KATAK 10

Ñe Ewõr Rinañinmej ilo Baam̦le n̦e Am̦

1, 2. Ta ko Setan ear kõm̦m̦ani ñan kajjioñ in kabõjrak Job jãn an karejar ñan Anij?

BAIBÕL̦ ej kwal̦o̦k kõn juon em̦m̦aan etan Job me “ejjel̦o̦k en̦ ear m̦weiiel̦o̦k jãne ilo aelõñ ko irear.” Baam̦le eo an Job ear juon baam̦le em̦m̦an im em̦õn̦õn̦õ. Kar 10 nejin Job, 7 l̦addik im 3 leddik. Job ear kabwe aikuj ko an baam̦le eo an. Men eo eaorõktata in ej bwe ear tõl baam̦le eo an ilo aer kabuñ ñan Anij im ear kate bwe ajri ro nejin ren yokwe Jeova. Kõn an kar Job kõm̦m̦ani aolep men kein, aolep ro uwaan baam̦le eo an rar lukkuun epaake doon.​—Job 1:1-5, UBS.

² Setan, eo me el̦aptata an kõjdate Jeova Anij, ear loe bwe baam̦le eo an Job ear jeraam̦m̦an im m̦õn̦õn̦õ. Aolep iien Setan ej pukot wãween ko ñan kabõjrak ri karejar ro an Anij jãn aer karejar im tiljek ñan E. Kõn an kar Setan dike an Job tiljek ñan Anij, ear kõm̦m̦an bwe en wal̦o̦k men ko renana im rekabũrom̦õjm̦õj ñan baam̦le eo an. Tokãlik, Setan ear “kaeñtaan Job kõn wõt ko remetak jãn lo̦piden neen ñan mo̦ñin.” Setan ear l̦õmn̦ak bwe Job enaaj kar bõjrak jãn an karejar im tiljek ñan Jeova kõnke elukkuun eñtaan im nañinmej.​—Job 2:6, 7.

3. Ta men ko rar wal̦o̦k ñan Job ke ear nañinmej?

³ Baibõl̦ ejjab lukkuun kwal̦o̦k kain nañinmej rot eo Job ear bõke bwe en kõm̦m̦an an wõt aolepen ãnbwinnin. Bõtab, Baibõl̦ ej kwal̦o̦k kõn men ko rar wal̦o̦k ñan Job ke ear nañinmej. Ñan waanjoñak, ear likaakrak im kõt ãnbwinnin, im ear ãkilkil kilin. Ear lukkuun nana bwiin lo̦ñiin im ãnbwinnin. Ejjab men kein wõt ak ear lukkuun eñtaan kõn an metak. (Job 7:5, UBS; 19:17, UBS; 30:17, 30) Joñan an kar Job eñtaan, ekõn jijet ilo upaaj im kõjerbale juon kein jukkwe ñan kũrũj mejãn wõt ko an. (Job 2:8) Elukkuun kar nana nañinmej in an Job!

4. Ta eo ej wal̦o̦k ñan aolep baam̦le ko jãn iien ñan iien?

⁴ Enaaj kar ta l̦õmn̦ak n̦e am̦ ñe kwaar bõk juon nañinmej enana ãinwõt kar Job? Ilo raan kein, Setan ejjab kõm̦m̦an bwe ri karejar ro an Anij ren nañinmej ãinwõt an kar kõm̦m̦ane ñan Job. Bõtab, jejel̦ã bwe jãn iien ñan iien ro uwaan baam̦le ko ad renaaj baj nañinmej wõt. Renaaj nañinmej itok wõt jãn aer jab weeppãn, lukkuun m̦õk, im jãn an ettoonon lal̦ in. Meñe jej kate kõj ñan kõjparok ãjmour ko ad, ak jet iien jenaaj baj nañinmej wõt. Jet armej renaaj bõk nañinmej ko rel̦l̦ap ãinwõt kar Job. Ñe ewõr juon rinañinmej ilowaan juon baam̦le, men in emaroñ lukkuun pen ñan aolep ro uwaan baam̦le eo. Jen kiiõ etale naan in kakapilõk ko jãn Baibõl̦ me remaroñ jipañ kõj ñe ewõr juon rinañinmej ilo baam̦le eo ad.​—Ekklisiastis 9:11, UBS; 2 Timote 3:16.

