TWALILILIINI UKUYA AITEYANYE!
Uzye Baibo Yalandapo Uli pa Kupepa Ivilubi?
Kulingana ni lyasi ilyasimikwe na kaungwe akakalemba malyasi pali ya Katolika (Catholic News Service), pa kuzevya ukwali mu St. Peter’s Basilica pa 25 Maaci 2022 Papa Francis wimilile pa cinkolanya cakwe Maliya, lyene “winime nu kupepa ipepo lya mu mwenzo.” “Walenzile umutende kuli Maliya.” Ilyasi lilyo lyalanzile nu kuti “Papa wapefile nu kuti antu, maka maka aina Russia na ina Ukraine, iikale mu mwenzo wakwe Maliya.”
Mwemo mukutuuli? Uzye caya sile ningo ukupepa uku vilubi nanti ukuviomvya pa kupepa? Lolini vino Baibo yalandapo:
“Mutaipangila tuluwi mu unkolanya wa cintu icili consi ca mwiyulu nanti camu nsi nanti camu manzi pansi ya musili. Mutafukamila unkolanya wakwe tuleza nanti kutupepa. Pano ne Yawe Leza winu, nsizumilizya kuti mwapepa tuleza tuze.”—Kufuma 20:4, 5.a
“Yene tuleza twao utuluwi twakwe siluva nu twakwe zaabu, tuto utwapangwa ni minwe ya antu. Utulomo twene twakwata, lelo tusivwanga foo, amanso nayo kwene twakwata, lelo tusilola foo, amatwi nayo kwene twakwata, lelo tusiuvwa foo, iminwe nayo twakwata, lelo tutange tuleme cimwi foo, amaulu nayo twakwata, lelo tutange tupite foo, nanti sile icilulumo ciizwi lyatuko, cisiuvwika foo. Antu yano yatupanga, nu kutuceceta nayo kwene yalingana mano nato.”—Masamu 115:4-8.
“Nene indi Yawe, lilyo lili zina lyane. Ntalapa ululumbi lwane kuli wiyo ali wensi. Ukulumbanyiziwa ukulinzile nene, ntalazumilizya kuti kupelwe nu ku tuluwi.”—Ezaya 42:8.
“Utukini uku kupepa ivilubi.”—1 Kolinto 10:14.
“Mwataluka ku vilubi.”—1 Yoani 5:21.
Pakuti mumanyilepo na vyuze pali vino Baibo ikalanda pa kuomvya ivinkolanya pa kupepa, belengini icipande icikuti “Vino Baibo Ikalandapo pa vilubi” nanti tambini vidyo yakuti Uzye Leza Akazumilizya Ukuomvya Ivinkolanya Lino Tukupepa?
Mungatemwa nu kumanya vino Baibo ikalanda pa mauzyo akuti:
Kutaizya aineco ya vikope: Vincenzo Pinto/AFP via Getty Images
a Izina lyakwe Leza a Yeova. (Masamu 83:18) Lolini icipande icikuti “Uzye Yeova A Weni?”