U mulandu ci Uno Kwayelile Ukukoma Ayuda Lino Kwali Inkondo ya Nsi Yonsi Yakwe Ciili? U mulandu ci Uno Leza Atalesizye Ivintu Vivyo Ukucitika?
Antu aingi aakauzya mauzyo yaa yakacula sana pa mulandu wakuti yafwilwapo nupya yasilonda sile amasuko uku mauzyo yaa lelo yakalonda nu kuteekeziwa. Yauze nayo yakalola ukuti Ayuda yakomilwe lino kwali Inkondo ya Nsi Yonsi Yakwe Ciili pa mulandu ni viipe vino antu yacitanga, nupya cikayatalila ukuzumila muli Leza.
Ivya ufi vino antu yakalanda pali Leza na pali vino Ayuda yakomilwe lino kwali Nkondo Ya Nsi Yonsi Yakwe Ciili
Ufi: I ciipe ukuzya Leza umulandu uno wazumilizizye ukuti Ayuda yakomwe.
Icisinka: Antu aali sana nu utailo yuzizye umulandu uno Leza wazumilizizya iviipe ukutwalilila. Kasema Habakuku uzizye Leza ati: “U mulandu ci uno walekela unkalwe, ucipondoka, nu ukomi ukuvula pano nsi?” (Habakuku 1:3, Contemporary English Version) Ukucila ukukalipila Habakuku, Leza waleka mauzyo yano Habakuku uzizye yalembwe muli Baibo pakuti swensi twayabelenga.
Ufi: Leza atikako amano kuli vino antu yakacula.
Icisinka: Leza wapata iviipe alino ni vikalenga antu yacula. (Mapinda 6:16-19) Mu manda yakwe Nowa Leza uvwile ‘uyi mu mwenzo’ lino unkalwe wavuzile umu nsi. (Utandiko 6:5, 6) Ukwaula nu kutwisika, Leza uvwile sana uyi pali vino Ayuda yakomilwe.—Malaki 3:6.
Ufi: Leza wazumilizye Ayuda kuti yakomwe pakuti ayafulule.
Icisinka: Leza walesile ukuti Yelusalemu aononwe uku Ina Loma ku kutandika kwa myaka yakwe 100. (Mateo 23:37–24:2) Nanti ciye vivyo, kufuma liili kwene ukufika na ndakai Leza atatemwa umutundu umwi nu kupata uze nanti sile ukuufulula. Kulingana na vino Leza akalola ‘pataya upusano pa Muyuda nu Mukulukuwa.’—Loma 10:12.
Ufi: Ngi cakuti Leza uwaya nu kutemwa nupya uwa maka yonsi akuno waya nga walesya inkondo kuti zitacitika.
Icisinka: Nanti icakuti asi Leza akalenga kuye ucuzi, akaleka utwalilile pa kasita kamwi.—Yakobo 1:13; 5:11.
U mulandu ci uno Leza walekiile Ukuti Ayuda Yakomwe?
Leza walesile ukuti Ayuda yakkomwe pa mulandu uli umwi kwene na uno walekela antu ukulacula ukufika na ndakai: kuti tuvwikisye umulandu uwakatwike imyaka ingi uku cisila. Baibo ikalanda mukulungatika ukuti ciwa aakateka insi ndakai, asi Leza foo. (Luka 4:1, 2, 6; Yoani 12:31) Nanti cakuti icipande icikalanda pi lyasi lii calanda ivingi pa mulandu uno Leza atalesezya ucuzi, tumalanda pa ivintu viili ivyalembwa muli Baibo ivimatwazwa ukumanya umulandu uno Leza walekiile ukuti Ayuda yakomwe lino kwali Inkondo ya Nsi Yonsi Yakwe Ciili.
A weni walenzile ukuti Ayuda yakomwe? Leza wanenyile avyazi ya kutandikilapo, Adamu na Eva vino walondanga ukuti yacita, lelo atayapatikizyanga ukuvwila vino wayanenanga ukucita. Yapingwilepo ukulaisoolwela aineco icisuma ni cipe, nupya vino yasoowilepo ukucita alino na vino antu yauze aku mpiti yasoolwile vyaleta intazi izingi sana uku yantunze. (Utandiko 2:17; 3:6; Loma 5:12) Ibuuku limwi (Statement of Principles of Conservative Judaism) lyalanda ukuti: “Macuzi aingi akayako umu nsi yakayako pa mulandu nu kukanaomvya ningo untungwa uno twapeelwa.” Ukucila ukuti Leza apoke maka yano wapeela antunze aakuisoolwela, wayapeela insita iyakuti yaicitila ivintu ukwaula ukutungululwa na aliwe.
Leza alafumyapo iviipe ivyacitike lino Ayuda yakomilwe umu Nkondo ya Nsi Yonsi Yakwe Ciili. Leza walaya ukuti alatuutulula antu aingi sana aafwa, kwikako na Ayuda aakomilwe. Nupya alafumyapo ukuwaika kuno antu aapuswike lino Ayuda yakomilwe yakauvwa nga iusya ivyacitike. (Ezaya 65:17; Milimo 24:15) Ukutemwa kuno Leza watemwa antunze kukalenga tusininkizye ukuti alafikilizya vino walaya.—Yoani 3:16.
Antu aingi aakomilwe na apuswike lino Ayuda yakomilwe lino kwali Inkondo ya Nsi Yonsi Yakwe Ciili yatwalilile ukuya nu utailo ni nsansa, lino yuvwikisye umulandu uno Leza atalesizye iviipe alino na vino alafikilizya ukulonda kwakwe.