Umwili wa muntu, muno uwene wa cumi cumi utanga wikale

Uzye Uwene Wakwe Leza Waya Umu Mwenzo Winu?

Vino Baibo yalandapo

Awe, Uwene wakwe Leza asi cintu icingaya umu myenzo ya Ina Klistu.a Baibo ikalondolola ukwayela Uwene uwo ukuti “wene wa mwiyulu.” (Mateo 4:17, King James Version) Lolini vino Baibo ikalanga ukuti uwene, uuteeko wa cumi cumi ukateeka ukwi yulu.

Uwene wakwe Leza wakwata ya kateeka, antu yano ulateeka, masunde alino na amaka akulenga vino Leza akalonda ukuti vicitike ukwiyulu na pano nsi.—Mateo 6:10; Umbwilo 5:10.
Uteeko wakwe Leza, nanti Uwene ulateeka “misango yonsi ya antu, na antu amu nko zyonsi ni ndimi” pano nsi. (Danieli 7:13, 14) Amaka yano uteko wakwata yasifuma ku yantu yano ulateeka lelo yakafuma kuli Leza.—Masamu 2:4-6; Ezaya 9:7.
Yesu wanenyile atumwa yakwe acisinka ukuti yalateeka nawe umu Uwene wa mwiyulu “nga nu kwikala pa vilimba vya wene.”—Luka 22:28, 30.
Uwene kwene uu wakwata anisi, yayo alononwa.—Masamu 2:1, 2, 8, 9; 110:1, 2; 1 Kolinto 15:25, 26.

Baibo isisambilizya ukuti Uwene wa mwi yulu waya umu mwenzo, umu mano yakuti ukateeka ukupitila umu mwenzo wa muntu. Lelo ikalanda ukuti “mazwi yano yakalanda vya pa Wene” nanti “Landwe Lisuma lii lya Wene” vilinzile ukuya mu myenzo itu.—Mateo 13:19; 24:14.

Uzye amazwi yakuti “uwene wakwe Leza uli pakasi kinu” yakapiliula cani?

Ukulingana na vino yakasenula yamwi yasenula amazwi aya pali Luka 17:21 calenga antu yamwi yatamanya ukwayela Uwene Wakwe Leza. Baibo wa King James Version akalanda ukuti “uwene wakwe Leza uli pakasi kinu.” Pa kuti tuvwikisye ningo upiliulo wa mazwi aya pa cikomo cii, tulinzile ukumanya icikulandwapo.

Intunguluzi zimwi izyacuzyanga Yesu — Uwene Wakwe Leza utaali mu myenzo ya antu inkomi nupya ali ni myenzo itange isenuke aacuzyanga Yesu

Yesu walandanga na Afaliseo, kuli kuti iumba lya ntunguluzi zya mapepo aamuzunyanga nupya yapangananga ukumukoma. (Mateo 12:14; Luka 17:20) Uzye cingaya sile ningo ukwelenganya ukuti Uwene wali mu myenzo itange isenuke iya yantu kwene yaaya? Yesu wayanenyile ati: “Mukasi ka myenzo inu mwazulamo usomvi ni nkota.”—Mateo 23:27, 28.

Ya kasenula yauze yene yasenula ningo sana amazwi yano Yesu walanzile pali Luka 17:21, yati: “Uwene wakwe Leza uli pamwi namwe.” (Ivilembo ivyati viyendama sweswe ituviyendamika; Contemporary English Version) “Uwene wakwe Leza uli pakasi kinu.” (New World Translation, tumazwi twapisika) Uwene wa mwi yulu wali “pamwi” nanti “pakasi” ka Afaliseo, pano Yesu, wino Leza wasoolola ukuya umwene wa Wene uwo, waali nayo paapa kwene.—Luka 1:32, 33.

a Amu mipepele iingi akaitaka ukuti aina Klistu yakasambilizya ukuti Uwene Wakwe Leza waya umu muntu nanti sile umu mwenzo wakwe umwi. Lino akapepa uku Baptist yakweti ukongano ku mpanga ya United States yalanzile ukuti: umu nzila imwi, Uwene wakwe Leza “uuteeko uwaya umu mwenzo nu mu umi wakwe cila muntu.” Pope Benedict XVI walanzile ivikolaneko umwi buku lyakwe limwi (Jesus of Nazareth), walemvile ukuti: “Uwene wakwe Leza ukaiza ukupitila umu kuvwila umwenzo.”