TA L̦ÕMN̦AK N̦E AM̦ KÕN RINAÑINMEJ EO?

5. Ta ko ro uwaan juon baam̦le rej kõm̦m̦ani ñe juon iaaer enañinmej?

⁵ Ekkã an armej ro inepata ñe ej wõr oktak ko ilo mour ko aer. El̦ap an m̦ool men in ñe juon ilo baam̦le eo ad ej bõk juon nañinmej eto kitien im ekauwõtata. Meñe emaroñ kadu kitien nañinmej eo, ak aolep ro uwaan baam̦le eo renaaj aikuj kõm̦m̦an oktak ko im kaarmejjeteik kõn̦aan ko aer bwe ren jipañ rinañinmej eo. Ñan waanjoñak, ñe rinañinmej eo ej kiki, ro uwaan baam̦le eo remaroñ kadikl̦o̦k ainikier bwe ren jab ko̦kkure an kakkije. Bareinwõt, ñe ear wõr men en̦ rar kõn̦aan kõm̦m̦ane, remaroñ aikuj kaarmejjete kõn̦aan kein aer. Enañin aolep ro ilo kajjojo baam̦le ko, ekoba ajri ro, rej bũrom̦õj ñe juon ilo baam̦le eo aer ej nañinmej. Bõtab, jet iien rũtto ro remaroñ aikuj kakeememej ajri ro ñan l̦õmn̦ak kõn rinañinmej eo im pukot wãween ko remaroñ kõm̦m̦ani ñan jipañe. (Kolosse 3:12) Ñe ekadu kitien an nañinmej, epidodo an ro uwaan baam̦le eo jipañe. Rem̦õn̦õn̦õ in jipañ kõnke renaaj bar kõn̦aan bwe ro uwaan baam̦le eo aer ren jipañ er ñe rej nañinmej.​—Matu 7:12, UBS.

6. Ñe juon ilo baam̦le eo ad ebõk juon nañinmej ekauwõtata im eto kitien, ta eo emaroñ jino wal̦o̦k ñan ro jet uwaan baam̦le eo?

⁶ Ta eo ekkã an wal̦o̦k el̦aññe juon ilo baam̦le eo ad ej bõk juon nañinmej ekauwõtata im eto kitien? Ñan waanjoñak, ta ñe ej bõk juon iaan nañinmej ko ãinwõt mej rejetan ãnbwinnin, kããnjõr, jorrããn kõmãlij eo an, ak nañinmej ko jet? Ñe ej wal̦o̦k men in, ekkã an ro uwaan baam̦le eo bũrom̦õj ilo jinoin. Bõtab, kõn an oktakl̦o̦k im penl̦o̦k wãween aer mour, emaroñ jako aer bũrom̦õj im rej kiiõ watõk bwe ej juon eddo el̦ap ñan aer lale rinañinmej eo. Remaroñ jino m̦õk kake rinañinmej eo.

7. Ewi wãween an kar nañinmej eo an Job jelõte lio pãleen, im ta eo ear mel̦o̦kl̦o̦ke?

⁷ Lio pãleen Job ear bar m̦õk im lukkuun inepata. M̦oktata, ear mej aolep ajri ro nejierro. Tokãlik, ear bar wal̦o̦k jet men ko renana ñan baam̦le eo aerro. Ãliktata, ear loe an l̦eo pãleen bõk juon nañinmej me elukkuun nana im kaeñtaanan. Job ear juon em̦m̦aan ekajoor im ãjmour, im kõrã in ippãn ear loe an oktak im juon eo elukkuun m̦õjn̦o̦ im nañinmej. Joñan an kar lio pãleen Job bũrom̦õj im eñtaan kõn aolep men kein rar wal̦o̦k ñan erro, ear mel̦o̦kl̦o̦k men eo eaorõktata ilo mour eo aerro. Ta in? Kõtaan eo aerro ippãn Anij. Baibõl̦ ej ba: “Innem lio pãleen [Job] ear ba ñane, ‘Kwõj kõjparok wõt am̦ wãnõk ke? Kwõn kaarmejjete Anij im mej.’”—Job 2:9.

