka. Lino vii vilacitika, tulamanya ukuti ucuzi ukalamba uli umupipi nu kutandika. Fwandi ndakai “lekini tutwalilile ukulola nu kuya na mano” pano likwene sile ivintu vyasha visenuke ukwaula ukwenekela.—1 Tesa. 5:6