Jerbal Ippãn Anij Ej Kõm̦m̦an Ad M̦õn̦õn̦õ

1. Meñe Jeova eutiejtata, ak ta eo ej kõtl̦o̦k bwe ro jet ren kõm̦m̦ane?

JEOVA eutiejtata, im ear kõm̦anm̦an men otemjej. Ejjel̦o̦k joñan mãlõtlõt eo an im kajoor eo an. Ãlikin an kar Jeova jipañ Job ñan jel̦ã im mel̦el̦e kõn men in, Job make ear ba: “Ijel̦ã bwe kwõkajoor bõtata, im bwe kwõmaroñ kõm̦m̦ane jabdewõt men eo kokõn̦aan.” (Job 42:2, UBS) Jeova emaroñ kõm̦m̦an jabdewõt men ekõn̦aan im ejjab aikuji juon bwe en jipañe. Bõtab kõn an l̦ap an yokwe, ej kõtl̦o̦k bwe ro jet ren jerbal ippãn ñan kajejjet ankilaan.

2. Ta jerbal eo eaorõk Jeova ear kõtl̦o̦k bwe Jijej en jipañe kake?

² Anij ear kõm̦anm̦an Nejin, Jijej, m̦okta jãn an kar kõm̦anm̦an men otemjej ekoba armej ro. Innem, Jeova ear kõtl̦o̦k bwe Nejin en jipañe ilo an kõm̦anm̦an aolep men ko jet. (Jon 1:1-3, 18) Rijjilõk Paul ear kwal̦o̦k kõn Jijej ilo an ba: “Bwe kõn E em̦õj kõm̦m̦an men ko otemjej, men ko ilañ kab men ko ioon lal̦, ko jej loi im ko jejjab loi, el̦aññe tũroon ko ak ruutiej ro ak irooj ro ak kajoor ko; em̦õj kõm̦anm̦an men otemjej kõn E im ñan E.” (Kolosse 1:15-17) Jeova ear jab baj lel̦o̦k wõt juon jerbal eaorõk ñan Nejin, ak ear bar kwal̦o̦k ñan ro jet kõn jerbal in eaorõk ear kõm̦m̦ane. Men in ej juon jeraam̦m̦an el̦ap!

3. Ta jerbal ko Jeova ear kõtl̦o̦k bwe Adam en kõm̦m̦ani, im etke?

³ Jeova ej bar kõtl̦o̦k bwe armej ro ren jerbal ippãn. Ñan waanjoñak, ear kõtl̦o̦k bwe Adam en n̦aetan menninmour ko. (Jenesis 2:19, 20) Ejjel̦o̦k pere bwe jemaroñ pijaikl̦o̦k an Adam lukkuun m̦õn̦õn̦õ ke ear kõm̦m̦ane jerbal in! Ear lukkuun etale wãween an menninmour ko m̦akũtkũt im jekjekier. Ãlikin an kõm̦m̦ane men in, ear kããlõt juon ãt ekkar im jejjet ñan kajjojo menninmour. Jeova emaroñ kar likũt etan kajjojo menninmour ko kõnke e eo ear kõm̦anm̦ani. Bõtab, ear jab kõm̦m̦ane men in. Ear kwal̦o̦k ñan Adam bwe el̦ap an yokwe e ilo an kar kõtl̦o̦k bwe en likũt etan kajjojo menninmour ko. Ejjab men in wõt ak ebar wõr juon jerbal Anij ear lel̦o̦k ñane bwe en kõm̦m̦ane. Ta in? Ej ñan kõm̦m̦an bwe aolepen lal̦ in en erom pedetaij. (Jenesis 1:27, 28) Bõtab, el̦ap an kabũrom̦õjm̦õj bwe Adam ear kããlõt ñan bõjrak jãn an jerbal ippãn Anij. Kõn an kar kõm̦m̦ane men in, ear bõktok el̦ap jorrããn im eñtaan ñan e make kab ro nejin.​—Jenesis 3:17-19, 23.

4. Ewi wãween an kar ro jet jerbal ippãn Anij ñan kajejjet ankilaan?

⁴ Tokãlik, Anij ear kõtl̦o̦k bwe ro jet ren jerbal ippãn. Ñan waanjoñak, Noa ear kalõk juon wa me ear jipañ e im baam̦le eo an bwe ren el̦l̦ã im mour jãn Ibwijleplep eo. Moses ear kanemkwõj RiIsrael ro jãn Ijipt. Joshua ear ãñinl̦o̦k RiIsrael ro ñan Ãneen Kallim̦ur eo. Solomon ear kalõk tampel̦ eo ilo Jerusalem. Meri ear jinen Jijej. Aolep rũkarejar rein retiljek im ro jet rar jerbal ippãn Jeova ñan kajejjet ankilaan.

