Katak 7

Men Ko Anij Ear Kõmmani Ñan Lomoren Armij

1, 2. (a) Ewi wãwen an kar juõn ri tarinae in Rome kile wõn eo ej Nejin Anij? (b) Etke Jehovah ear kõtlok bwe Jesus en mij?

ENAÑIN 2,000 yiõ ko remotlok, ilo elikin raelep in man rak, juõn kapen in tarinae an Rome ear kalimjek jilu emaan ro etto air eñtan mokta jen air mij. Elap an ri tarinae in kalmenlokjen kin juõn iair​—Jesus Christ. Kar drilaike Jesus ñan juõn alal. Ilo raelep in ran eo lañ ear marok ke ear bojak in mij. Ien eo ear mij, elap an lal makitkit, im ri tarinae eo ear ba: “Emol armij in e Nejin Anij.”​—Mark 15:39.

² Nejin Anij! Ejimwe an ri tarinae in ba. Ear loe juõn men e aorõk tata im ejamin bar wõr ion lal. Ilo ien ko lok mokta, Anij make ear ba bwe Jesus ej Nejin ejitenburu ibben. (Matu 3:17; 17:5) Etke Jehovah ear kõtlok bwe Nejin en mij? Kinke kar ikijen wãwen in wõt Anij ear bebe in lomoren armij ro jen jerawiwi im mij.

KAR KÃLETE KIN JUÕN KARÕK EAORÕK

3. Etke ear tellokin kãlet juõn wõt Nejin Anij ear keotak kin juõn jerbal elap kin armij?

³ Einwõt emwij ad katak ilo jinoin book in, Jesus ear mour moktalok jen ien an kar erom armij. Kar naetan “juõn wõt Nejin” Anij “e ar keutak” kinke Jehovah make ear kõmanman e. Elikin ien in Anij ear kajerbal Jesus bwe en kõmanman aolep men ko jet bwe ren mour. (Jon 3:18; Dri Kolosse 1:16) Elap an Jesus yokwe armij. (Jabõn Kennan 8:30, 31) Ejelok bwilõñ bwe Jehovah ear kãlet Nejin eo ear make keotak bwe en jerbale juõn men eaorõk kin armij ro, ro im rar itok iumin lia in mij!

4, 5. Mokta jen an Jesus itok ñan lal, ta eo Bible ear kalikar kin Inen Messiah eo?

⁴ Ke ear kwalok an bebe in ekajete Adam, Eve, im Satan ilo jikin kallip in Eden, Anij ear konono kin juõn Ri Lomor einwõt juõn “ine” eo enaj itok. Ine in, ak nejin, enaj walok im rupe aolep nana ko me Satan Devil eo, “serpent e ridto,” ear kõmmani. Ilo mol, Ine in im kar kallimur kake enaj kabedakilkil Satan im ro rej lore.​—Jenesis 3:15; 1 Jon 3:8; Reveles̃õn 12:9.

⁵ Iumin buki yiõ ko, jidik kin jidik Anij ear kalikar elõñ men ko kin Ine eo, im kar bar naetan Messiah eo. Einwõt an walok ilo chart eo ilo page 37, elõñ kanan ko rar kwalok kin tibdikin wãwen mour eo an ion lal. Ñan wanjoñok, en kar kijenmij wõt ilo an inek eñtan ko rejõkkar bwe en kajejjet ijo kunan ilo karõk eo an Anij.​—Aiseia 53:3-5.

ETKE MESSIAH EO ENAJ KAR MIJ

6. Ekkar ñan Daniel 9:24-26, Messiah eo en kar kõtõbrak ta, im ewi wãwen?

⁶ Kanan eo kar jeje ilo Daniel 9:24-26 (New World Translation) ear kanan bwe Messiah eo​—Eo Anij ear Kabite​—enaj kar kõtõbrak juõn un elap. Enaj kar itok ñan lal “ñan kajemlok kõtõrãi kien, kab kajemlok jerawiwi, im kõmman kõlajrak kin bwid, im bõktok ekajet jimwe” ñan indio. Messiah eo enaj kar jolok lia in mij jen armij ro retiljek ion lal. Ak ewi wãwen an naj kar kõmmane menin? Kanan eo ej kamelele bwe renaj kar “bukwe,” ak mõne bwe en mij.

