Icinkunka Icalenga 10

Mose wanenyile Falao ukuti atalaya kuli aliwe nupya. Nomba lino atatala wapita, wamuneenyile ati: ‘Usiku pakasi, ana aonsi yonsi mayeli Aina Ijipti, kutandika pa mwana umonsi wakwe Falao kufika uku yana aonsi aa yazya, yamafwa.’

Yeova waneenyile Aina Izlaeli ukupekanya icakulya iciiyeele. Watiile: ‘Mukome akana ka mfwele nanti aka mbuzi aka mwaka onga, alino mupake uwazi wakako pa visaasa. Moce inyama iyo, muliile pamwi nu mukate umusi citutumusi. Muzwale ivyakuzwala ni ndyatu, nu kuipekanya ukutandika ulendo. Ilelo usiku nimamupususya.’ Uzye ukwelenganya ukuti Aina Izlaeli yuvwile uli?

Uwanda kwene uwa usiku pakasi, malaika wakwe Yeova waile mu mang’anda yonsi ya Ina Ijipti. Pa mang’anda yonsi pano yatapasile uwazi pa visaasa ana mayeli yafwile. Lelo malaika wacilwike mang’anda yonsi pano yapasile uwazi pa visaasa. Ana yonsi Aina Ijipti mayeli yafwile, akankala, kumwi na apiina. Lelo pasi umwana nanti awenga uwa Ina Izlaeli uwafwile.

Nu mwana wakwe Falao kwene wafwile. Falao wafizilwe ukuzizimizya. Papo kwene sile waneenyile Mose na Aloni ati: ‘Katukini. Fumini muno. Yangini mukapepe Leza winu. Sendini inyama zinu mwapita.’

Usiku kwene uwa ala nu mwezi iuwala, Aina Izlaeli yafumile umu Ijipti, kulingana ni ndupwa zyao ni mitundu. Aina Izlaeli aonsi 600,000 na anaci aingi na ana yaafumile umu Ijipti. Nupya antu yauze aingi yalondiile Aina Izlaeli kuti nayo kwene ya kapepa Yeova. Vikwene ali vino Aina Izlaeli yapuswike.

Pakuti yaiusya vino Yeova wayapuswisye yaali nu kulaalya icakulya kwene cii iciiyeele cila mwaka pa wanda kwene uwa uno yapuswike. Yacamanga ukuti Ucilo.