Mwaika Mano Uku Miyele Isuma Ino Yauze Yakwata

Intazi Iyayapo

Ukaitemwe ukalenga umuntu ukuya na kapatulula, pano umuntu uwaya na ukaitemwe akalondesya sile ivingamuzipila nupya akalola ukuti wacindama ukuluta yauze nanti ukulola yauze ukuti yatacitandama. Limwi swensi kwene tungatandika ukwelenganya wakwe vikwene. Ibuku limwi ilyakuti Encyclopædia Britannica lyalondolola ukuti: “Antu yamwi yakaelenganya ukuti imikalile yao, ivyakulya, imizwalile, vino yakacita, vino yaya alino na vyuze, vyacindama ukucila ivya yantu yauze.” Tungacita uli pakuti tutaelenganya wa yantu yayo

Cisinte ca Muli Baibo

“Muicefye nu kulola auzo ukuya acindame ukuluta mwemwe.”—FILIPI 2:3.

Uzye icikomo cii cikutusambilizya cani? Pakuti tutaika sana amano kuli sweineco, tulinzile ukusambilila ivyakuya aicefye. Ndi cakuti sweswe aicefye tulalola ukuti kwaya vimwi vino yauze yatucila. Kutaya iumba limwi ilya yantu ilyakwata imiyele yonsi isuma nanti ilyamanya vyonsi.

Lolini ivyacitikile ya Stefan. Yakulile umu mpanga muno yakalola antu yonsi ukuti yaya sile icilicimwi lelo yacimvizye akapatulula ka yantu afumile uku mpanga kuno yakalola yamwi ukuti yacindama ukuluta yauze. Yalanzile ukuti: “Nasininkizya ukuti, ukulola yauze ukuti yacindama, kukaazwa sana ukuta ukuya na kapatulula. Ntamanya ivintu vyonsi. Fwandi ningasambilila vimwi uku yantu yonsi.”

Vino Mungacita

Mwaezya ukwelenganya pali vino mwaya nupya mwaiusya ukuti namwe kwene mukaluvyanya. Mwaiusya ukuti kwaya vimwi vino yauze yangakwanisya ukucita vino mwemo mutanga mucite ningo. Mutaelenganya ukuti antu aya umwi iumba limwi yakolana muli vyonsi.

Ukucila ukulaelenganya sile iviipe pa muntu uwaya umwi iumba limwi lya yantu, mwayuzya mweineco imuti:

Mwaiusya ukuti kwaya vimwi vino yauze yangakwanisya ukucita vino mwemo mutanga mucite ningo

‘Uzye umucumi vino napata pa muntu wii viipa nanti limwi vyapusana sile na vino naya?’
‘Uzye umuntu wii angalola ukuti kwaya vimwi vino nkaluvyanya?’
‘I vyani vino umuntu wii wamanyikisya ukuncila?’

Nga mwasuka ningo mauzyo yaa, mungacimvya akapatulula, nupya mungazana nu kuti kwaya vimwi vino mungasambilila uku muntu wiyo.

IVYACITIKILE YAMWI IVINGATWAZWA Ya Nelson Aku United States

“Lino nali umwance nikalanga uku ncende ukwali sile antu ankanda iliimwi ni nkulilo iliimwi. Nomba lino naile mukuomba incito ya mu fakitoli mu musumba ukalamba ala indi ni myaka 19, natandike ukuomba nu kwikala apipi na antu apusane inkanda, inkulilo, ni ntambi.

“Lino natandike ukumanyana na antu yano naombanga nayo alino nu kupanga ivyuza, naweni ukuti ukumanya sile umuntu pa mulandu ni nkanda, ululimi luno akavwanga, ni mpanga kuno wafuma, kutanga kungazwe ukumanya vino akaombesya, vino waya ni cisinka, nanti vino akaelenganya pa vintu.

“Nizile intwala umwanaci uwafumile uku mpanga yuze, nupya naya sana nu luzango pa mulandu wakuti namanya imisango ya vyakulya ivipusanepusane alino ni nyimbo. Nasambilila ukuti swensi kwene twakwata imiyele isuma ni iipe. Ukulanda sile icisinka, ndakai naya umuntu umusuma pa mulandu nu kusambilila nu kukolanya imiyele isuma iya antu yano twapusana sana inkanda ni ntambi.”