Jipañ L̦õm̦aro ñan Kõm̦m̦an Wõnm̦aanl̦o̦k ko ilo M̦ool Eo
“Jãn kiiõ im ilo̦k kwõnaaj ri eo̦ñõd armej.”—LUK 5:10, UBS.
1, 2. (1) Ewi wãween an kar elõñ em̦m̦aan ro em̦m̦akũt ke rar roñjake an Jijej kwal̦o̦k naan? (2) Ta eo jenaaj etale ilo katak in?
JIJEJ im rũkal̦oor ro an rar poub in kwal̦o̦k naan ilo Galili. Juon raan rar uwe ilo juon wa im etal im kakkije ilo juon jikin ejjel̦o̦k armej ie. Ak juon jarlepju in armej ar l̦oor er iparijet l̦o̦k. Ekar wõr “enañin l̦alem to̦ujin [em̦m̦aan ro], ijello̦kun kõrã im ajri.” (Matu 14:21, UBS) Ilo bar juon iien, juon jar in armej ar itok ñan ippãn Jijej. Rar kõn̦aan bwe en kõmour er jãn nañinmej ko aer im rar kõn̦aan roñjake an katakin. Ilo tõre in, oran em̦m̦aan ro kar “emãn to̦ujin, ijello̦kun kõrã im ajri.” (Matu 15:38, UBS) Innem, jej lo bwe elõñ em̦m̦aan ro rar pãd ibwiljin armej ro rar itok ñan ippãn Jijej im rar kwal̦o̦k aer itoklimo kõn katak ko an. Ak Jijej ear jel̦ã bwe enaaj bar lõñ armej ro renaaj m̦õn̦õn̦õ in katak im mour ekkar ñan men ko rar katak kaki. Jejel̦ã kõn men in kõnke ãlikin an kar Jijej kõm̦m̦ane menin kabwilõñlõñ eo ilo an kar kobrak ok eo an rũkal̦oor ro an kõn ek, ear ba ñan Saimõn: “Jãn kiiõ im ilo̦k kwõnaaj ri eo̦ñõd armej.” (Luk 5:10, UBS) Jijej ear ba bwe jerbal in kwal̦o̦k naan eo aer ear ãinwõt ñe rej eo̦ñõd. Im emaroñ jipañ er ñan pukot elõñ armej ro me rekõn̦aan jel̦ã kõn Jeova im pokake naan ko an ekoba elõñ em̦m̦aan ro.
2 Rainin, elõñ em̦m̦aan ro im rej itoklimo in roñjake ñe jej kwal̦o̦k naan ippãer. Rej m̦õn̦õn̦õ in katak Baibõl̦ ippãd. (Matu 5:3) Ewõr jet em̦m̦aan ro rej jino katak kõn Anij ak rejjab kõm̦m̦an wõnm̦aanl̦o̦k ko ilo m̦ool eo. Ewi wãween jemaroñ jipañ rein? Ke Jijej ear kwal̦o̦k naan ear jab oktak wãween an kar kwal̦o̦k naan ippãn em̦m̦aan ro jãn ro jet. Ak ear kõn̦aan jipañ er kõnke ewõr jet men ko im el̦aptata an kar em̦m̦aan ro inepata im l̦õmn̦ak kaki. Ilo katak in, jenaaj katak kõn ewi wãween an kar Jijej jipañ em̦m̦aan ro im ewi wãween jemaroñ anõke joñak eo an. Jenaaj etale jilu men ko: (1) ñe juon em̦m̦aan ej inepata kõn jããn, (2) ñe juon em̦m̦aan ej mijak ta ko armej renaaj ba, im (3) ñe juon em̦m̦aan ej l̦õmn̦ak bwe em̦m̦anl̦o̦k ro jet jãn e.
Ñe Juon Em̦m̦aan Ej Inepata kõn Jããn
3, 4. (1) Ta eo elõñ em̦m̦aan ro rej l̦õmn̦ak bwe el̦ap an aorõk? (2) Etke jet em̦m̦aan rej l̦õmn̦ak bwe el̦apl̦o̦k an aorõk jããn im jerbal jãn aer katak Baibõl̦ im pokake naan ko ie?
