U Mulandu ci Uno Musizevezya Isita?
Ivya ufi vino antu yakaelenganya
Ufi: Ya Nte Yakwe Yeova yasizevya Isita pano asi Ina Klistu
Icumi: Twazumila ukuti Yesu Klistu ali Katuula witu, napya tukaezya ukulondela umu “ntampulo zyakwe.”—1 Petulo 2:21; Luka 2:11.
Ufi: Mutazumila ukuti Yesu Klistu wazyukwike ukufuma uku yafwe.
Icumi: Twazumila ukuti Yesu wazyukwike; napya twamanya ukuti cacindama sana kuli yonsi aya nu utailo ukuzumila cii, nupya cikwene ali cino tukalanda lino tukusimikila.—1 Kolinto 15:3, 4, 12-15.
Ufi: Musisakamala nu kuti ana inu yakapuswako lino auze yakuzanga pa wanda wako Isita.
Icumi: Twatemwa ana itu, napya tukaombesya ukuyasambilizya nu kuyazwa pakuti yaye ni nsansa.—Tito 2:4.
U mulandu ci uno ya Nte Yakwe Yeova yasizevezya Isita?
Ukuzevya Isita kutafuma muli Baibo.
Yesu walanzile ukuti tufwile twaiusya imfwa yakwe, asi ukuzyukuka kwakwe. Cila mwaka tukaiusya umuku onga imfwa yakwe Yesu, napya tukakonka uwanda kwene uwalondololwa na muli Baibo.—Luka 22:19, 20.
Twamanya ukuti atandike ukuzevya Isita aantu ali nu lutambi lwa kuzevya kwa uvyazi, fwandi cikwene i calenga nu kuti Yeova apate imizevezye ya musango uwo. Yeova akalonda kuti twamupepa sile wenga, napya akasoka ngi cakuti mu mipepele itu muli ni vintu vino wapata.—Kufuma 20:5; 1 Yamwene 18:21.
Twazumila ukuti ukukanazevya Isita kukauvwana sana na vino Baibo ikalanda, lino ikatukomelezya ukuti twaomvya “mano nu kucenjela” kucila ukukolanya sile intambi zya yantu. (Mapinda 3:21; Mateo 15:3) Fwandi lino tukulondolwela antu yano yatuuzya mauzyo pali Isita, tukacindika insambu zino cila muntu wakwata izya kupingula pali cino angacita.—1 Petulo 3:15.