Antu 6 Milyoni Iyafwa Kuli COVID—I Vyani Vino Baibo Yalandapo?

Kaungwe kano yakaama ukuti World Health Organization (WHO), kalanzile ukuti ukufika pa 23 Mei, 2022, antu 6.27 milyoni iyafwa pa mulandu nu ulwale wakwe COVID-19. Lelo pa 5 Mei, 2022, aa mu kaungwe kaa yamanyisyizye ukuti antu aingi sana yalafwa pa mulandu nu ulwale uu. Yalanzile ukuti mu mwaka wa 2020 na 2021, antu aafwile pa mulandu nu ulwale wakwe COVID-19 na yayo aafwile ku ulwale kwene uu lelo ala yalwala ni ndwala zyuze, limwi yafisile kuli 14.9 millyoni. Uzye Baibo yalandapo ivili vyonsi pa ndwala izya musango uu?

Baibo yasoowile ukuti kulaya indwala izipisye

• Yesu wasoowile ukuti kulaya ivikuko nanti “indwala izipisye” mu nsita ikaamwa ukuti “manda akusyalikizya.”—Luka 21:11, Contemporary English Version; 2 Timoti 3:1.

Vino Yesu wasoowile vikufikiliziwa ndakai. Pakuti mumanyilepo na vyuze, belengini cipande cakuti “I Vyani Vikalangilila ‘Manda ya Kusyalikizya’ Nanti ‘Insita ya Mpelelekezyo’?”

Baibo ikatuteekezya

•  “Leza aakateekezya . . . aakatuteekezya umu macuzi itu yonsi.”—2 Kolinto 1:3, 4.

Aingi afwilwa atemwikwa yao yakateekeziwa na malyasi aaya muli Baibo. Sambililini na vyuze mu cipande cakuti “Kuzizimizya Lino Muli nu Ulanda—Vino Mungacita Ndakai” ni cakuti “Inzila Isuma Sana Iingavwa Ati Yafwilwa.”

Baibo yasokolola icilafumyapo intazi manda pe

•  “Uwene wako wize. Kulonda kwako kucitike pano nsi nu kwi yulu.”—Mateo 6:10.

Likwene sile “Uwene wakwe Leza” wasya ucitepo cimwi pakuti kutakaye “umwikazi wa mu mpanga alati: ‘Nindwala.’” (Mako 1:14, 15; Ezaya 33:24, New World Translation) Pakuti musambilile pa wene uu wa kwi yulu na vino ulacita, tambini vidyo iyakuti Uzye Uwene Wakwe Leza I Cani?

Tukumulenga ukuti musambilile na vyuze pali vino Baibo yalanda pakuti mwemo nu lupwa lwinu mungaipakizya ukupanda mano ukusuma na malayo aaya muli Baibo.