8. Eoon ta eo emaroñ jipañ kõj ñe ewõr juon rinañinmej ilo baam̦le eo ad?

⁸ Ekkã an armej ro inepata im illu ñe eoktakl̦o̦k im penl̦o̦k wãween aer mour kõn an wõr rinañinmej ilo baam̦le ko aer. Bõtab, ñe ej wõr juon rinañinmej ilo baam̦le ko ad, iien ko kein me rej lukkuun kaalikkar el̦aññe em̦ool ad yokwe armej eo. Yokwe eo em̦ool ej “meanwõd im jouj, . . . ejjab l̦õmn̦ak wõt kõn e make, . . . ejaje ebbeer, eban jako an tõmak im an kõjatdikdik im an kijenmej.” (1 Korint 13:4-7, UBS) Kõn men in, el̦aññe jej inepata ak illu kõn rinañinmej eo, jej aikuj kate kõj im kajim̦we wãween ad l̦õmn̦ak.​—Jabõn Kõnnaan 3:21.

9. Ñe juon ilo baam̦le eo ad ej bõk juon nañinmej ekauwõtata, ta naan in kaenõm̦m̦an ko me remaroñ jipañ kõj bwe jen kijenmej wõt im kõjparok wõt kõtaan eo ad ippãn Jeova?

⁹ Ñe ej wõr juon rinañinmej ilo juon baam̦le, ekkã an baam̦le ko make pepe kõn ta eo ekkar bwe ren kõm̦m̦ane ñan rinañinmej eo. Bok in ejjab kwal̦o̦k ñan kõj kilen taktõ ko ak kõm̦adm̦õd ko me jej aikuj l̦oori ñe ewõr rinañinmej ilo baam̦le ko ad. Ñe juon ilo baam̦le eo ad ej bõk juon nañinmej ekauwõtata, ta eo emaroñ jipañ kõj bwe jen kijenmej wõt im kõjparok wõt kõtaan eo ad ippãn Jeova? Baibõl̦ ej ba bwe Jeova ej “kajutak ro otemjej rejillo̦k” kõn aer bũrom̦õj im eñtaan. (Sam 145:14) Kiiñ Devid ear ba: “Em̦õn̦õn̦õ eo ej lale ro ri jeram̦õl; Jeova enaaj lo̦mo̦o̦ren ilo raan in jorrããn. Jeova enaaj kõjparoke im kaetokl̦o̦k an mour, . . . Jeova enaaj lale e ilo kinien ñe em̦õjn̦o̦.” (Sam 41:1-3) Jeova ej kõjparok im jipañ ri karejar ro an bwe en jab jorrããn kõtaan eo aer ippãn. Ej kõm̦m̦ane men in meñe ri karejar ro an rem̦õk im rej l̦õmn̦ak bwe rebane apañ ko rej iiooni. (2 Korint 4:7) Elõñ iaan ro me ewõr rinañinmej ilo baam̦le ko aer rej bõk ejja l̦õmn̦ak eo an juon iaan ro rar je bok in Sam ke ear ba: “O Irooj, elukkuun l̦ap aõ eñtaan; Kwõn kõjparok eõ bwe in mour wõt ãinwõt am̦ kar kallim̦ur!”—Sam 119:107, UBS.

KATE KOM̦ ÑAN M̦ÕN̦ÕN̦Õ WÕT

10, 11. (1) Ñe ewõr juon rinañinmej ilo juon baam̦le, ta eo ro uwaan baam̦le eo rej aikuj kõm̦m̦ane bwe ren maroñ kijenmej wõt? (2) Ta eo ear jipañ juon kõrã ñan kijenmej wõt ke ear nañinmej l̦eo pãleen?

¹⁰ Baibõl̦ ej ba: “Bũruon armej enaaj kõjparoke ilo an m̦õjn̦o̦; a wõn emaroñ wõnm̦aanl̦o̦k wõt ñe erup bũruon.” (Jabõn Kõnnaan 18:14) Ñe ewõr juon rinañinmej ilo juon baam̦le, ro uwaan baam̦le eo remaroñ eñtaan kõnke el̦ap aer bũrom̦õj. Bõtab, “bõro eo eineem̦m̦an ej kõm̦m̦an bwe ãnbwin eo en ãjmour.” (Jabõn Kõnnaan 14:30, UBS) El̦aññe juon baam̦le ej bũrom̦õj aolep iien, enaaj pen aer kijenmej. Bõtab, el̦aññe rej kate er bwe ren aenõm̦m̦an im m̦õn̦õn̦õ wõt, enaaj pidodol̦o̦k aer kijenmej.​—Lale Jabõn Kõnnaan 17:22, UBS.