3 Juon em̦m̦aan etijem̦l̦o̦k kõn Kien Moses, ear ba ñan Jijej: “Ri Kaki, inaaj l̦oor eok ijo jabdewõt kwõj ilo̦k ie l̦o̦k.” Jijej ear ba ñan e bwe “Nejin armej ejjel̦o̦k jikin an kababu bõran.” Baibõl̦ ejjab ba bwe l̦ein ear erom rũkal̦ooran Jijej. Bõlen em̦m̦aan in emaroñ kar inepata kõn ia eo enaaj kiki ie im enaaj m̦õñã ta.—Matu 8:19, 20.
4 Elõñ em̦m̦aan ro rej l̦õmn̦ak bwe el̦apl̦o̦k an aorõk jããn im jerbal jãn aer katak Baibõl̦ im pokake naan ko ie. El̦apl̦o̦k an aorõk ippãer ñan bõk juon aer tiikri im pukot juon jerbal el̦ap on̦ean. Rejel̦ã bwe rej aikuj jããn ñan mour kajjojo raan. Innem rej l̦õmn̦ak bwe el̦apl̦o̦k an jããn im jerbal maroñ jipañ er jãn ñe renaaj katak Baibõl̦ im erom juon jeran Anij. Remaroñ itoklimo kõn men ko rej katak kaki jãn Baibõl̦ eo. Ak “inepata ko an lal̦ in im m̦on̦ an m̦weiuk ko” remaroñ kabõjrak er jãn aer kal̦apl̦o̦k aer jel̦ã kõn Anij ak pokake naan ko an Anij. (Mark 4:18, 19) Bõtab, Jijej ear jipañ rũkal̦oor ro an ñan kããlõt men eo el̦aptata an aorõk, im jemaroñ anõke joñak eo an.
5, 6. Ta eo ear jipañ Andru, Piter, Jemes, im Jon ñan jel̦ã ewi jerbal eo el̦aptata an aorõk?
5 Andru im Saimõn Piter rar ri eo̦ñõd. L̦õm̦arein rej jemjati. Rar jerbal ippãn Jon im l̦eo jein etan Jemes, im ippãn Zebedi jemen l̦õm̦arein. Ear em̦m̦an peejnej in eo̦ñõd eo aer, im elõñ aer ri jerbal. (Mark 1:16-20, UBS) Jinoin an kar Andru im Jon roñ kõn Jijej jãn Jon Ri Peptaij, rar lukkuun tõmak bwe Jijej ej Messaia eo. Innem Andru ear karoñ Saimõn Piter kõn Jijej, im bõlen Jon ear bar kõjjel̦ãik Jemes kõn men in. (Jon 1:29, 35-41) Jet allõñ tokãlik, Jijej ear kwal̦o̦k naan ilo Galili, Judia, im Sameria, im rũkal̦oor rein emãn rar etal ippãn l̦o̦k. Innem ãlikin rar bar jepl̦aak ñan peejnej in eo̦ñõd eo aer. Rar itoklimo kõn katak ko an Jijej, ak ilo iien eo rar jab l̦õmn̦ak bwe jerbal in kwal̦o̦k naan ej jerbal eo eaorõktata.
6 Tokãlik, Jijej ear kũr Piter im Andru bwe ren l̦oore im erom “ri eo̦ñõd armej.” Ta eo Piter im Andru rar kõm̦m̦ane? Baibõl̦ eo ej ba bwe “e m̦õkaj aer ilo̦k jãn ok ko aer im l̦oor e.” Im Jemes im Jon rar bar kõm̦m̦ane men in. “Em̦õkaj aer to im ilo̦k jãn wa eo im jemãer im l̦oor e.” (Matu 4:18-22) Ta eo ear jipañ l̦õm̦arein ñan pepe in wũjlepl̦o̦k aolep iien ko aer ilo kwal̦o̦k naan? Alikkar bwe rar lukkuun kõl̦mãnl̦o̦kjen̦ kõn pepe in aer. Rar itoitak ippãn Jijej ium̦win jet allõñ ko im rar roñjake katak ko an. Rar bareinwõt lo menin kabwilõñlõñ ko ear kõm̦m̦ani im an kijejeto kõn men eo ejim̦we. Rar lo bwe armej ro rar itoklimo kõn katak ko an Jijej. Tokjãn men in, ear kajoorl̦o̦k aer tõmak im lõke Jeova.
