Amu Mapolitiki Yacelula Antu Ukuti Kwasya Kuye Amagedoni—Uzye Baibo Yalandapo Uli?

Pa Mande pa 10 Okotoba 2022, Aina Russia yatumile amabomu aipisye umu misumba ya mu Ukraine, pa mulandu na vino mabomu aipisye yononyile ulalo uwalemanya incende ya Crimea ni mpanga ya Russia manda yaili uku cisila. Vii vyacitike pa cisila ca manda anono ukufuma pano amu mapolitiki yamwi yacelwilile antu ukuti kwasya kuye Amagedoni.

• Pa 6 Okotoba 2022, Joe Biden, Kateeka wa ku U.S. walanzile ukuti: “Ukufuma pano kwayelile vimvulunganya ivyakasi vitungulule uku kuomvya mabomu ya manyukiliya ivyali pa mpanga iya Cuba na John F. Kennedy uwateekanga umu U.S, kutatala kwacitika na vyuze ivya musango uwo ivikalangilila ukuti Amagedoni ili umupiipi. Nkulola ukuti mabomu ya manyukiliya yatange yaomviwe sile ukwaula ukuleta Amagedoni.”

• Pa 8 Okotoba 2022 lino aku mulabasa wa BBC yuzizye Volodymyr Zelensky Kateeka wa ku Ukraine pali vino vingacitika ndi cakuti mabomu ya manyukiliya yaomviwa, walanzile ati: “Nani nkuzumilizya ukuti kungaya Amagedoni nupya insi yonsi ingaya umu uzanzo.”

Uzye ukuomvya mabomu ya manyukiliya kulaleta Amagedoni? Uzye Baibo yalandapo uli?

Uzye ukuomvya mabomu ya manyukiliya kulaleta Amagedoni?

Awe. Izwi lyakuti “Amagedoni” likazanwa sile umuku onga muli Baibo pali Kusokolola 16:16. Lisilozya uku nkondo zino antu yakalwa, lelo likalozya uku nkondo ilaya pali Leza na “ya mwene yonsi aya pano nsi.” (Kusokolola 16:14) Leza alaomvya Amagedoni pa kufumyapo mauteeko ya yantu.—Danieli 2:44.

Pakuti mumanyilepo na vyuze pali vino ivintu vilaya umu nsi lino kulaya Amagedoni, belengini icipande cakuti Uzye Inkondo ya Amagedoni Ali Cani?

Uzye inkondo ya manyukiliya ilonona insi na antu aikalamo?

Awe. Nanti cakuti ya kateeka antunze yangaomvya mabomu ya manyukiliya uku nkoleelo, Leza atalaleka insi ukononwa. Baibo ikati:

• “Insi ilatwalilila ukuyako manda pe.”—Kasambilizya 1:4, NWT.

• “Antu aololoke yalikala umutende umu mpanga, nu kuipyana umuyayaya.”—Masamu 37:29.

Nomba, masesemo amuli Baibo ni vikucitika vikulangilila ukuti vintu vyasya visenuke sana umu nsi. (Mateo 24:3-7; 2 Timoti 3:1-5) Pakuti mumanye na vyuze pali vino Baibo ikalanda pali vino vilacitika uku nkoleelo sambililini Baibo uwila sile.