5. Jerbal ta eo jej bõk kun̦aad ie, im ear ke menin aikuj bwe Jeova en kõjerbal kõj? (Lale pija eo ilo jinoin katak in.)

⁵ Rainin, Jeova ej kõtl̦o̦k bwe jen jerbal ippãn ilo ad kate kõj joñan wõt ad maroñ ñan rejetake Aelõñ eo an. Elukkuun lõñ men ko jemaroñ kõm̦m̦ani ilo ad jerbal ñan Anij. Meñe emaroñ oktak maroñ ko ad jãn doon, ak kõj aolep jemaroñ kwal̦o̦k kõn ennaan eo em̦m̦an kõn Aelõñ eo. Jeova emaroñ in kar make kõm̦m̦ane jerbal in. Emaroñ kar kajju kõnnaan lal̦ tak jãn lañ ñan armej ro ijin ioon lal̦. Bareinwõt, Jijej ear ba bwe Jeova emaroñ kar kõm̦m̦an bwe dekã ko ren kwal̦o̦k ñan ro jet kõn Kiiñ in Aelõñ eo an. (Luk 19:37-40) Bõtab, Jeova ejjab kõm̦m̦ane men in. Ej kõtl̦o̦k bwe jen “jerbal ippãn.” (1 Korint 3:9) Rijjilõk Paul ear je im ba: “Kõm jerbal Ippãn im bareinwõt akwel̦ap ñan kom̦ bwe en jab jettokjãn ami bõk jouj an Anij.” (2 Korint 6:1) Ej juon jeraam̦m̦an el̦ap bwe Anij ej kõtl̦o̦k bwe jen jerbal ippãn, im men in ej kõm̦m̦an bwe jen m̦õn̦õn̦õ. Jen lale etke.

JERBAL IPPÃN ANIJ EJ KÕM̦M̦AN AD M̦ÕN̦ÕN̦Õ

6. Kar ta eñjake eo an Jijej ke ear jerbal iturin Jemãn?

⁶ El̦ap an rũkarejar ro an Anij m̦õn̦õn̦õ ilo aer jerbal ippãn. M̦okta jãn an kar Jijej itok ñan lal̦ in, ear ba: “Ña iar pãd ippãn Jeova ilo jinoin ial̦ eo An . . . iar pãd iturin ãinwõt juon eo ekapeel ilo jerbal, im iar jitõnbõro ippãn raan otemjej, im iar m̦õn̦õn̦õ iien otemjej im̦aan.” (Jabõn Kõnnaan 8:22, 30) Ke Jijej ear jerbal ippãn Jemãn, ear m̦õn̦õn̦õ kõnke elõñ jerbal ko ear katõpraki im ear jel̦ã bwe Jeova ej yokwe e. Ak ta kõn kõj?

7. Etke jerbalin kwal̦o̦k naan ej kõm̦m̦an bwe en l̦ap ad m̦õn̦õn̦õ?

⁷ Jijej ear ba bwe el̦ap ad m̦õn̦õn̦õ ñe jej bõk im ñe jej lel̦o̦k ñan ro jet. (Jerbal 20:35) El̦ap ad m̦õn̦õn̦õ ñe jej jel̦ã kõn m̦ool eo. Bõtab, etke el̦ap ad bar m̦õn̦õn̦õ ñe jej kwal̦o̦k ñan ro jet kõn m̦ool eo? Kõnke jej loe aer lukkuun m̦õn̦õn̦õ kõn aer mel̦el̦e kõn katak ko rem̦ool ilo Baibõl̦ im aer epaakel̦o̦k Anij. El̦ap ad m̦õn̦õn̦õ ñe jej loe aer kõm̦m̦an oktak ko, ejjab baj ilo wãween aer l̦õmn̦ak ak bar ilo wãween aer kõm̦m̦an. El̦ap an aorõk jerbal in im ej kõm̦m̦an bwe en l̦ap ad m̦õn̦õn̦õ. Jerbalin kwal̦o̦k naan ej jipañ ro em̦ool bũrueer ñan bõk mour indeeo.​—2 Korint 5:20, UBS.