7. Ewi wãween jemaroñ katakin ri katak ro ad ñan lõke Jeova?
7 Ewi wãween jemaroñ anõke joñak eo an Jijej im katakin ri katak ro ad ñan lõke Jeova? (Jabõn Kõnnaan 3:5, 6) Jemaroñ jipañ er ikijjeen wãween ad katakin er. Ñe jej katak ippãer, jemaroñ kwal̦o̦k ñan er bwe Jeova enaaj kajeraam̦m̦an kõj ñe jej likũt Aelõñ eo m̦oktata. (Riit Malakai 3:10, UBS; Matu 6:33.) Jemaroñ kwal̦o̦k ñan er eoon ko ilo Baibõl̦ eo bwe Jeova ej kabwe aikuj ko an ro doon iien otemjej. Jej aikuj keememej bwe ri katak ro ad remaroñ bar katak jãn joñak ko ad. Ñe jej kwal̦o̦k ñan ri katak ro ad kõn wãween an kar Jeova jipañ kõj, men in emaroñ jipañ er bwe ren katak ñan lõke Jeova. Jemaroñ bar kwal̦o̦k bwebwenato ko an ro jet ilo bok ko ad.a (Lale kõmel̦el̦e eo itulal̦.)
8. (1) Etke eaorõk ñan an ri katak eo ad “edjoñ im lo bwe Jeova e jouj”? (2) Ewi wãween jemaroñ jipañ ri katak eo ad ñan lo bwe Jeova ejouj?
8 Bwe en kajoor tõmak eo an ri katak eo ad, ejabwe ñan an baj riit im roñ kõn wãween an kar Jeova kajeraam̦m̦an ro jet. Enaaj kajoorl̦o̦k tõmak eo an ñe ej lo an Jeova jipañ e ilo mour eo an. Sam 34:8 ej ba: “O kwõn edjoñ im lo bwe Jeova e jouj; e m̦õn̦õn̦õ eo ej lõke E.” Ewi wãween jemaroñ jipañ ri katak eo ad ñan kile bwe Jeova ejouj? Ta el̦aññe ewõr an ri katak eo ad apañ kõn jããn? Bõlen ej kajjioñ in bõjrak jãn m̦anit ko an renana ãinwõt kõbaatat, meme betel nut, iukkure kõn jããn, ak kadek. (Jabõn Kõnnaan 23:20, 21; 2 Korint 7:1; 1 Timote 6:10) Jemaroñ katakin e ñan jar ñan Anij bwe en jipañ e ñan jol̦o̦k men kein. Ñe ej lo bwe ear maroñ anjo̦ ioon m̦anit kein, enaaj kile bwe Jeova ear jipañ e. Innem jemaroñ rõjañ e ñan likũt m̦oktata Jeova ilo mour eo an. Jemaroñ jipañ e ñan kile bwe ej aikuj katak Baibõl̦ kajjojo wiik, im kõpooj katak ko ñan kweilo̦k ko im ekkeini an kweilo̦k. Ñe ri katak eo ej lo an Jeova jipañ e ñan kõm̦m̦an oktak ko, enaaj kajoorl̦o̦k wõt tõmak eo an. Kõn men in, enaaj dikl̦o̦k an inepata kõn men ko jet ãinwõt jããn.
Ñe Juon Em̦m̦aan Ej Mijak Ta ko Armej Renaaj Ba
9, 10. (1) Etke Nikodimõs im Josep jãn Arimatia rar jab kwal̦o̦k ñan ro jet bwe rej rũkal̦oor ro an Jijej? (2) Etke jet em̦m̦aan ro rainin rej ãliklik in erom rũkal̦ooran Jijej?
9 Jet em̦m̦aan ro rej ãliklik in l̦oor Jijej kõnke rej mijak ta ko armej renaaj ba. Ñan waanjoñak, Nikodimõs im Josep jãn Arimatia rar jab kwal̦o̦k ñan ro jet bwe rar rũkal̦oor ro an Jijej kõnke rar mijak ta eo Ri Ju ro renaaj ba ak kõm̦m̦ane. (Jon 3:1, 2; 19:38) Ta unin aerro kar mijak? Kõnke ri tõl ro an kabuñ rar lukkuun dike Jijej. Innem el̦aññe jabdewõt ear tõmak ilo Jijej, rar jab kõtl̦o̦k an del̦o̦ñ ilo im̦õn kweilo̦k eo an Ri Ju ro.—Jon 9:22.