¹¹ Juon kõrã ear kijenmej wõt ke ear mej rãjetin ãnbwinnin l̦eo pãleen. Jiljino iiõ ãlikin aerro kar m̦are, l̦ein ear bõk nañinmej in. Kõrã eo ear ba: “L̦eo pãleeõ ear jaje kõnnaan innem kõmro ar jab maroñ bwebwenato ippãn doon. Iar lukkuun m̦õk in kajjioñ mel̦el̦e kõn ta ko ej kajjioñ in ba.” Ejjab kõrã eo wõt ear bũrom̦õj im inepata. Baj l̦õmn̦ak m̦õk kõn joñan an l̦eo pãleen bar bũrom̦õj im eñtaan. Ta eo ear jipañ er ñan kijenmej wõt? Eokwe, kõrã eo ear kate wõt e ñan kõjparok kõtaan eo an ippãn Anij. Meñe ear pen aer etal ñan kweilo̦k ko kõnke ear ettol̦o̦k m̦weo im̦weerro, ak kõrã eo ear ekkeini an riit Naan in Keeañ im bok ko jet ad. Mel̦el̦e ko ilo bok kein rar kakajoore im jipañe bwe en lale im kõjparok l̦eo pãleen ium̦win 4 iiõ m̦ae iien ear mej.

12. Ta eo rinañinmej ro rej kõm̦m̦ane jet iien ñan jipañ im kaenõm̦m̦an ro uwaan baam̦le ko aer?

¹² Meñe Job ear nañinmej, ak e eo ear kajoor iaaerro lio ippãn. Ear ba ñan lio ippãn: “Ta, jen bõk em̦m̦an jãn pein Anij, im jen jab bõk nana jãn E ke?” (Job 2:10) Eñin unin an Jemes kar ba bwe Job ear juon joñak em̦m̦an kõn an jel̦ã kijenmej. Bok in Jemes 5:11 ej ba: “Kom̦ar roñ kõn an Job kijenmej, im kom̦ar lo jem̦l̦o̦k eo jãn Irooj, ekõjkan Irooj ekanooj jouj im tũriam̦okake.” Ilo raan kein, elõñ rinañinmej ro rej l̦oore joñak in an Job. Kõn an rinañinmej rein peran im kajoor, men in ej jipañ im kaenõm̦m̦an ro jet uwaan baam̦le ko aer.

13. Ñe ej wõr rinañinmej ilo juon baam̦le, ta eo ro uwaan baam̦le eo rej aikuj kõjparok bwe ren jab kõm̦m̦ane?

¹³ Elõñ armej rej ba bwe ke ear jino wõr rinañinmej ilo baam̦le ko aer, rekar jab lukkuun mel̦el̦e bwe enaaj oktakl̦o̦k im penl̦o̦k wãween aer mour. Armej rein rej bar ba bwe elukkuun aorõk bwe ro ilo juon baam̦le ren mel̦el̦e bwe mour ko aer reban ãinwõt m̦okta kõnke rej iioon wãween in. Emaroñ pen ilo jinoin, bõtab el̦aññe rej kate er, renaaj imminene kõn aolep oktak ko rar aikuj kõm̦m̦ani. Rej aikuj kõjparok bwe ren jab keidi wãween mour ko aer ñan baam̦le ko jet. Ren jab l̦õmn̦ak bwe epidodol̦o̦k wãween an armej rein mour jãn er kõnke ejjel̦o̦k rinañinmej ilo baam̦le ko aer. Keememej bwe aolep armej rej iioon apañ ilo mour ko aer, bõtab enañin aolep iien jejjab jel̦ã kain apañ rot ko rej iiooni. Jekdo̦o̦n ta apañ ko jej iiooni, naan ko an Jijej remaroñ kaenõm̦m̦an kõj aolep. Ear ba: “Kom̦win itok ñan ippa, kom̦ otemjej rej jerbal im ban, im inaaj kakkijeik kom̦.”—Matu 11:28.