7. Etke Ri Jew ro rar katok kin menin mour ko, im men kein rar annañelok ta?

⁷ Ri Israel ro jen etto rar iminene kin tokjen kõlajrak kin bwid. Ilo wãwen air kabuñ iumin Kien eo Anij ear lelok ikijen Moses, rar keini air katok kin menin mour ko. Men kein rar kakememej Ri Israel ro bwe armij rar aikwij juõn men ñan kõlajrak, ak kalibubu, jerawiwi ko air. Ri jilek Paul ear kamelele kin kien in ilo wãwen in: “Elañe ejelok katorlok bõtõktõk inem ejelok jeorlok jerawiwi.” (Hebrews 9:22, NW) Ri Christian ro rejjab bed iumin Kien Moses kin nan in kaiñi ko an, einwõt ñan kõmman katok ko. (Dri Rom 10:4; Dri Kolosse 2:16, 17) Rej bar jelã bwe katok kin menin mour ko reban jeorlok jerawiwi ko indio. Ilo mol, menin katok kein rar annañelok juõn menin katok eaorõklok​—eo an Messiah, ak Christ. (Dri Hibru 10:4, 10; keidi Dri Galetia 3:24.) Bõtab, kwo maroñ kajitõk wõt, ‘Ear aikwij in mij ke, Messiah eo?’

8, 9. Ta menin aorõk ko Adam im Eve rar luji, im ewi wãwen kõmman ko air ear jelet ro bwijjiir?

⁸ Aet, Messiah eo ear aikwij in mij bwe armij en bõk lomor. Ñan melele etke, jen reiliklok ñan jikin kallip in Eden im kajeoñ in melele kin joñan luj eo an Adam im Eve ke rar jumae Anij. Kar likit imair mour indio! Ke rar nejin Anij, kar ejelok air aikwiji juõn ri kõlajrak ikõtair. Ak ke rar karmijete kien Jehovah, rar luji men kein aolep im make bõktok jerawiwi im mij ion armij.​—Dri Rom 5:12.

⁹ Enañin einwõt ro jemed im jined mokta rar jerwane juõn jolet eaorõk, im rar make kelok ñan loan juõn roñ in muri. Adam im Eve rar lelok muri in ñan ro nejiir. Kinke jar jab lotak kin mour wãppen im anemkwoj jen jerawiwi, kij kajjojo dien jerawiwi im mij. Ñe jej bõk nañinmij ak kõnan ukwelok jen nan ko rejõkkar ad im rekametak, jej bõk wõnãn jolet eo ad​—mour jab wãppen. (Dri Rom 7:21-25) Kejatdikdik eo wõt ej bed ilo ad bar bõk men eo Adam ear luji. Bõtab, je ban make jibadbad ñan mour wãppen. Ke armij otemjej rej ri jerawiwi, kij aolep jej bõk wõnãn mij, jab mour.​—Dri Rom 6:23.

10. Kar aikwij ta ñan wiaik men eo Adam ear luji?

¹⁰ Bõtab, ewõr ke juõn menin kõrrã kin mour eo Adam ear make jerwane? Kien eo an Anij kin ekajet jimwe ej aikwiji jokkin wõt juõn, “mour kin mour.” (Exodus 21:23) Kin menin kar aikwij lelok mour an juõn bwe en kõllãiki kin mour eo ear jako. Mour an jabdewõt armij eban kabwe menin. Sam 49:7, 8 ej ba kin armij ri jab wãppen: “Ejelok juõn iair e maroñ in wiaik jatin man, im e ban lelok ñõn Anij binmour kin e. Bwe e aurõk binmour eo an, im ren likit e ñõn in drio.” Melelen ejelok ial in joor ke? Jab, ewõr.

11. (a) Ta melelen nan eo “binmour” ilo kajin Hebrew? (b) Wõn eo wõt ear maroñ binmouri armij, im etke?

¹¹ Ilo kajin Hebrew, nan eo “binmour” ej melelen joñan wõnãn eo rej kõllãiki ñan kanemkwoj juõn ri kamakoko im ej bar melelen joñan wõt juõn. Juõn armij eo ewãppen wõt emaroñ lelok juõn mour im ej joñan wõt mour eo Adam ear luji. Elikin Adam, armij eo wõt im ear lotak im wãppen kar Jesus Christ. Kin men in, Bible eo ej naetan Jesus “Adam eo elik” im ej kamol ñan kij bwe Christ “ear lelok e make bwe en juõn binmour eo ejejjet ñan armij otemjej.” (1 Dri Korint 15:45; 1 Timothy 2:5, 6, NW) Einwõt Adam ear lelok mij ñan ro nejin, jolet eo jen Jesus ej mour indio. Book in 1 Dri Korint 15:22 ej kamelele: “Bwe einwõt ilo Adam ro otemjej rej mij, ein drein bareinwõt ilo Kraist ro otemjej re naj mour.” Inem, ejejjet air naetan Jesus “Jemen ien in drio.”​—Aiseia 9:6, 7.

