I Vyani Vino Baibo Ikalanda pa Kupikoola Antu Ukukacitika Umu Masukulu?

Pa 24 Mei , 2022 icintu cimwi ca ulanda sana cacitiike umwi tauni linono ilya Uvalde, Texas, ku U.S.A. Nyuzipepa imwi iya ku New York yalanzile ukuti “umonsi umwi uwakweti imfuti wapisile ana anono 19 na ya mwalimu yaili . . . api sukulu lya Robb Elementary.”

Ica ulanda i cakuti ivintu vya musango uu iviipisye vikucitika sana. Nyuzipepa ino yakati USA Today yalanzile ukuti umu United States sile, “umwaka uwasizile yapikozile antu 249 apa sukulu, kuli kuti ali mwaka uno yapikozile sana antu pa sukulu ukucila imyaka yonsi ukufuma umu 1970.”

U mulandu ci uno ivintu vii viipisye vikacitikila? Tungacita uli pakuti tuzizimizye ivintu vii viipisye? Uzye kwaya ivili vyonsi vingalenga tusininkizye ukuti unkalwe ulasila? Baibo ikaasuka mauzyo yaa.

U mulandu ci uno umu nsi imuvulila sana unkalwe?

•  Baibo ikalondolola amanda yano tukwikalamo ukuti “manda akusyalikizya” umwaya antu aingi “aataya nu kutemwa” nupya “aankalwe” aakacita ivintu iviipisye. Antu ya musango uwo “yalatwalilila ukwipilako sile.” (2 Timoti 3:1-5, 13) Nga mukulonda ukumanyilapo na vyuze, belengini cipande ca kuti “Uzye Baibo Yalandiile Limwi Vino Antu Yakaelenganya nu Kucita Ndakai?”

Antu aingi yakayuzya aineco ukuti, ‘U mulandu ci uno Leza asilesezya iviipe ukucitika wakwe ukupikoola antu pa masukulu?’ Pakuti mumanye vino Baibo ikaasuka, belengini cipande cakuti “U Mulandu ci Uno Ivintu Iviipe Vikacitikila Antu Aasuma?”

Tungacita uli pakuti tuzizimizye ivintu vii viipisye?

•  “Ivyalemvilwe mpiti, vyalemvilwe uku kutusambilizya, pakuti ukupitila umu kuzizimizya nu mu kuteekeziwa ukukafuma umu Malembo tuye nu upaalilo.”—Loma 15:4.

Ivisinte vya muli Baibo vingamwazwa ukuzizimizya umu nsi ii umwaya unkalwe. Pakuti mumanyilepo na vyuze belengini Zyukini! iyatangi “Uzye Unkalwe Ulatala Usile?”

Pakuti mumanye vino avyazi yangacita pakuti yazwe ana yao ukuzizimizya pa malyasi aakutiinya yano yakalola nu kuvwa, belengini icipande cakuti, “Ana Inu na Malyasi ya Kutiinya.”

Uzye unkalwe ulatala usile?

•  “Amayapokololanga kuli yayo akuyacuzya nu kumpanzela.”—Masamu 72:14.

•  “Antu yayo yalasula malupanga yao kuti yaye amase, nga na masumo yao kuti yaye mipeni yakutungwilila. Antu amu nko zivule yatalatala yalwe inkondo, nanti ukuiteyanya ku kulwa ulwi nupya.”—Mika 4:3.

Leza alacita vino antu yatange yacite. Uwene wakwe uwa kwi yulu ulonona ivyanzo vyonsi nu kufumyapo unkalwe wa misango yonsi. Pakuti mumanyilepo na vyuze pali vino Uwene Wakwe Leza ulacita, belengini icipande cakuti “Umu Wene Wakwe Leza ‘Umutende Ulayako Insita Yonsi.’”