Wõjke eo Eurur

Moses ear jokwe ilo Midian ium̦win 40 iiõ. Ear m̦are im tokãlik ear wõr nejin. Juon raan, ke ear lale jiip ko nejin ilo Tol̦ Sainai, ear loe juon men ekabwilõñlõñ. Ear loe an juon wõjke urur, ak ejjab bwil! Ke ear kepaakel̦o̦k wõjke in bwe en lale etke ejjab bwil, ear roñ juon ainikien ej itok jãn bul̦õn wõjke in im ej ba: ‘Moses! Kwõn jab ruwaaktok. Kwõn utũk juuj kan̦e am̦ kõnke eokkwõjarjar ijen̦e kwõj jutak ie.’ Ainikien wõn in? Eokwe, Jeova eo ej kõnono ñane ikijjeen juon enjel̦.

Moses ear pinej mejãn kõn an mijak, im Jeova ear ba: ‘Ij loe an RiIsrael ro eñtaan. Inaaj lo̦mo̦o̦ren er jãn RiIjipt ro im ãñinl̦o̦k er ñan juon ãne em̦m̦an. Kwe eo kwõnaaj tõl armej ro aõ bwe ren diwõjl̦o̦k jãn Ijipt.’ Kwõl̦ak lale, Moses ear ke ilbõk ke kar lel̦o̦k ñane jerbal in?

Moses ear kajjitõk ippãn Anij im ba: ‘Ta eo inaaj ba ñe armej ro renaaj kajjitõk wõn eo ear jilkinl̦o̦k eõ?’ Innem Anij ear uwaak im ba: ‘Kwõnaaj ba bwe Jeova, Anij eo an Ebream im Aisak im Jekob, ear jilkinl̦o̦k eok ñan er.’ Moses ear bar kajjitõk im ba: ‘Ak ta el̦aññe armej ro rejjab roñjake eõ?’ Innem Jeova ear kwal̦o̦k ñan Moses kein kam̦ool ko me renaaj kar kaalikkar bwe ej jipañe. Ear jiroñ Moses bwe en jolal̦l̦o̦k jokon̦ eo an. Ke Moses ear kõm̦m̦ane men in, jokon̦ eo ear oktak ñan juon jineik! Im ke ear jillo̦k im jibwe jabõn jineik eo, ear bar oktak ñan juon jokon̦. Innem Jeova ear ba: ‘Kwõn kõm̦m̦ane men in bwe en menin kam̦ool ñan er bwe ña eo ij jilkinl̦o̦k eok.’

Innem Moses ear ba: ‘Ña ijjab juon eo ejel̦ã kõnnaan.’ Ak Jeova ear kallim̦uri im ba: ‘Inaaj kwal̦o̦k ñan eok ta ko kwõnaaj ba, im inaaj jilkinwaj l̦eo jeim̦, Aron, bwe en jipañ eok.’ Kiiõ ke Moses ear jel̦ã bwe Jeova enaaj pãd ippãn, ear bõk kõrã eo pãleen im l̦adik ro nejin im etal ñan Ijipt.