Unin An Kar Moses Ko

LALE mõk an Moses ko jen Ijipt. Kwoj lo ke lõmaro rej lukworkwore? Kwo jela ke unin air kõnan mõn Moses? Jen lale elañe je maroñ jela.

Moses e ar ridto lok ilo imõn Per’o, iroij in Ijipt. E ar erõm juõn eman e kanuij meletlet im utiej. Moses e ar jela bwe ejjab juõn dri Ijipt, im bwe lukkun jemen im jinen r’ar dri kamakoko in dri Israel.

Juõn ran, ke e ar 40 yiõ ridtan, Moses e ar bebe in ilen lale ekijkan an armij ro dron ber. E ar lukkun nana wãwen ko r’ar kõmõni ñõn ir. E ar lo an juõn dri Ijipt mõn juõn dri Israel. Moses e ar reitoreitak, im ke ejelok armij e ar lo e, e ar mõn dri Ijipt eo, im dri Ijipt eo e ar mij. Inem Moses e ar noj enbwinin ilo bok.

Ran eo juõn Moses e ar ilen bar lolok armij ro dron. E ar lemnõk e maroñ kar jibañ ir bwe ren jamin bar dri kamakoko. Ak e ar lo ruo dri Israel rej iri, inem Moses e ar ba ñõn eo e bwir: ‘Etke kwoj iri iben jeõm im jatõm?’

Inem leo e ar ba: ‘Wõn e ar kõmõn yuk am iroij im dri ekajet? Kwoj iten mõn iõ einwõt am kar mõn dri Ijipt eo ke?’

Kiõ Moses e ar mijõk. E jela bwe ewor armij en e ar lo men eo e ar kõmõne ñõn dri Ijipt eo. Per’o e ar bareinwõt roñ men in im e ar jilkinlok jet eman bwe ren mõn Moses. Eñin unin an kar Moses aikwij in ko jen Ijipt.

Ke Moses e ar ilok jen Ijipt, e ar ilok etolok ñõn enen Mid’i-an. Ijo e ar iion famili eo an Jet’ro, im e ar belek juõn ian limaro nejin im etan Zip-po’ra. Moses e ar erõm juõn dri lale sip im e ar lale sip ko an Jet’ro. Iomin 40 yiõ e ar jokwe ilo enen Mid’i-an. Kiõ e ar 80 yiõ ridtan. Inem juõn ran, ke Moses e ar lale sip ko an Jet’ro, juõn men in kabwilõñlõñ e ar walok, eo e ar ukõt aolepen mour eo an Moses. Ukõt tok peij in, im jen lale ta men in kabwilõñlõñ in.