10 Ilo jet jikin ko rainin, emaroñ pen ñan an em̦m̦aan ro kwal̦o̦k aer itoklimo in jel̦ã kõn Anij, Baibõl̦ eo, ak juon kabuñ. Emaroñ iion kajjirere im matõrtõr jãn ro ilo jikin jerbal eo an, ro m̦õttan, im baam̦le eo an. Ilo jet jikin, juon armej emaroñ pãd ilo kauwõtata el̦aññe ej jiroñ ro jet bwe ekõn̦aan ukot kabuñ eo an. Im juon em̦m̦aan me ej jerbal ilo jikin tarin̦ae, ilo kien, ak eutiej ilo jikin eo ej jokwe ie emaroñ l̦ap an ro jet kananaik e el̦aññe ej kõnono kõn kabuñ. Ñan waanjoñak, juon em̦m̦aan ilo Jãmne ear ba: “Men eo kom̦ Ri Kõnnaan ro an Jeova kom̦ij katakin kake kõn Baibõl̦ em̦ool. Ak el̦aññe inaaj juon uwaami, ilju wõt ak aolep armej renaaj jel̦ã kake. Enaaj ta l̦õmn̦ak eo an ro ij jerbal ippãer, ro ri turũ, im ro rejel̦ã kajjieõ im baam̦le eo aõ? Ãinwõt epen men in ñan ña.”
11. Ewi wãween Jijej ear jipañ rũkal̦oor ro an ñan jab mijak ta eo armej renaaj ba?
11 Rijjelõk ro an Jijej rar kwal̦o̦k aer peran. Bõtab, ewõr iien rar mijak ta ko ro jet renaaj ba kõn er. (Mark 14:50, 66-72) Ewi wãween Jijej ear jipañ rũkal̦oor ro an ñan wõnm̦aanl̦o̦k wõt im jerbali men ko rar katak kaki meñe armej ro rar jum̦ae er? Jijej ear kõpooj er ñe renaaj iion matõrtõr. Ear ba: “E m̦õn̦õn̦õ kom̦, ñe armej renaaj kõjdate kom̦, im ñe re naaj kõjepel kom̦ jãn er, im naaj kajjirere kake kom̦, im jol̦o̦k etami ãt nana kõn Nejin armej.” (Luk 6:22) Ear kakkõl rũkal̦oor ro an bwe rej naaj iion wõt matõrtõr. Ak ear jiroñ er bwe renaaj iion matõrtõr “kõn Nejin armej.” Im ear kakeememej er bwe Anij enaaj lale im kõjparok er iien otemjej el̦aññe rej kajjitõk ippãn Anij ñan jipañ im kakajoor er. (Luk 12:4-12) Jijej ear bareinwõt kũrtok ro im rar jino l̦oore ñan kobal̦o̦k ippãn rũkal̦oor ro an im jem̦jerã ippãer.—Mark 10:29, 30, UBS.
12. Ewi wãween jemaroñ jipañ ri katak eo ad ñan jab mijak ta eo ro jet renaaj ba kõn e?
12 Jemaroñ bareinwõt jipañ ri katak ro ad ñan jab mijak ta eo armej renaaj ba kõn er. Juon wãween jemaroñ kõm̦m̦ane men in ej ilo ad jipañ e ñan jel̦ã kadede ta eo emaroñ kõm̦m̦ane ñe ej iion jum̦ae jãn ro jet. (Jon 15:19) Ñan waanjoñak, ri jerbal ro m̦õttan im ro jet remaroñ jab errã ippãn kõn tõmak eo an, ak remaroñ kwal̦o̦k kajjitõk ko kõn men ko ej tõmak kaki. Jemaroñ jipañ e ñan uwaak jãn Baibõl̦ ilo juon wãween epidodo. Jemaroñ jem̦jerãik e im kwal̦o̦k kajjien ñan ro jet ilo congregation eo. Bõlen ro jeid im jatid remaroñ kar iion ejja wãween ko ej iioni. Ak bõlen men ko rej itoklimo kaki ej bar itoklimo kaki. Kõn men in, remaroñ m̦õttaik doon. Elukkuun aorõk bwe jen katakin e ñan jar iien otemjej im jãn bũruon. Men in emaroñ jipañ e ñan ejaak juon jem̦jerã epaak ippãn Jeova. Ejjab aikuj mijak ta ko armej renaaj ba kõnke Jeova enaaj jojomare im enaaj ãinwõt an dekã im jikin an kone.—Riit Sam 94:21-23; Jemes 4:8.
