Wãwen Kar Lomoren Niñniñ Eo Moses

LALE mõk an niñniñ in jõñ, im drebij adrin pein liin. Niñniñ in ej Moses. Kwo jela ke wõn kõra in e dreo? Liin ej juõn liroij in Ijipt, nejin Per’o.

Jinen Moses e ar noj niñniñ in nejin mae ien e ar jilu aliñ ridtan, kinke e ar jab kõnan bwe dri Ijipt ro ren mõn e. Ak e ar jela bwe re maroñ lo Moses, inem eñin men eo e ar kõmon bwe en lomoren.

E ar bõk juõn iep im kõmõne bwe dren en jab dreloñ iloan. Inem e ar likit Moses iloan, im dror iep eo iben ujoij ko re aitok i tõreren River Naial. E ar jiroñ Mir’i-am, ledrik eo jein Moses, bwe en jutak ebak e im lale ta enaj walok.

Elikin jirik ien, lio nejin Per’o e ar wonlõltok ñõn River Naial bwe en tutu. Im e mõkaj an lo iep eo iben ujoij ko re aitok. E ar kir juõn ian ledrik ro korijeran: ‘Kwon ilem bõktok iep en ñõn iõ.’ Ke liroij eo e ar kabellok iep eo, e mõke lap an aibujuij niñniñ eo e ar loe! Niñniñ eo Moses e ar jõñ, im liroij eo e ar buromõj kake. E ar jab kõnan bwe ren mõn e.

Inem Mir’i-am e ar itok. Kwo maroñ loe ilo pija ne. Mir’i-am e ar kajitõk iben lio nejin Per’o: ‘I maroñ ke ilem kirtok juõn kõra ian kõra in Israel ro bwe en kaninnin ladrik ne ñõn kwe?’

‘Joij im ilok,’ liroij eo e ar ba.

Inem Mir’i-am e ar kaiur e im ettõrlok im jiroñ jinen. Ke jinen Moses e ar itok ñõn iben liroij eo, liroij eo e ar ba: ‘Kwon bõk niñniñ in im kaninnin e ñõn iõ, im i naj lewõj wõnam.’

Inem jinen Moses e ar kõkajiririk ajiri eo lukkun nejin. Tokelik, ke e ar bwe an ridto Moses, e ar bõklok ñõn lio nejin Per’o, eo e ar kõkajiririk e einwõt lukkun nejin. Eñin wãwen an kar Moses ridtolok iloan imõn Per’o.