VINO TUNGACIMVYA ULUPATO

1 | Mutaya Na Kapatulula

Vino Baibo Ikasambilizya:

“Leza atakwata kapaatulula, lelo umu nko zyonsi umuntu aakamutiina nu kucita ivisuma akapokelelwa kuli aliwe.”—MILIMO 10:34, 35.

Vino Cikapiliula:

Yeovaa Leza asitemwa umuntu pa mulandu ni mpanga kuno akaikala, mutundu, inkanda, nanti intambi. Lelo, akaika mano kuli vino umuntu waya umukasi, kuli kuti vino akaelenganya na vino akalondesya. Nupya Baibo ikati, “Antu yene yakalola imilolekele ya kunzi, lelo ne Yawe [Yeova] nkalola ivili mu mwenzo.”—1 Samueli 16:7.

Vino Mungacita:

Nanti cakuti tusimanya vino yauze yakwelenganya, tungakolanya Leza nu kukanaya na kapatulula kuli yauze. Mwaika amano uku muntu wenga na wenga. Ndi cakuti mwazana ukuti mwapata antu yamwi pa mulandu nu mutundu wao nanti impanga kuno yakaikala, mwapepa kuli Yeova nu kumulenga ukuti amwazwe ukuta ukwelenganya vivyo pa yantu yayo. (Masamu 139:23, 24) Nga mukupepa sana kuli Yeova pakuti amwazwe ukuta ukuya na kapatulula, mungasininkizya ukuti alaasuka ipepo linu nupya alamwazwa.—1 Petulo 3:12.

a Yeova ali izina lyakwe Leza.—Masamu 83:18.

“Pa nsita iya, ala ntatala nikalapo nu mu zungu aliwensi pa mutende. . . . Pa lyene naya umu lupwa ulwa ina na ya nkazi umu nsi yonsi.”—YA TITUS

Ivyacitikile Yamwi—YA TITUS

Yacimvizye Ulupato

Ya Titus yali umwi umba lya yantu auvwanga sana uyi pa mulandu na masunde aliko alenganga ukuti antu yaya na kapatulula pakasi ka mitundu. Ya Titus yalanzile ukuti: “Twayanga umu kucita ulwete umu ncende zimwi zya mu tauni muno yatazumilizyanga antu atifi ukuya, wakwe, umukafikila aenyi nu mu vikuulwa muno yakamwela uwengwa.” Ya Titus yalondolwile ukuti yali nu lupato na cii calenzile ukuti yaye sana nu unkalwe. Nupya yalanzile nu kuti: “Nga twatandika ukupaazyanya na umwi, aye umonsi nanti umwanaci, nene natandikilangapo ukumumamo.”

Ya Titus izile iyasenuka lino yatandike ukusambilila Baibo na ya Nte Yakwe Yeova. Kubelenga Baibo kwayazwilizye ukusenuka muli vino yelenganyanga. Nupya yatemilwe sana ulayo uukalanda pali vino vilacitika uku nkoleelo lino “kutalaya imfwa, kutalaya ukuloosya nanti ukulila nanti ukuvwa ukuwaika.”—Kusokolola 21:3, 4.

Pa kutandika, cayatalile sana ukuta ukuya nu lupato. Yalanzile iyati: “Cantalile sana ukusenuka muli vino nelenganyanga na vino nacitanga.” Lelo vino Baibo ikalanda pali Milimo 10:34, 35 ukuti Leza atakwata kapaatulula vyayazwilizye.

I vyani vyacitike? Ya Titus yalondolwile ukuti: “Nizile insininkizya ukuti ya Nte Yakwe Yeova sile ali ya kapepa ya cumi lino naweni vino yalanganga ukutemwa usi mulandu nu kupusana imitundu nanti inkanda. Na lino ntatala nabatiziwa kwene, umuzungu umwi wino twali nawe umu cilongano icili cimwi, wanenyile ukuti tukalile pamwi icakulya uku ng’anda ukwakwe. Nuvwile kwati nkulota sile. Pa nsita iya, ala ntatala nikalapo nu muzungu aliwensi pa mutende, nomba lyene, naile umu kuliila pamwi nawe icakulya uku ng’anda ukwakwe kwene. Pa lyene naya umu lupwa ulwa ina na ya nkazi umu nsi yonsi.”