TWALILILINI UKUYA AITEYANYE!

Mipepele ni Nkondo Uku Ukraine—Uzye Baibo Ikalandapo Uli?

Uvwini ivyeo ivikulanda pa ntunguluzi zya mapepo izyamanyikwa sana alino na pa nkondo uku Ukraine:

“Umukalamba wi Ceici ca Orthodox ku Russia, Patriarch Kirill atalandapo ivili vyonsi pali vino Aina Russia yazanza Aina Ukraine . . . . Amwi ceici lyakwe yatwalilila ukulanda malyasi ya ufi pa Ina Ukraine nupya Putin akuomvya malyasi kwene yayo pa kulenga inkondo itwalilile.”—EUobserver, Maaci 7, 2022.
“Patriarch Kirill . . . watungilila sana vino Aina Russia yazanza umusumba wa Ukraine lino akalanda ukuti ulwi uu iinzila imwi iya kucimvizyamo uluyembu.”—AP News, Maaci 8, 2022.
“Umukalamba wi Ceici ca Orthodox, Metropolitan Epiphanius I uwa ku Kyiv, wapaazile antu yakwe pa Mande pakuti ‘yakalwisyanye na Ina Russia aazanza impanga’ . . . walanzile nu kuti ukukoma asilika Aina Russia asi luyembu.”—Jerusalem Post, Maaci 16, 2022
“Swemo [kaungwe kakuti Ukrainian Council of Churches and Religious Organizations (UCCRO)] tukutungilila Asilika ya ku Ukraine na yonsi aakwazwilizyako, tukuyapaala pali vino vino yakucingilila Aina Ukraine uku yalwani yao nupya tukuyapepelako.”—Vino ya UCCROa Yalanzile, Febuluwale 24, 2022.

Uzye mukwelenganyapo uli? Uzye amu mipepele aakalanda ukuti yakalondela Yesu Klistu yalinzile ukukomelezya antu yao ukuya uku nkondo? Uzye Baibo ikalandapo uli?

Malyasi aakalanda pali vino amu mipepele yatungililanga inkondo mpiti

Amalyasi ya mpiti yakalangilila ukuti ilingi amu mipepele yakazumilizya, ukutungilila nanti sile ukulenga kuye inkondo, kuu ala yakuloleka kwati yakapanga umutende. Pa myaka iingi, ya Nte Yakwe Yeova yazwa antu ukumanya ukuti vino amu mipepele yakacita uusomvi. Lekini tulande pali vimwi ivikazanwa umu mpapulo zitu.

Icipande icatangi “Iceici Cakwe ya Katolika Umu Africa” calondolwile vimwi ivyalangililanga vino imipepele yavizilwe ukulesya inkondo nu kukomoola antu.
Icipande icatangi “Uzye Imipepele I Yalenga?” calondolwile ukuti ya simapepo amu Katolika, mwi ceici ca Orthodox ni ca Protestant yatungilila inkondo izingi uku mbali zyonsi zyoili.

Uzye imipepele ya Ina Klistu ilinzile ukutungilila inkondo?

Vino Yesu wasambilizye: “Uwatemwa umuzo wakwe vino waitemwa.” (Mateo 22:39) “Mwatemwa alwani inu.”—Mateo 5:44-47.

Elenganyini pali vii: Uzye amu mipepele yangalanga ukuti yakauvwila masunde yakwe Yesu aakalanda pa kutemwa lino pa nsita ili yonga kwene yakukomelezya antu yao ukukoma yauze umu nkondo? Pakuti muzane icasuko, belengini icipande cakuti “Mipepele ya Cumi ni Nkondo” ni cakuti “Uzye Cingacitika Ukutemwa Alwani Itu?”

Vino Yesu walanzile: “Uwene wane usi wa pano nsi. Ndi cakuti Uwene wane iuya uwa pano nsi, aomvi yane ngi iyalwa pakuti ntapeelwa uku Yayuda.” (Yoani 18:36) “Yonsi aakaomvya ulupanga yalafwila uku lupanga.”—Mateo 26:47-52.

