Wijki Eo Ej Urur

MOSES e ar itok ilo juõn ial e aitok ñõn tol Ho’reb bwe en kabuk ujoij kijen sip ko an. Ijin e ar lo juõn wijki e urur kin kijeek ak e ar jab bwil!

‘I bwilõñ,’ Moses e ar lemnõk. ‘I naj druaklok bwe en emõn aõ lale.’ Ke e ar kõmõn men in, juõn ainiken e ar walok jen wijki eo im ba: ‘Kwon jab druaktok. Kwon wutik juj kõne am, bwe jikin ne kwoj jutak ie, brij ekwojarjar.’ Kar Anij eo ej konono ikijen juõn enjel, inem Moses e ar kalibubu turin mejen.

Inem Anij e ar ba: ‘I ar lo iñtan an armij ro droõ i Ijipt. Kin men in i naj kanemkwoj ir, im ij jilkinlok yuk bwe kwon ãñin lok armij ro aõ jen Ijipt. Jeova e ar iten bõktok armij ro an ñõn ene eo e aibujuij, Ke’nean.

Ak Moses e ar ba: ‘Ña armij wan. Ekijkan aõ maroñ kõmõn men in? Im ta elañe ij etal. Dri Israel ro re naj ba ñõn iõ, “Wõn e ar jilkintok yuk?” Inem ta eo i naj ba?’

‘Eñin men eo kwo naj ba,’ Anij e ar uak. ‘“JEOVA Anij an Ebream, Anij an Aisak im Anij an Jekob e ar jilkintok iõ ñõn kom.”’ Im Jeova e ar ba: ‘Eñin eta ñõn in drio.’

‘Ak bwelen re ban tõmak ñe ij ba bwe kw’ar jilkinlok io,’ Moses e ar uak.

‘Ta ne ilo peõm?’ Anij e ar kajitõk.

Moses e ar uak: ‘Juõn alal.’

‘Kwon jolok e na ion birej,’ Anij e ar ba. Im ke Moses e ar jolok e, alal eo e ar erõm juõn serpent. Inem Jeova e ar kwalok ñõn Moses bar juõn men in bwilõñ. E ar ba: ‘Kwon likit peõm iloan kobe ne am.’ Im Moses e ar likit pein iloan kobe eo an, im ke e ar kadrioj pein, e ar mouj im einwõt sno! Pein e ar einwõt ñe e bõk nañinmij nana eo etan leper. Inem Jeova e ar lelok kajur ñõn Moses bwe en kõmõn men in bwilõñ eo ken ka jilu. Eliktata e ar ba: ‘Ñe kwoj kõmõn men in bwilõñ kein, ro dri Israel re naj tõmak bwe i ar jilkinlok yuk.’

Elikin men in, Moses e ar jeblak im ba ñõn Jet’ro: ‘Kwon joij im kotlok iõ bwe in jeblak in lolok ro nuku ilo Ijipt im lale ekijkan air mour.’ Inem Jet’ro e ar yokyokwe Moses, im Moses e ar jino ilok ilo ial eo an lok ñõn Ijipt.