IUZYO 4
Ningaacita Uli Ndi Cakuti Naluvyanya?
I VYANI VINO UNGACITA?
Elenganya ukuti vii vikucitika: Lino Tim yakucina na auze, wasumba bola yaya yatama iwindo lya ina mupalamano.
Ndi wewe wali Tim, ungacita uli?
TALA ELENGANYA PALI VII!
WATUKWATA VINTU VITATU VYAKUSOOLOLAPO:
Ukupuuka.
Ukupeela yauze mulandu.
Ukunena yano watutamila iwindo vino iicili, nu kuyanena ukuti umalipila pali vino utuonona.
Limwi ungatunkwa ukusoolola ivili pa A. Lelo kwaya imilandu iingi ingalenga uzumile kuti watuluvyanya, ciye umulandu wakutama iwindo nanti milandu yuze sile.
IVINTU VITATU VINGALENGA UWAZUMILA VINO WALUVYANYA
Ali cintu cicindame cino ulinzile ukucita.
Baibo ikati: “Swemo twasininkizya ukuti imyenzo itu ili ningo pano tukalondesya ukucita cisuma nsita zyonsi.”—Ayebulai 13:18.
Antu ilingi yakaelela ndi cakuti uwatayaluvyanya wazumila vino atacita.
Baibo ikati: “Wiyo akafisa amaifyo yakwe atalaya nu longo foo. Lelo wiyo akailongwela amaifyo nu kuzenzuka, akaelelwa uluse.”—Mapinda 28:13.
Ni cicindamisye icakuti, ndi tukuzumila vino twaluvyanya tulaazanzya Leza.
Baibo ikati: “[Yeova] wapata umuntu akaifya uku mufulo, lelo aololoke ali yakundwe yakwe.”—Mapinda 3:32.
Karina ali ni myaka 20, wafisile akapepala kuli ya isi kano ya kapokola yakapeela ndi cakuti umuntu akusimuzya motoka nanti ndi cakuti asikukonka masunde yano alinzile ukukonka pa kupisya. Nomba atatwalilile ukufisa vivyo kwene. Karina watiile: “Lino papisile umwaka onga ya tata izile yazana kapepa kako ala palemvilwe izina lyane. Na ci calenzile yatata yasoke sana nu kunkalipila.”
I vyani vino wasambilileko? Karina watiile: “Kufisa vino waluvyanya cikalenga ivintu ukwipilako. Nanti ungafisa uli viliza visokoloke uku nkoleelo alino vilipilako na sana.”
UNGACITA ULI PAKUTI USAMBILILE KULI VINO WALUVYANYA?
Baibo ikati: “Lili lingi swensi kwene tukaluvyanya.” (Yakobo 3:2) Nupya ndi cakuti ukuzumila vino waluvyanya nu kusokolola lilyo kwene sile lino wacita vivyo ala waicefya nupya ala cikulangilila ukuti wakula umu mano.
Cakwe ciili cino ulinzile ukucita u kusambilila kuli vino waluvyanya. Umukazyanya umwi, Vera walanzile ati: “Lyonsi lino naluvyanya nkalola ukuti ndinzile ukusambililako nupya nkaleka ukuti vino nasambililako vingazwe sana pakuti inje umuntu musuma nupya imanye ni vyakucita umuku uze lino ivya musango uwo vyacitika.” Leka lyene tulande pali vino ungacita pakuti usambilileko.
Tuti limwi wazima injinga kuli ya tata yako lyene onona. Ungacita uli?
U kusulako sile nu kutaila ukuti ya tata yako yatalola ukuti wati onona.
U kunena ya tata yako vyonsi vyali vyacitika ukwaula ukufisa nanti kamwi.
U kunena ya tata yako vyonsi vyali vyacitika nomba upeela yauze umulandu.
Tuti limwi wapona masindano pa mulandu wakuti utawelenganga. I vyani vino ungacita?
U kupeela masindano umulandu ukuti yatali ningo yakomile.
U kuzumila sile ukuti watupona.
U kupeela ya mwalimu umulandu ukuti yakupata sile.
Ukwikalila sile kulaelenganya vino waluvyanyizye mpiti kwaya ngati ukulolekesya mwi galasi lya kucisila, kuu ukupisya motoka
Nomba elenganya pali vii vyonsi vino twalanda, nupya uwelenganye ukuti (1) wewe ya tata yako nupya (2) wewe ya mwalimu yako. I vyani vino ya tata yako na ya mwalimu yako yangakwelenganyizizya ndi cakuti wazumila vino watuluvyanya?I vyani vino yangakwelenganyizizya ndi cakuti wafisa nanti wakana vino watuluvyanya?
Nomba elenganya pali vino waluvyanyizye umwaka uwafumileko nu kwasuka amauzyo yaa.
I vyani vino waluvyanyizye? Wacisile uli pacisila ca kuluvyanya?
Nafisile.
Napeezile umuntu muze umulandu.
Nazumile vino nacisile.
Ndi cakuti utaazumile vino waluvyanyizye, uvwile uli pacisila?
Nuvwile ningo pa mulandu wakuti pasi ivyancitikiile.
Nayuvwile uwa mulandu pano ntalanzile icisinka.
Uzye nga wacisile uli pakuti ivintu vipitike ningo?
I vyani vino wasambilileko kuli vino waluvyanyizye?
UKWELENGANYAPO ULI?
U mulandu ci uno yamwi yakafililwa ukuzumila ukuti iyaluvyanya?
Uzye antu yangelenganya vyani ngi cakuti lyonsi ukwezya ukufisa vino watuluvyanya, nomba i vyani vino yangelenganya ndi cakuti lyonsi ukuzumila vino watuluvyanya?—Luka 16:10.