Kulaya Ukwama Antu

1. A lilaci lino tulatandika ukwama antu uku ukongano?

¹ Ngi cakuti mukupekanya ukuti mwame ya lupwa nanti ivyuza pakuti mwize muliile icakulya pamwi cino imusumbapo impiya ni nsita pakuti sile mupekanye, i ca cumi ukuti mungaya mukayame ale muli nu luzango wakwe cimwi. Vikwene, ali vino na aina yaombesya pakuti yapekanye amalyasi aalalandwa pa ukongano. Lino kwasyala i milungu itatu kuti ukongano utandike, Yeova alatupeela isyuko lyakuti tukaameko yauze ukuti nayo yakize yakazanweko. I cani cilatwavwa ukwamako antu yauze nu luzango?

2. I cani icilalenga ukuti tukaombesye lino tula-ama antu uku ukongano?

² Ukwelenganya sana pali vino tukaipakizya lino Yeova akutusambilizya ivyeo visuma pa ukongano, cilalenga ukuti tuombesye lino tula-ama antu uku ukongano. (Eza. 65:13, 14) Tulinzile twaiusya nu kuti nga twaombesya ukwama antu uku ukongano kulacitika ivisuma. (Lolini kambokosi akakuti “Vino Cacindama Ukuombesya.”) Antu yano tulaama yamwi yaliza yazanweko, lelo yauze yene yataliza yazanweko. Nomba, nandi i cakuti asi yonsi yano tulalalika aliza uku ukongano, ukuombesya kwitu kulalenga Yeova ukulumbanyiziwa nu kulanga ukapekape wakwe.—Masa. 145:3, 7; Umbw. 22:⁠17.

3. Uzye tulaaomba tutuuli pa kwama antu uku ukongano?

³ Cila umba lyakwe ya eluda yalinzile ukupekanya ningo vino cilongano cao cilaomba pakuti kukaye ukwamako antu aingi, kumwi sile navino cilaaya nga ya kasimikila yazana pa ng’anda pasi antu. Pa Ciwelusi na pa Mulungu lino tula-ama antu tulaayasila na ya magazini nga calondekwa. Lino insita yakwamilapo antu uku ukongano ilasila, tulaya nu luzango wakwe cimwi pano ala twaombisye ni nsansa ukwamako antu aingi nu kumanya ukuti iizile ituipakizya pamwi nayo amalyasi yano Yeova watupekanyizizye!

Vino Cacindama Ukuombesya

Pa myaka imwi iyapitapo, nkazi umwi waomvileko umulimo wa kwama antu uku ukongano, lelo watwisikanga ngi cakuti mu miombele yakwe mwali nu kuya ivisuma. Pano welenganyanga ukuti, ‘Uzye antu yaliza yazanwe uku ukongano?’ Pa Ciwelusi akatondo uwanda wako cili uwa ukongano, nkazi wii waweni umonsi umu Hindu ninsi ataikala umupiipi nawe, alino amulamuka nu kuilondolola kuli aliwe. Umuntu wii watile cino wizile uku ukongano a pa mulandu wakuti kwali yano yamupezile akapepala kakwamilapo antu uku ukongano. Nkazi waswike amauzyo aingi yano umuntu wii uzizye. Umonsi wiya walanzile ukuti waipakizye sana amalyasi yano yapezilwe nupya camuzanzizye ukulola vino aina na yankazi yalolekanga ausaka ni miyele yao isuma. Uwanda kwene uuwa nkazi wiya wizile atandika ukulanzyanya na atwalane yano yatenzi umupiipi nawe. Nayo kwene yapokelile akapepala kakwamilapo antu uku ukongano ali cino iizile, nupya yakwezile basi pakwiza uku kulongana. Yaipakizye ukulongana nupya yatile yaliza yazanweko na pa Mulungu. Lyene nkazi waweni vino ukuombesya lino tukwama antu uku ukongano cila mwaka kwacindama.
Ukongano uwaliko umwaka uwafumileko, ya painiya atwalane yailondolwile ku ya koloci atwalane. Akoloci yaya yalanzile ukuti wali umuku wakutandikilako ukuzanwako uku ukongano. Ya painiya yayuzizye yati, “Aaweni amulalike?” Nayo yaswike yati, “Twazanyile akapepala umwisika lya cisaasa pa ng’anda.” Fwandi, yawelenzile akapepala nu kulemba pali ka fomu kano kaali ukucisila ya kapepala. Aina na yankazi yauze nayo iizile iyayalamuka nu kuyapeelako ivyakulya vya musanya pa nsita yakupuuza. Yaipakizye ukulongana icakuti yatile yalaya nu wanda uwalondelilepo. Pacisila ca kulongana kwali ukupekanya ukuti yakayatandalile pakuti yangatandika ukusambilila Baibo nayo.