WÃWEN KAR KÕLLÃ BINMOUR EO

12. Ñããt eo Jesus ear erom Messiah eo, im ta ialin mour eo ear jibadõki elikin ien in?

¹² Ilo 29 C.E., ilo ien man añõneañ, Jesus ear jibadõk nukin, John bwe en baptais e im ilo wãwen in lelok e make ñan kõmanman ankil an Anij. Ilo ien in Jehovah ear kabit Jesus kin jitõb kwojarjar. Ilo wãwen in Jesus ear erom Messiah eo, ak Christ, eo Anij ear kabite. (Matu 3:16, 17) Inem Jesus ear jino an jerbal in kwalok nan iumin jilu-jimettan-yiõ. Ear diblok eneo enen, im kwalok nan kin Ailiñ in Anij im aintok ri kalor ro an retiljek. Bõtab, einwõt kar kanan kake, jumae ear jino walok nae e.​—Sam 118:22; Dri Jerbal 4:8-11.

13. Ta men ko rar tellok ñan mij eo an Jesus einwõt juõn eo ej debij wõt an tiljek?

¹³ Jesus ear beran in kalikar menin mon ko an ri tel in kabuñ ko, im rar bebe in mõne. Rar karõk ilo ittino juõn bebe enana im ekoba air karmijete, jõkkar in air kalbuje, ekajet riap, im air ba bwe ej nae kien. Rar ubrare Jesus, emmõje, kajirere kake, im deñõte kin juõn kein deñdeñ eo ej ñan kekel kanniekin. Ekajet eo an Pontius Pilate, komja in Rome kar bwe en mij ion juõn alal in eñtan. Rar dilaike ilo juõn alal in wijki im ear toto ie. An eñtan ke ear kate in menono kar le jen joñan, im ear eindein iumin elõñ awa ko mokta jen an mij. Ilo ien eñtan in, Jesus ear debij wõt an tiljek ewãppen ñan Anij.

14. Etke Anij ear kõtlok bwe Nejin en eñtan im mij?

¹⁴ Ilo wãwen in, ilo Nisan 14, 33 C.E., Jesus ear lelok an mour einwõt “juõn binmour in kõrrã ñan elõñ.” (Mark 10:45; 1 Timothy 2:5, 6, NW) Jen lañ, Jehovah ear lo Nejin ejitenburu bõk eñtan im mij. Etke Anij ear kõtlok bwe menin enana en walok? Kin an yokwe armij. Jesus ear ba: “Bwe kin an Anij yokwe lõl, E ar letok juõn wõt Nejin E ar keutak, bwe jabrewõt eo ej liki E en jab joko, a en mour in drio.” (Jon 3:16) Mij eo an Jesus ej bar katakin kij bwe Jehovah ej juõn Anij in ekajet ewãnik. (Duteronomi 32:4) Jet remaroñ kajitõk kin etke Anij ear jab jolok kien eo an kin mour en wõnãn mour im jab watõk wõnãn bwid eo an Adam. Un eo ej bwe Jehovah ej eddeb wõt ñan kien ko an ien otemjej im kautiejiir, meñe enaj lap wõnãn ñan e make.

15. Ke ejamin kar jimwe an Jesus jako indio, ta eo Jehovah ear kõmmane?

¹⁵ Ekajet jimwe eo an Jehovah ear bar watõk bwe mij eo an Jesus en jemlok ilo emõn. En kar juõn menin wãnik ke ñan likit Jesus eo ear tiljek bwe en kiki indio ilo mij? Alikar eban! Jeje ko in Hebrew kar kanan bwe ri tiljek eo an Anij ejamin bed wõt ilo lũp eo. (Sam 16:10; Jerbal 13:35) Ear kiki ke ear mij iumin mõttan jilu ran, inem Jehovah Anij ear kajerkakbijeik e ñan mour einwõt juõn jitõb eo ekajur.​—1 Piter 3:18.