8. Ta eo jet rej ba kõn unin aer m̦õn̦õn̦õ ilo aer jerbal ippãn Anij?

⁸ Ñe jej jipañ ro jet bwe ren jel̦a kõn Anij, jejel̦ã bwe jej kabuñbũruon Anij im ewõr tokjãn ad kate kõj ilo ad karejar ñane. Men in ej bar jipañ kõj bwe jen m̦õn̦õn̦õ. (Riit 1 Korint 15:58, UBS.) Marco, eo im ej jokwe ilo aelõñin Itali, ej ba: “El̦ap aõ m̦õn̦õn̦õ kõnke ijel̦ã bwe ij kate eõ im lel̦o̦k aolepen aõ ñan Jeova im jab juon eo me enaaj mel̦o̦kl̦o̦k men ko iar kõm̦m̦ani.” Ãindein bar l̦õmn̦ak eo an Franco, eo im ej bar jokwe ilo Itali. Ej ba: “Jeova ej kõjerbal naan ko an ilo Baibõl̦ im kein jipañ ko jet ñan kakeememej kõj aolep raan bwe ej yokwe kõj im bwe aolep men ko jej kõm̦m̦ani ñane raorõk, meñe jemaroñ l̦õmn̦ak bwe edik tokjãer. Aõ jerbal ippãn Anij el̦ap an em̦m̦an kõnke ej kõm̦m̦an aõ m̦õn̦õn̦õ im ej kõm̦m̦an bwe in kile tokjãn mour e aõ.”

JERBAL IPPÃN ANIJ EJ KARUWAAKL̦O̦K KÕJ ÑANE IM RO JET

9. Ewi joñan an Jeova im Jijej epaake doon, im etke?

⁹ Ñe jej jerbal ippãn ro el̦ap ad yokwe er, jenaaj epaakel̦o̦k er. Enaaj l̦apl̦o̦k ad jel̦a kõn wãween ko ippãer im kain armej rot er. Jenaaj jel̦ã kõn mejãnkajjik ko aer im ta ko rej kõm̦m̦ani bwe ren kajjioñ tõpar mejãnkajjik ko aer. Bõlen ium̦win elõñ bilien iiõ ko, Jijej ear jerbal ippãn Jeova. Kõn men in, yokwe eo aerro ñan doon ear lukkuun l̦ap im ejjel̦o̦k juon emaroñ ko̦kkure. Jijej ear kõmel̦el̦eik joñan aerro lukkuun epaake doon ke ear ba: “Ña im Jema kõm̦ro wõt juon.” (Jon 10:30) El̦ap aerro kar bõrokuk ke rar jerbal ippãn doon.

10. Etke jerbalin kwal̦o̦k naan ej kõm̦m̦an bwe jen epaakel̦o̦k Anij im ro jet?

¹⁰ Ke Jijej ear jar, ear kajjitõk ippãn Jeova bwe en lale im kõjparok rũkal̦oor ro an. Etke? Jijej ear ba: “Bwe ren maroñ in juon wõt ãinwõt arro juon wõt.” (Jon 17:11, UBS) Ñe jej l̦oori ta ko Anij ej ba im bõk kun̦aad ilo jerbalin kwal̦o̦k naan, el̦apl̦o̦k ad jel̦ã kõn wãween ko rem̦m̦an kõn Anij. Jej katak etke ej juon menin mãlõtlõt ñan lõke Anij im l̦oori naanin tõl ko an. Innem, ñe jej ruwaakl̦o̦k ñane, enaaj ruwaaktok ñan kõj. (Riit Jemes 4:8.) Jej bar epaake rũttõmak ro jeid im jatid kõnke apañ ko jej iiooni, men ko jej m̦õn̦õn̦õ kaki, im kõttõpar ko ad rej ãinl̦o̦kwõt juon. Jej jerbal ippãn doon, jej m̦õn̦õn̦õ ippãn doon, im jej kijenmej ippãn doon. Octavia, eo im ej jokwe ilo aelõñin Britain, ej ba: “Jerbal ippãn Jeova ekõm̦m̦an bwe in epaakel̦o̦k ro jet.” Kõrã in ej kõmel̦el̦e im ba bwe unin an ãindein ej kõnke kõttõpar ko an, ro m̦õttan rej bar kõttõpari. Ejjel̦o̦k pere bwe ãindein ad bar eñjake. El̦aññe jej loe an ro jet kate er ñan karejar ñan Jeova im kabuñbũruon, men in ekõm̦m̦an bwe jen lukkuun epaakel̦o̦k er.

11. Etke jenaaj lukkuun epaakel̦o̦k wõt Jeova im rũttõmak ro jeid im jatid ilo jukjukun pãd eo ekããl?

¹¹ Yokwe eo ad ñan rũttõmak ro jeid im jatid kiiõ ekanooj l̦ap, bõtab enaaj l̦apl̦o̦k wõt ilo jukjukun pãd eo ekããl. L̦õmn̦ak m̦õk kõn aolep jerbal ko rem̦m̦an jenaaj kõm̦m̦ani ilju im jekl̦aj! Jenaaj karwaineneik ro rar mej im jenaaj katakin er kõn Jeova. Bareinwõt, jenaaj jerbal ippãn doon ñan kõm̦m̦an bwe lal̦ in en juon pedetaij. Jenaaj lukkuun m̦õn̦õn̦õ ilo ad jerbal ippãn doon im jidik kõn jidik oktak im weeppãn ium̦win tõl eo an Kũraij. Aolep armej renaaj lukkuun epaakel̦o̦k wõt doon im epaakel̦o̦k wõt Jeova, eo im enaaj katõprak aolep kõn̦aan ko ad.​—Sam 145:16.