KÕM̦M̦ANI PEPE KO REM̦M̦AN

14. Ñe ewõr rinañinmej ilo juon baam̦le, ta eo rej aikuj kõm̦m̦ane m̦okta jãn aer kõm̦m̦ani pepe ko?

¹⁴ Baibõl̦ ej ba: “Ijo elõñ ri pepe, em̦õj kapen l̦õmn̦ak ko.” (Jabõn Kõnnaan 15:22) El̦aññe ewõr juon rinañinmej ilo baam̦le n̦e am̦, naan in kakapilõk in emaroñ jipañ kom̦. M̦okta jãn an baam̦le eo kõm̦m̦ani pepe ko, rej aikuj jijet ippãn doon im bwebwenato kõn aolep men ko rej wal̦o̦k ñan baam̦le eo itok wõt jãn an wõr rinañinmej. Ñe baam̦le eo ej jijet ippãn doon im bwebwenato kõn men kein, em̦m̦an ñe rej jar im l̦oori naan in tõl ko jãn Baibõl̦. (Sam 25:4) Ewõr pepe ko me baam̦le ko rej aikuj kõm̦m̦ani me renaaj jelõt er aolep. Ñan waanjoñak, rej aikuj pepe ippãn doon kõn men kein: Wõn eo enaaj kauuk rinañinmej eo? Ta ko ro jet uwaan baam̦le eo remaroñ kõm̦m̦ani ñan jipañ? El̦aññe em̦õj an alikkar wõn eo enaaj kauuk rinañinmej eo, enaaj ke maroñe eddo in an? Im ta ko ro jet ilo baam̦le eo remaroñ kõm̦m̦ani ñan jipañ ri kau eo bwe en wõr an iien ñan e make im ñan an kõm̦m̦an bwe en epaak wõt kõtaan eo an ippãn Anij?

15. Ñe ewõr rinañinmej ilo juon baam̦le, ewi wãween an Jeova jipañ baam̦le in?

¹⁵ Kwõj aikuj jar ñan Jeova im kajjitõk bwe en jipañ kom̦, kõl̦mãnl̦o̦kjen̦ kõn men ko kwõj riiti ilo Baibõl̦, im l̦oori naan in kakapilõk ko ilo Baibõl̦. Ñe kwõnaaj kõm̦m̦ani men kein, elõñ tokjãn ko renaaj wal̦o̦k ñan baam̦le n̦e am̦. Rinañinmej eo emaroñ jab mour jãn nañinmej eo an. Bõtab, el̦aññe kwõj lõke Jeova, enaaj jipañ im kaenõm̦m̦an eok. (Sam 55:22, UBS) Juon iaan ro rar je bok in Sam ear ba: “Am̦ yokwe el̦ap O Jeova ear bo̦ur eõ. Ke elõñ inepata ilo bũruõ, am̦ naan in kaenõm̦m̦an ej kalañlõñ aõ.”—Sam 94:18, 19; bar lale Sam 63:6-8, UBS.

JIPAÑ AJRI RO ILO BAAM̦LE EO

16, 17. Ta ko rũtto ro remaroñ kõm̦m̦ani ñan jipañ ajri ro reddik nejier ñe juon iaan ro nejier enañinmej?

¹⁶ Ejjab pidodo ñan ajri ro ñe ewõr juon rinañinmej ilo baam̦le ko aer. Eñin unin rũtto ro rej aikuj bwebwenato ippãn ajri ro nejier kõn oktak ko me rej wal̦o̦k ilo baam̦le eo aer. Rej aikuj bar kwal̦o̦k ñan ajri ro kõn ta ko remaroñ kõm̦m̦ani ñan jipañ rinañinmej eo. Ak ta ñe rinañinmej eo ej juon iaan ajri ro nejũm̦? Ñe ej wal̦o̦k men in, kwõj aikuj kaalikkar ñan ajri ro jet nejũm̦ bwe kwõj yokwe er aolep meñe kwõj jol̦o̦k el̦ap iien ippãn ajri eo me enañinmej. Rũtto ro rej aikuj kõjparok bwe ajri ro nejier ren jab jino ebbanban ak dike ajri eo jeier ak jatier me enañinmej. Rej aikuj jipañ ajri ro nejier ñan kal̦apl̦o̦k aer yokwe eo jeier ak jatier me enañinmej. Remaroñ kõm̦m̦ane men in ilo aer jipañ doon ñan lale rinañinmej eo.