16. Ta eo Jesus ear kõmmane ke ear jeblak ñan lañ?

¹⁶ Ke ear mij, Jesus ear lelok mour in armij eo an ñan indio. Ke ear jerkak ñan mour ilo lañ, ear erom juõn jitõb in kemour. Bar juõn, ke Jesus ear wanliñlok ñan ijo ekwojarjar tata ilañ, ear bar kobalok ibben Jemen eo ejitenburu ibben im lelok ñan E tokjen wõnãn mour in armij wãppen. (Dri Hibru 9:23-28) Tokjen mour in eaorõk ej kab naj maroñ jerbal kin armij ro rekiblie. Ta melelen menin ñan yuk?

BINMOUR EO AN CHRIST IM KWE

17. Ewi wãwen ad maroñ bõk jeorlok bwid jen katok in binmour eo an Christ?

¹⁷ Etale mõk jilu wãwen ko im katok in binmour eo an Christ ewõr tokjen im ej jelet yuk kiõ kiõ. Moktata, ej bõktok jeorlok bwid kin jerawiwi ko. Ikijen ad tõmak ilo bõtõktõkin Jesus, “ewõr kõtlok kin binmour eo ñan kij,” aet, “jolok nana ko ad.” (Ephesians 1:7, NW) Inem meñe jej bwid kin bwid elap, jemaroñ kajitõk ibben Anij kin jolok bwid ilo etan Jesus. Elañe emol ad ukwelok, Jehovah enaj maroñ kortokjen katok in binmour eo an Nejin ñan kij. Anij enaj jolok bwid ko ad, im kajerammõn kij kin juõn bõklikit emõn, jen an letok ekajet eddo kin mij kin ad jerawiwi.​—Jerbal 3:19; 1 Piter 3:21.

18. Ilo wãwen et katok eo an Jesus ej letok kejatdikdik?

¹⁸ Kein karuo, katok in binmour eo an Christ ej letok bedbedin ad kejatdikdik kin ran ko rej itok. Ilo juõn vision, ri jilek John ear lo bwe juõn “jar elap, eo ejelok armij ej maroñ in bwinir” renaj joor jen jorrãn eo ilo jemlokin jukjuk im bed in. Etke renaj joor jen ien in ñe Anij enaj kokkure ro jet relõñ? Juõn enjel ear jiroñlok John bwe jar eo elap rar “kwoli im kamouj nuknuk ko air ilo bõtõktõkin Lam,” Jesus Christ. (Reveles̃õn 7:9, 14) Toan wõt ad jerbale ad tõmak ilo bõtõktõkin Jesus Christ im mour ekkar ñan kien ko rekwojarjar, jenaj erreo iman mejen Anij im jenaj bõk kejatdikdik eo kin mour indio.

19. Ewi wãwen katok eo an Christ ej kamol bwe e im Jemen rej yokwe yuk?

¹⁹ Kein kajilu, katok in binmour eo ej menin kamol eo elaptata kin yokwe eo an Jehovah. Mij eo an Christ ear kalikar ruo wãwen yokwe ko relaptata im rej make wõt ilo aolepen bwebwenato ko ijoko otemjej ilañ im ilal: (1) Yokwe eo an Anij ilo an jilkintok Nejin bwe en mij kin kij; (2) Yokwe eo an Jesus ilo an lelok emake einwõt juõn binmour. (Jon 15:13; Ri Rom 5:8) Elañe jej jerbale ad tõmak ilo mol, yokwe in enaj kitibuji kijwõj kajjojo. Ri jilek Paul ear ba: “Nejin Anij . . . e ar yokwe iõ, im mõke lelok E kin iõ.”​—Ri Galetia 2:20; Ri Hibru 2:9; 1 Jon 4:9, 10.

20. Etke jej aikwij jerbale tõmak eo ad ilo katok in binmour eo an Jesus?

²⁰ Kin menin, jen kwalok ad kamolol kin yokwe eo Anij im Christ rar kwalok ikijen ad jerbale ad tõmak ilo binmour eo an Jesus. Ad kõmman eindein ej tel ñan mour indio. (Jon 3:36) Bõtab, lomor eo ad ejjab un eo elaptata kin an Jesus mour im mij ilal. Jaab, unleplep in an itok kar ikijen juõn aitwerõk elaplok, eo im ej jelet ijoko otemjej. Einwõt jenaj lo ilo katak in tok juõn, aitwerõk in ej jelet kij aolep kinke ej kalikar unin an Anij kõtlok bwe nana im eñtan etto air bedwõt mantak ilo lal in.

ETALE JELÃLOKJEN EO AM

Etke Jesus ear aikwij mij ñan lomoren armij?

Ewi wãwen kar kõllã kin binmour eo?

Ilo wãwen et ko kwoj bõk tokjen jen binmour eo?

[Pija eo ilo peij 67]