Ñe Juon Em̦m̦aan Ej L̦õmn̦ak bwe Ro Jet Rem̦m̦anl̦o̦k jãn E
13. Etke jet em̦m̦aan ro rar pepe ñan jab kõm̦m̦an wõnm̦aanl̦o̦k ko?
13 Jet em̦m̦aan ro remaroñ l̦õmn̦ak bwe em̦m̦anl̦o̦k ro jet ilo congregation eo jãn e. Bõlen rejjab lukkuun jel̦ã riit, ak epen aer kwal̦o̦k bũrueer im l̦õmn̦ak ko aer. Im bõlen remaroñ juon eo ejokok ak ãliklik in kwal̦o̦k kõn tõmak eo aer im̦aan armej ro. Innem epen ñan aer katak, uwaak ilo kweilo̦k, im kwal̦o̦k naan ippãn armej ro. Juon jeid im jatid m̦aan ear kwal̦o̦k bwe jãn ke ear dik ear pen an kwal̦o̦k naan. Ear ba bwe ke ear kwal̦o̦k naan jãn em̦ ñan em̦, jidik wõt an kal̦l̦al̦l̦al̦ ilo kejam ko, innem ej ajjãdikdik l̦o̦k jãn m̦weo bwe ren jab roñ ak lo e. Ear ba: “Ñe ij l̦õmn̦ak kõn jerbal in kwal̦o̦k naan jãn em̦ ñan em̦ ekõm̦m̦an menin aõ iten nañinmej.”
14. Etke rũkal̦oor ro an Jijej rar jab maroñ kajutakl̦o̦k enjel̦ eo enana jãn juon l̦addik?
14 L̦õmn̦ak m̦õk kõn eñjake eo an rũkal̦oor ro an Jijej ke rar jab maroñ kajutakl̦o̦k juon enjel̦ enana me ear miok n̦a ãnbwinin juon l̦addik. Kõn an kar jab tõprak bõlen rũkal̦oor rein remaroñ kar l̦õmn̦ak bwe rejjab maroñ kõm̦m̦ane men eo Jijej ear kõn̦aan bwe ren kõm̦m̦ane. Jemen l̦addik eo ear itok ñan ippãn Jijej im ear ba: “Irooj, kwõn tũriam̦okake nejũ m̦aan, bwe e [dibũbbũb] im kanooj eñtaan; bwe elõñ alen an buñ ilo kijeek, im elõñ alen ilo dãn. Im I ar bõktok e ñan ro ri kal̦oram̦, im raar ban kemour e.” Innem Jijej ear kõmour l̦addik eo ilo an kar kajutakl̦o̦k enjel̦ eo enana jãn e. Tokãlik, rũkal̦oor ro rar itok ñan ippãn Jijej im kajjitõk: “Etke kõm ar jab maroñ in kajutakl̦o̦k e?” Innem Jijej e ba ñan er: “E dik ami tõmak; bwe em̦ool ij ba ñan kom̦, el̦aññe ewõr ami tõmak ãinwõt juon ine in mõstad, kom̦ naaj ba ñan tol̦ in, ‘Kwõn ruwaakl̦o̦k ñan ijjuweo,’ im enaaj ilo̦k, im ejjel̦o̦k men ko kom̦ naaj bane.” (Matu 17:14-20) Juon eo ej tõmak im lõke Jeova enaaj maroñ kõm̦m̦ani men ko me ejjab tõmak en kar kõm̦m̦ani. Ak el̦aññe ej lõke e make, eban lo tõprak. Innem men in emaroñ kabbeer e im l̦õmn̦ak bwe ejakkar ñan an karejar ñan Jeova.
15, 16. Ewi wãween jemaroñ jipañ juon ri katak ñe ej l̦õmn̦ak bwe ejjab maroñ karejar ñan Jeova ãinwõt ro jet?
15 Jet iien juon ri katak emaroñ l̦õmn̦ak bwe wãween an naaj jerbal ñan Jeova eban em̦m̦an ak jejjet ãinwõt ro jet. El̦aññe ãindein, jemaroñ rõjañ e bwe en jab l̦õmn̦ak kõn joñan maroñ eo ippãn ak en lõke bwe Jeova enaaj jipañ e. Piter ear je: “Innãm kom̦win kõttãik kom̦ ium̦win pein Anij e kajoor, bwe En koutiej kom̦ ilo iien ekkar, im kom̦win likũt ami inepata otemjej n̦a Ippãn.” (1 Piter 5:6, 7) Jej aikuj jipañ ri katak eo ñan yokwe Jeova im kõn̦aan bwe en tõl mour eo an. Mel̦el̦ein bwe ej aikuj kaorõk men ko ear katak kaki jãn Baibõl̦ eo im kwal̦o̦k yokwe, lañlõñ, im wãween ko jet me rej kalikkar bwe Jeova ej tõl e ilo mour eo an. (Galetia 5:22, 23) Jar ej aikuj juon men elukkuun aorõk ippãn. (Pilippai 4:6, 7) Bareinwõt eaorõk ñan an mel̦el̦e bwe Anij eo enaaj kaperan im kakajoor e bwe en kõm̦m̦ane men eo Anij ej kajjitõk bwe en kõm̦m̦ane.—Riit 2 Korint 4:7.
