Icani Icikacitika Uku Muntu Ndi Wafwa?

Umuntu ndi wafwa ala asi muumi. Imfwa yaya kwati ukukasula utulo utwingi. (Yoane 11:11-14) Afwe yatanga yuvwe cimwi, ukulola, ukuvwanga nanti ukwelenganya cimwi. (Lukala Milandu 9:5, 10) Mipepele ya ufi ikasambilizya antu ukuti afwe yakaya uku kwikala ni mipasi ya vikolwe vyao ivyafwile mpiti. Nomba vii, visi vino Baibolo ikasambilizya.

Yonsi afwa yatanga yatwazwe nanti kutucuzya. Antu aingi yatemwa ukulondela intambi nu kupeela vimwi vino yakalola kwati vingazanzya afwa. Leza akasoka ndi antu yakucita vii, pano ivya musango uu, vyafuma uku ufi wakwe Satana. Na afwa kwene yatanga yazange, pano yasi apuma foo. Tutafwile ukoopa nanti ukupepa afwe. Wino tulinzile ukupepa sile a Leza, casila.—Mateo 4:10.

Afwa yalatutuluka. Yeova alatutulula afwa pa kuti yace ikale mu paladaise muno kwene umu nsi. Insita ya kututulula afwa icili ukunkolelo. (Yoane 5:28, 29; Milimo 24:15) Leza angakatusya yonsi afwa wakwe vino namwe mungazyula umuntu aali mu tulo.—Mako 5:22, 23, 41, 42.

Isambilizyo lya kuti tusyafwa, ufi uno Satana Ciwa akasansanta. Satana ni viwa vyakwe yakalenga antu ukwelenganya ukuti mipasi ya afwe icili ipuma kapya ikaleta indwala ni ntazi zyuze. Satana akasomba antu, limwi limwi akaomvya iviloto nanti vilolwa. Yeova wapata yonsi aakalonda ukuvwanga na afwa.—Malango 18:10-12.