¹⁷ El̦aññe ajri ro nejũm̦ rej dik wõt, kwõj aikuj keememej bwe reban lukkuun mel̦el̦e kõn nañinmej eo an ajri eo juon. Kõn men in, bwebwenato ippãer kõn men ko me renaaj mel̦el̦e kaki. Ñan waanjoñak, kwõmaroñ kwal̦o̦k ñan er bwe ajri eo juon ejjab em̦m̦an ãjmour eo an ãinwõt er. Bareinwõt, kwal̦o̦k ñan er bwe elõñ men ko me ajri in eban kõm̦m̦ani ãinwõt er, kõnke enañinmej im em̦õjn̦o̦. El̦aññe ajri rein rej kile men kein, renaaj jino bũrom̦õj kõn ajri in jeier ak jatier. Kõn men in, enaaj l̦apl̦o̦k aer “yokwe” im kwal̦o̦k “jouj” ñane.​—1 Piter 3:8.

18. (1) Ñe ewõr rinañinmej ilo juon baam̦le, ta ko rũtto ro remaroñ kõm̦m̦ani ñan jipañ jo̦dikdik ro nejier? (2) Ta ko jo̦dikdik ro remaroñ katak kilen kõm̦m̦ani ñe ewõr rinañinmej ilo baam̦le ko aer?

¹⁸ Rũtto ro rej aikuj jipañ jo̦dikdik ro nejier ñan kile bwe enaaj oktakl̦o̦k im penl̦o̦k aer mour kõnke ewõr rinañinmej ilo baam̦le eo. Rej aikuj kõmel̦el̦eik er bwe enaaj dikl̦o̦k an baam̦le eo jããn kõnke rej aikuj kõl̦l̦ã on̦ean taktõ im menin aikuj ko jet an rinañinmej eo. El̦aññe em̦m̦an wãween an rũtto ro kõnnaan im kõm̦m̦an ñan jo̦dikdik ro nejier, jo̦dikdik rein reban inepata ak illu ñe rũtto ro rejjab maroñ wiaiki men ko rekõn̦aan ãinwõt kar m̦okta. Renaaj m̦õn̦õn̦õ in kaarmejjeteik kõn̦aan ko aer ñan jipañe eo jeier ak jatier kõnke remel̦el̦e bwe elukkuun eñtaan kõn nañinmej eo an. Elõñ rũtto ro rar kõjerbale iien eo me ewõr rinañinmej ilo baam̦le ko aer ñan katakin im jipañ ajri im jo̦dikdik ro nejier bwe ren l̦oori naan in kakapilõk ko an Paul. Ear ba: “Kom̦win jab kõm̦m̦an jabdewõt kõn juunm̦aad im kõn ami kõn̦aan kõmmejãje; Ak kom̦win kõttãik kom̦ ñan doon, im jab l̦õmn̦ak kom̦ em̦m̦anl̦o̦k jãn ro jet. Kom̦win l̦õmn̦ak kõn kõn̦aan ko an ro jet, im jab l̦õmn̦ak kõn kõn̦aan ko wõt ami make.”—Pilippai 2:3, 4, UBS.

KEIN TAKTÕ IM KÕM̦ADM̦ÕD KO

19, 20. (1) Ñe ewõr rinañinmej ilo juon baam̦le, ta eddo eo an bõran baam̦le eo? (2) Meñe Baibõl̦ ejjab juon bok in taktõ, ewi wãween an maroñ jipañ kõj ñe ewõr rinañinmej ilo baam̦le ko ad?

