Milandu Yakuyela nu Upaalilo Umu 2023—Uzye Baibo Yalandapo Uli?

Lino mwaka wakwe 2023 ukutandika, swensi kwene tukwenekela ukuti ivintu vilatuzipila pamwi na yalupwa itu. U mulandu ci?

Baibo ikatupeela upaalilo

Muli Baibo mwaya ilyasi ilisuma ilyakuti intazi zyonsi zino tukakwata ndakai i zya pa kasita sile nupya likwene sile zili nu kufumiziwapo. Alino ivyaya muli Baibo “vyalemvilwe uku kutusambilizya, pakuti ukupitila umu. . . kuteekeziwa ukukafuma umu Malembo tuye nu upaalilo.”—Loma 15:4.

• Pa kuti mumanye amalayo na yauze amuli Baibo, belengini icipande icakuti “Upaalilo wa Cumi pa Visuma Ivilacitika Uku Nkoleelo.”

Upaalilo uungamwazwa ndakai

Upaalilo wa muli Baibo waya “wa nanga apasintilila umi witu.” (Aebele 6:19) Upaalilo uu ukatuteekezya. Ungatwazwa ukuzizimizya intazi, ukuya ni myelenganyizizye isuma, nu kuya ni nsansa ndakai alino nu ku nkoleelo. Wakwe:

• Lolini vino Baibo yazwile umonsi umwi ukuta ukumwesya uwengwa. Tambini vidyo iyakuti Ntaatemilwe Umi Uno Nikalilangamo.

• Lolini vino upaalilo wa muli Baibo ukatwazwa lino wino twatemwa wafwa. Tambini vidyo iyakuti Ivingateekezya Aafwilwa.

Mwakomya upaalilo winu

Antu aingi yakaenekela ivintu ivisuma ukucitika, nomba yatasininkizya ndi cakuti vintu vivyo vilacitika. Vino Baibo yalaya vyapusanako. U mulandu ci? Apa mulandu wakuti amalayo aya muli Baibo yafuma kuli Yeova Lezaa, “aatanga abepe.” (Tito 1:2) Yeova sile u wakwata amaka akufikilizya vyonsi vino walaya; angacita ‘vyonsi vino akulonda ukucita.’—Masamu 135:5, 6.

Tukumukomelezya ukuti mwaipakizya amalayo asuma aya muli Baibo aakatupeela upaalilo. Mungataila malayo yaa ndi cakuti ‘mukulondelezya sana umu Malembo.’ (Milimo 17:11) Pakuti mumanyilepo na vyuze, tandikini ukusambilila Baibo naswe uwila sile. Tandikini umwaka wa 2023 nu upaalilo wakuti ivintu vilazipa uku nkoleelo.