16 Jet ri katak ro remaroñ aikuj jipañ ñan kakõm̦anm̦anl̦o̦k wãween aer riit im kõnono im̦aan mejen armej. Ro jet remaroñ l̦õmn̦ak bwe ejjab tõllo̦kũn aer karejar ñan Jeova kõnke rar kõm̦m̦ane jet m̦anit ko renana m̦okta jãn aer kar jel̦ã kõn m̦ool eo. Jemaroñ jipañ ri katak eo ad ilo wãween kein ruo ikijjeen ad kwal̦o̦k ad kea kake e im meanwõd ippãn. Jijej ear ba: “Ri ãjmour re jab aikuj rũ wũno, a ro re nañinmej wõt.”—Matu 9:12.
Jipañ Elõñl̦o̦k Em̦m̦aan ro ñan Katak kõn Jeova
17, 18. (1) Ewi wãween jemaroñ tõpar elõñl̦o̦k em̦m̦aan ro ñe jej kwal̦o̦k naan? (2) Ta eo jenaaj etale ilo katak in tok juon?
17 Baibõl̦ eo wõt emaroñ jipañ armej ro lo m̦õn̦õn̦õ eo em̦ool. Innem jekõn̦aan jipañ elõñl̦o̦k em̦m̦aan ro bwe ren m̦õn̦õn̦õ in roñjake im pokake naan ko ilo Baibõl̦. (2 Timote 3:16, 17) Ewi wãween jemaroñ tõpar elõñl̦o̦k em̦m̦aan ro ñe jej kwal̦o̦k naan? Eokwe jemaroñ kajjioñ in kwal̦o̦k naan ilo jota, ilo raelepen Jãdede ak Jabõt, ak ilo iien ko ejjel̦o̦k jerbal kõnke elõñl̦o̦k em̦m̦aan ro remaroñ pãd ilo m̦oko im̦wier. Ñe l̦õm̦aro rej kwal̦o̦k naan remaroñ kajjitõk ñan kõnnaan ippãn jemen baam̦le eo. Im el̦aññe ekkar, jemaroñ kwal̦o̦k naan ippãn em̦m̦aan ak likao ro ilo jikin jerbal eo ad. Ewõr jet jeid im jatid kõrã ilo congregation eo me l̦õm̦aro ippãer rejjab ri tõmak, innem jemaroñ kajjioñ jipañ l̦õm̦arein bwe ren itoklimo in katak.
18 Jekõn̦aan jipañ aolep armej joñan wõt ad maroñ bwe ren item jel̦ã m̦ool eo. Ro im rej pukot m̦ool eo renaaj roñjake ñe jej kwal̦o̦k naan ñan er. Jej aikuj meanwõd im jab bõjrak jãn ad jipañ aolep ro im rekõn̦aan jel̦ã kõn m̦ool eo. Ak ta eo emaroñ jipañ l̦õm̦aro im em̦õj aer peptaij ñan kõn̦aan bõk eddo ko ilo congregation eo? Katak in tok juon enaaj uwaake kajjitõk in.
[Kamelele eo itulals]
a Lale bwebwenato ko ilo Imõniaroñroñ ko.
Ta Uwaak eo Am̦?
• Ewi wãween jemaroñ jipañ em̦m̦aan ro ñan jel̦ã ewi wõt men eo eaorõktata?
• Ewi wãween jemaroñ jipañ ri katak ro ad ñan jab mijak ta ko armej ro renaaj ba kõn e?
• Ewi wãween jemaroñ jipañ juon ri katak ñe ej l̦õmn̦ak bwe ejjab maroñ karejar ñan Jeova ãinwõt ro jet?
[Pija ilo peij 25]
Kwõj ke kwal̦o̦k naan ippãn em̦m̦aan ro ilo jabdewõt iien?
[Pija ilo peij 26]
Ewi wãween kwõmaroñ jipañ ri katak eo am̦ bwe en pojak in jelm̦ae mãlejjoñ ko?