¹⁹ Kũrjin ro me epaak kõtaan eo aer ippãn Jeova rejjab m̦akoko in taktõ im pukot kein kõm̦adm̦õd ko me rejjab n̦ae Baibõl̦. Ñe juon iaan baam̦le ko aer ej nañinmej, rej m̦õkaj im bõkl̦o̦ke bwe en taktõ bwe en dikl̦o̦k an eñtaan. Jet iien eoktak l̦õmn̦ak ko an taktõ ro jãn doon. Em̦m̦an ñe jej etali aolep l̦õmn̦ak kein aer bwe jen maroñ pepe ta kõl ko jekõn̦aan bwe taktõ ro ren kõjerbali. Bareinwõt, ilo raan kein elõñl̦o̦k nañinmej ko rekããl im ejjel̦o̦k unokaer. Jet iien, ejjab em̦m̦an kein kõm̦adm̦õd ko im taktõ ro rejaje nañinmej rot eo an armej eo. Ñe men in ej wal̦o̦k, ta eo Kũrjin ro rej aikuj kõm̦m̦ane?

²⁰ Juon iaan ro me rar je Baibõl̦ ear juon taktõ. Bareinwõt, rijjilõk Paul ekõn lel̦o̦k naan in kakapilõk ko ñan Timote ñan jipañe kõn nañinmej eo an. Meñe ãindein, ak Baibõl̦ ejjab juon bok in taktõ. Ej juon bok me ej jipañ kõj bwe en jim̦we wãween ad mour im ej katakin kõj kõn Anij. (Kolosse 4:14, UBS; 1 Timote 5:23) Kõn men in, ej an bõran baam̦le ko eddo ñan pepe kõn kein kõm̦adm̦õd rot ko renaaj kõm̦m̦ani ñan rinañinmej eo. Bõlen enaaj kappok mel̦el̦e ko jãn elõñl̦o̦k jãn juon wõt taktõ. (Lale Jabõn Kõnnaan 18:17, UBS.) Ro me rej bõran baam̦le ko rej kate er joñan wõt aer maroñ bwe rinañinmej ro ilo baam̦le ko aer ren bõk uno im kein kõm̦adm̦õd ko rem̦m̦antata. Ekkã aer ilo̦k ñan ippãn taktõ ro ilo aujpitõl̦ ko ñan kappok jipañ. Ro jet rej pukot wãween kõm̦adm̦õd ko jet me rejjab jãn aujpitõl̦. Ej aer bar make pepe el̦aññe rekõn̦aan kõm̦m̦ane men in. Bõtab, eaorõk bwe ren kõtl̦o̦k bwe ‘naan in Anij en l̦aam̦ ñan neer, im meram ñan aer ial̦.’ (Sam 119:105) Aolep iien rej aikuj l̦oori naan in kakapilõk ko ilo Baibõl̦. (Aiseia 55:8, 9, UBS) Kõn men in, Kũrjin ro rejjab etal ippãn ri uno ro ak bõk jabdewõt uno ko me ewõr m̦antin kajjetõbtõb im anijnij ie. Kũrjin ro rej kõjparok er jãn jabdewõt kain uno ko im kein kõm̦adm̦õd ko me rej n̦ae Baibõl̦.​—Sam 36:9, UBS; Jerbal 15:28, 29; Revelesõn 21:8, UBS.

21, 22. (1) Ewi wãween an kar juon kõrã ilo Eijia kõjerbale mel̦el̦e ko ilo Sam 127:3 ñan kõm̦m̦ane juon pepe eaorõk? (2) Etke jemaroñ ba bwe kõrã in ear kõm̦m̦ane juon pepe em̦m̦an?

²¹ L̦õmn̦ak kõn bwebwenato in kõn juon kõrã ilo Eijia. Ãlikin an jino katak Baibõl̦ ippãn Ri Kõnnaan ro an Jeova, ear l̦otak niñniñ eo nejin meñe ear jauñ an allõñ. Niñniñ in ear juon leddik im kar 3 jim̦a bo̦unin. Kõrã in ear lukkuun bũrom̦õj ke taktõ eo ear ba bwe leddik in nejin enaaj utam̦we im eban jel̦ã etetal. Taktõ eo ear rõjañe kõrã in bwe en aje niñniñ in nejin ñan aujpitõl̦ ko me rej lale ro reutam̦we. L̦eo pãleen kõrã eo ear jaje en ta. Ta eo kõrã in ear kõm̦m̦ane?

