Etke Em̦m̦an Ñe Jej Kobal̦o̦k im Kõm̦m̦ao Ippãn Kũrjin ro M̦õttad?

Kõmij ekkeini am kweilo̦k ippãn doon jekdo̦o̦n ñe kõmij aikuj etetal ibul̦õn mar ko, ium̦win det jilõñlõñ im wõt mijeljel. Ri Kõnnaan ro an Jeova rej kate er ñan kobal̦o̦k im kõm̦m̦ao ippãn ri tõmak ro m̦õttaer meñe el̦ap aer m̦õk im poub ilo mour ko aer. Etke?

Em̦m̦an ñan kõj. Rijjelõk Paul ear ba bwe “jen l̦õmn̦ak kake doon im jipañ doon.” Paul ear kõnnaan kõn ro me jej kõm̦m̦ao ippãer ilowaan eklejia eo. (Hibru 10:24, UBS) Ñe jej “l̦õmn̦ak kake doon,” ej mel̦el̦ein bwe jej aikuj jel̦ã kajjien doon. Naan kein an rijjelõk Paul rej rõjañ kõj bwe jen l̦õmn̦ak kõn ro jet. Ilo ad jel̦ãl̦o̦k kajjien ro ilo eklejia eo, jemaroñ kile bwe elõñ iaaer rar kate er im lo tõprak meñe rar iioone ejja apañ ko wõt me jej iiooni kiiõ. Armej rein remaroñ jipañ kõj bwe jen kate wõt kõj im lo tõprak.

Jem̦jerã ko rem̦m̦an. Ilo iien kweilo̦k ko amim, kõmij kobal̦o̦k ippãn ro jeram repaak. Ilo iien ko jet, kõmij koba ippãn doon im m̦õn̦õn̦õ ippãn doon. Ewi wãween iien kein rej jipañ kõm? Eokwe, iien kein rej kõm̦m̦an bwe en l̦apl̦o̦k am kaorõk doon im kal̦apl̦o̦k am yokwe doon. Kõn men in, ñe juon iaam ej ioon apañ ko ilo mour eo an, kõmij m̦õkaj im jipañe kõnke ej epaake kõm kadede. (Jabõn Kõnnaan 17:17) Ilo amim kobal̦o̦k ippãn aolep ro uwaan eklejia eo am, kõmij kwal̦o̦k bwe kõmij “jim̦or kõjparok doon.”​—1 Korint 12:25, 26.

Kõmij rõjañ eok bwe kwõn m̦õttaik im jerãik armej ro me rej kabuñbũruon Anij. Ri Kõnnaan ro an Jeova rej kõm̦m̦ane men in. Jouj im jab kõtl̦o̦k bwe jabdewõt men en kabõjrak eok jãn am̦ kobatok im kõm̦m̦ao ippem.

• Etke em̦m̦an bwe jen koba ippãn doon ilo iien kweilo̦k ko?

• Ñããt eo kokõn̦aan itok im kweilo̦k ippem bwe kwõn jel̦ãl̦o̦k kajjien Ri Kõnnaan ro an Jeova ilo bukwõn eo am̦?