I Vyani Vino Baibo Ikalanda pa Untungwa? Uzye Leza Aliwe Akatungulula Ivikacitika mu Umi Winu?

Vino Baibo yalandapo

Leza watuumvile nu untungwa, alikuti maka akuipingwila pa vintu ukucila ukuti Leza aliwe atuupingwila nanti cintu cuze ukutunena ivyakucita. Lolini vino Baibo ikasambilizya.

• Leza waumvile antu mu cata cakwe. (Utandiko 1:26) Ukupusanako ni nyama, izikatungululwa sile kulingana na vino zyaumbwa, tukaakolanya Kaumba witu lino tukulanga imiyele ili wa ukutemwa nu mulinganya. Nupya wako Kaumba witu, twakwata untungwa.

• Nupya icicindamisye icakuti tungasoolola vino tukulonda umi witu ukaye uku nkoleelo. Baibo ikatukomelezya ukuti “Sololini umi. Muce mwamuyela [Leza].” (Malango 30:19, 20) Uwila uu nga waya uwasilesile, nupya uwa kutuwaisya sile umwenzo, ndi cakuti tutakweti untungwa. Kucila Leza atupatikizya ukulacita vino akalonda twacita, akatukomelezya ukuti: “Mwemo ndi cali cakuti mwasumbisya amano ku masunde yane, ulongo [nanti umutende] lwinu lungaya wa luzi ulukapita lyonsi sile.”—Ezaya 48:18.

• Kuomba ningo mu umi witu nanti kukanaomba ningo kutemelela pali vino vikatucitikila mu umi. Ngatulonda ukuti twaomba ningo lyonsi tulinzile kuombesya. Baibo ikalanda ukuti: “Uwaombesya muli vyonsi vino ukucita.” (Kasambilizya 9:10) Ikalanda nu kuti: “Amapange ya muntu wino watekela yakamuletela umuzano.”—Mapinda 21:5.

Untungwa u wila ucindamisye uno Leza watupeela, pano ukatulenga kumutemwa nu ‘mwenzo witu onsi’ pano ali vino tukalonda ukucita.—Mateo 22:37.

Uzye asi Leza akatungulula ivintu vyonsi?

Baibo ikasambilizya ukuti Leza u wa maka yonsi, icakuti kutaya aliwensi angakwata maka ukumucila. (Yobo 37:23; Ezaya 40:26) Nomba, asiomvya maka yakwe pa kutungulula ivintu vyonsi. Baibo ikalanda ukuti Leza waikanyanga lino aina Babiloni yacuzyanga antu yakwe. (Ezaya 42:14) Avino caya na ndakai, akazumilizya antu akaomvya untungwa wao ku kucitila yauze iviipe. Nomba Yeova atalatwalilila sile kucita vivyo kwene manda pe.—Masamu 37:10, 11.