²² Kõrã eo ej ba: “Iar keememej eoon eo ilo Baibõl̦ me ej ba bwe ‘ajri ro rej menin letok jãn Irooj, im rej kakõl̦l̦en an kajeraam̦m̦an kõj.’” (Sam 127:3, UBS) Kõnke kõrã in ear watõke niñniñ eo nejin ãinwõt juon “menin letok” jãn Jeova, ear pepe in lale im kõjparoke. Ear jab pidodo ilo jinoin, bõtab ro m̦õttan ilo eklejia eo an Ri Kõnnaan ro an Jeova rar jipañe. Kõn men in, ear pidodol̦o̦k an kõrã in lale im jipañe leddik eo nejin. Joñoul ruo iiõ ko tokãlik, leddik eo nejin ear kobal̦o̦k ilo iien kweilo̦k ko ilo Im̦õn Kweilo̦k eo im ear epaake ajri ro jet ilo eklejia eo. Kõrã in ej wõnm̦aanl̦o̦k im ba: “Ilukkuun m̦õn̦õn̦õ bwe naan in kakapilõk ko ilo Baibõl̦ rar jipañ eõ ñan kõm̦m̦ane pepe eo ejim̦we. Baibõl̦ ear jipañ eõ ñan kõm̦m̦ane juon pepe me Jeova Anij ear m̦õn̦õn̦õ kake. Ear bar jipañ eõ ñan jab kõm̦m̦ani pepe ko me inaaj kar ajl̦o̦k kaki toon wõt aõ mour.”

23. Ta kallim̦ur eo ilo Baibõl̦ me emaroñ kaenõm̦m̦an rinañinmej ro kab ro rej kauuk er?

²³ M̦õttan jidik eban bar wõr rinañinmej. Ri kanaan Aiseia ear kwal̦o̦k kõn iien eo me ejjel̦o̦k juon enaaj ba, “Inañinmej.” (Aiseia 33:24) Ejjabto jãn kiiõ, kallim̦ur in enaaj jejjet kitien ilo pedetaij eo ijin ioon lal̦. M̦ae tõre en̦, armej ro renaaj wõnm̦aanl̦o̦k wõt im nañinmej im mej. Bõtab, jej m̦õn̦õn̦õ bwe naan ko an Anij ilo Baibõl̦ remaroñ jipañ kõj. L̦õmn̦ak ko an armej ro im naan in kakapilõk ko aer rej oktak jãn iien ñan iien. Bõtab naan in kakapilõk ko ilo Baibõl̦ reban oktak im renaaj jipañ kõj ñan indeeo. Kõn men in, armej ro me rej l̦oore Baibõl̦ rej errã ilo naan ko an juon iaan ro me rar je bok in Sam ke ear ba: “Kien ko an Irooj rejim̦we; Em̦õn̦õn̦õ ro rej pokaki. Naan in kaiñ ko an relukkuun jim̦we im rej kalol̦o̦kjen̦ kõj. . . . Ekajet ko an Irooj rejejjet im iien otemjej rejim̦we. . . . Kõn aõ pokaki aolepeer enaaj wõr aõ jinõkjeej.”—Sam 19:7, 9, 11, UBS.

EWI WÃWEEN AN NAAN IN KAKAPILÕK KEIN JÃN BAIBÕL̦ JIPAÑ . . . RO ME EWÕR RINAÑINMEJ ILO BAAM̦LE KO AER?

Yokwe ej meanwõd im ejel̦ã kijenmej.—1 Korint 13:4-7, UBS.

Eaorõk bwe en aenõm̦m̦an wõt bũruod.—Jabõn Kõnnaan 18:14.

M̦okta jãn ad kõm̦m̦an pepe ko, eaorõk bwe jen bwebwenato ippãn doon.​—Jabõn Kõnnaan 15:22.

Ñe jej iiooni apañ ko, Jeova ej m̦õn̦õn̦õ in jipañ kõj.​—Sam 55:22, UBS.

Naan ko an Jeova ilo Baibõl̦ remaroñ jipañ kõj iien otemjej.​—Sam 119:105.

[Pija eo ilo peij 137]

Ej alikkar joñan am̦ yokwe eo pãleem̦ ñe kwõj jipañe ilo an nañinmej

[Pija eo ilo peij 145]

Baam̦le ko remaroñ kõm̦adm̦õdi elõñ iaan apañ ko aer el̦aññe rej m̦õn̦õn̦õ in jipañ doon