Elenganyini pali vii: Ndi cakuti Aina Klistu yafizilwe ukulwa pakuti sile yacingilile Yesu, uzye yalinzile ukulwa pa milandu yuze? Belengini cipande cakuti “Uzye Inkondo Yalemana nu Wina Klistu?” pakuti mulole vino Aina Klistu ya kutandikilapo yatwalilile ukuya acisinka lino yalondelanga vino Yesu wacitanga na vino wasambilizyanga.

I vyani vilacitikila imipepele iikatungilila inkondo?

Baibo ikasambilizya ukuti Leza akakana imipepele iikalanda ukuti ikaimililako Yesu lelo iisilondela vino wasambilizyanga.—Mateo 7:21-23; Tito 1:16.

Ibuku lya Kusokolola likalangilila ukuti Leza akalola ukuti imipepele iyo i yalenga imfwa zya yantu “yonsi akomilwe pano nsi.” (Kusokolola 18:21, 24) Pakuti mumanye umulandu, belengini icipande cakuti “Uzye Babiloni Mukalamba A Weni?”
Yesu walangilile ukuti imipepele yonsi ino Leza wakana ilononwa pa mulandu ni viipe vino ikacita, wakwe viivi kwene vino umuti uwipe uukaseeka ivizao iviipe “ukakomwa nu kusumbilwa umu moto.” (Mateo 7:15-20) Pakuti mumanye vino vivyo vilacitika, belengini icipande cakuti “Impela ya Mipepele ya Ufi Yatipalama.”

Ya Nte Yakwe Yeova Yapusanako

Wakwe vino caya umu nsi yonsi, ya Nte Yakwe Yeova amu Russia nu mu Ukraine, yakalondela masunde yakwe Yesu aakalanda pa kukanaika umu vya miteekele nu kukanalwako inkondo. Cikwene i calenga tutalwako nanti ukutungilila inkondo ii nanti zyuze. Pa mulandu wakuti tukalondesya ukutwalilila ukulondela vino Baibo ikalanda, ya Nte yamwi yakayacuzya. (Yoani 15:19, 20; 2 Timoti 3:12) Wakwe, uteeko wa ku Russia wanyepa ya Nte aingi umu vifungo nu kucuzya sana yamwi. Wapoka ni vikuulwa vitu vya kupepelapo. Pakuti mumanyilepo na vyuze, yangini pa www.jw-russia.org.

Tambini vidyo ya mamineti 4 iyakuti Ya Nte Yakwe Yeova Umu Irkutsk Yatwalilila Ukuya ni Cisinka Asi Mulandu nu Kuyazanza Umu Mang’anda Yao pakuti mulole vino ya Nte Yakwe Yeova yakuyacuzya umu Russia pa mulandu nu utailo wao.
Ya Nte Yakwe Yeova yamanyikilwa uku kukanaika umu vya mu nsi pa myaka iingi. Tambini vidyo yakuti Yatwalilile Ukuya Asipe Lino Yayacuzyanga pakuti mulole vino yatwalilile ukukanaika umu vya mu nsi asi mulandu na vino uteeko wa ku Germany uwa Nazi nu uteeko wa Soviet Union uwaliko wayacuzyanga sana.

Yangini pa webusaiti itu pakuti mumanye ivingi pali vino twazumilamo ukwikako sile nu ulayo wa muli Baibo uwakuti uku nkoleelo kutalaya inkondo. (Ezaya 2:4; Yelemiya 29:11) Tukumukomelezya ukuti mukatutumile pakuti mukamanyilepo na vyuze.

Photo credits, ukufuma kuli cimani ukuya kuli ndilo: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a Mu kaungwe ka UCCRO, nanti Ukrainian Council of Churches and Religious Organizations, mwaya maceici 15 aakaimililako ya Orthodox, ya Katolika Aagliki na Aina Loma, ya Protestant, maceici yakwe ya Evangelical alino na Ayuda na ya Mozilemu.