Inkondo Iili Uku Ukraine Itilenga Kuye Ukuulizya Sana Ivyakulya Umu Nsi Yonsi

Pa 19 Mei, 2022, akaungwe kano yakati United Nations Security Council kapokelile lipoti ukufuma uku yaomvi aakalamba aa mu uteeko umu ncende ukucila pali 75 ukuti: “Ivyakulya umu nsi vyacepa pa mulandu nu ulwale uwipisye wakwe COVID-19 nu kusenuka kwa miceele, nupya inkondo iili uku Ukraine itilenga vicepeleko sana, icakuti umu ncende zimwi zyene mumaya icipowe.” Lino papisile insita inono, umwi uwasambilila sana pa vya ma bizinesi na pa mpiya walanzile ukuti, “pa mulandu ni nkondo, intazi iziliko muno nsi zyakulaya zikuvulilako sile icakuti na antu aingi yalaikala sile ni nzala.” Baibo yasoowile ukuti kulaya ukuulizya ivyakulya umu manda yaa yano tulimo, lelo ikatwavwa ukumanya vino tungacita nga twakwata intazi iyo.

Baibo yasoowile ukuti kulaya ukuulizya ivyakulya

•  Yesu wasoowile ukuti: “Uluko lulakatukila uluko luze nu wene ulakatukila uwene uze, nupya kulaya ivipowe.”—Mateo 24:7.

•  Ibuku lya Kusokolola lyalanda pa onsi 4 aakwela pa mfwalasi. Umonsi wenga pa yonsi yayo akaimililako inkondo. Lyene palondelilepo umonsi muze aakaimililako icipowe, kuli kuti insita ino ivyakulya vilatala sana ukukwata nupya lino vilakoma umutengo. “Nupya naweni imfwalasi itifi nu wakwezilepo walemile ivya kupimilako viili umu minwe. Nuvwile icuvwikanga wi zwi . . . Ala cikuti: ‘Cipimo ca ngano conga pali dinali wenga [kuli kuti ulupiya luno umuntu walipilwanga nga waomba uwanda onga] ni vipimo vyakwe baale vitatu pali dinali.’”—Kusokolola 6:5, 6.

Masesemo aakalanda pa kuulizya ivyakulya yakufikiliziwa umu manda yaa yano Baibo ikaama ukuti “manda akusyalikizya.” (2 Timoti 3:1) Pakuti musambilile ivingi pa “manda akusyalikizya” na pa onsi 4 akwela pa mfwalasi, mukatambe vidyo iyakuti Vintu mu Nsi Vyasenuka Ukufuma Umu 1914 nupya mukabelenge ni cipande cakuti “Aonsi Yani Akwela pa Mfwalasi—Aaweni?”

Vino Baibo Ingamwazwa

•  Muli Baibo mwaya ukupanda mano ukungatwazwa ukuzizimizya intazi zipusanepusane, ukwikako nu kukoma kwa mitengo ya vyakulya nanti sile ukuulizya ivyakulya. Lolini vimwi vino tungacita umu cipande cakuti “Vino Mungacita Nga Mukweti Sile Impiya Izinono Zya Kuomvya.”

•  Nupya Baibo ikatwazwa ukuya nu upaalilo uwakuti vintu vilazipa. Yalaya ukuti kulaya insita lino umu mpanga “mulaya ingano izingi” nu kuti antu yonsi yalakwata ivyakulya ivingi. (Masamu 72:16, NWT.) Pakuti musambilile ivingi pa upaalilo uno Baibo ikatwazwa ukukwata pa vilacitika uku nkoleelo nu mulandu uno mungatailila vino yalanda, mukabelenge icipande cakuti “Upaalilo Uwa Cumi Uwakuti Vintu Vilazipa Uku Nkoleelo.”