AD JERBAL IPPÃN ANIJ EJ KÕJPAROK KÕJ

12. Ewi wãween an jerbalin kwal̦o̦k naan maroñ kõjparok kõj?

¹² Jej aikuj in kõjparok jem̦jerã eo ad ippãn Jeova. Kõnke jejjab weeppãn im jej mour ilo jukjukun pãd in an Setan, epidodo ad jino l̦õmn̦ak im kõm̦m̦an ãinwõt armej ro ilo lal̦ in. Ej ãinwõt ñe jej tutu ilo juon reba me el̦ap an aete im ej bõkl̦o̦k kõj ñan ijo jejjab kõn̦aan etal ñane. Kõnke jejjab kõn̦aan pel̦o̦k ñan ijo, jej lukkuun kate kõj joñan wõt ad maroñ ñan aõ ñan ijo juon. Ejja ãindeinl̦o̦k wõt ad aikuj kate kõj bwe jen jab po ilo men ko an jukjukun pãd in an Setan. Ewi wãween an jerbalin kwal̦o̦k naan kõjparok kõj? Ñe jej kõnnaan kõn Jeova im kwal̦o̦k kõn naan ko an ilo Baibõl̦, jej l̦õmn̦ak wõt kõn men ko raorõk im rem̦m̦an, ejjab kõn men ko me remaroñ kam̦õjn̦o̦ik tõmak eo ad. (Pilippai 4:8) Jerbalin kwal̦o̦k naan ej kakajoorl̦o̦k tõmak eo ad kõnke ej kakeememej kõj kõn kallim̦ur ko an Anij im kõn yokwe eo an. Ej bar jipañ kõj kõn̦ak wõt kein tarin̦ae ko ad ilo kõkkar me jej aikuji ñan ad kõjparok kõj jãn Setan im jukjukun pãd in an.​—Riit Epesõs 6:14-17, UBS.

13. Ta l̦õmn̦ak eo an juon iaan rũttõmak ro jeid im jatid ilo Aujtõrõlia kõn jerbalin kwal̦o̦k naan?

¹³ El̦aññe jej poub wõt ilo jerbalin kwal̦o̦k naan, katak ippãd make, im jipañ ro ilo eklejia eo, jej kõjparok kõj bwe en jab l̦ap ad inepata kõn apañ ko jej iiooni. Joel, eo im ej jokwe ilo Aujtõrõlia, ej ba: “Jerbalin kwal̦o̦k naan ej jipañ eõ kõnke ej kakeememej eõ kõn apañ ko armej ro rej iiooni im kõn jeraam̦m̦an ko ij iiooni ilo aõ l̦oori naanin kakapilõk ko ilo Baibõl̦. Jerbalin kwal̦o̦k naan ej jipañ eõ bwe in kwal̦o̦k wõt ettã bõro. Ej jipañ eõ bwe in atartar wõt ioon Jeova im rũttõmak ro jeiũ im jatũ.”

14. Etke ad kate kõj ilo jerbalin kwal̦o̦k naan ej kaalikkar bwe kajoor eo an Anij ej pãd ippãd?

¹⁴ Jerbalin kwal̦o̦k naan ebar jipañ kõj ñan ad lukkuun tõmak bwe kajoor eo an Anij ej pãd ippãd. Ñan waanjoñak, jen ba bwe jerbal eo am̦ ej ñan lel̦o̦k kijen armej ro ilo bukwõn eo am̦ pilawã. Kwõjjab bõk on̦ãm̦ ilo am̦ kõm̦m̦ane jerbal in, ak ilo mour eo am̦ ewõr men ko kwõj aikuj in kõl̦l̦ãiki. Bareinwõt, armej ro ilo bukwõn eo am̦ rejjab kõn̦aan pilawã eo kwõj bõkl̦o̦k ñan er, im jet redike am̦ bõkl̦o̦k kijeer pilawã. Kwõnaaj ke kõn̦aan wõt kõm̦m̦ane jerbal in? Ejjel̦o̦k pere bwe kwõmaroñ ebbeer im kam̦õj eok jãn jerbal in. Ium̦win elõñ iiõ ko m̦aantak, elõñ iaad jej wõnm̦aanl̦o̦k im jol̦o̦k iien ko ad im jããn ko ad bwe jen jibadekl̦o̦k armej ro im kwal̦o̦k naan ñan er meñe rej kajjirere kake kõj ak illu. Men in ej kaalikkar bwe kajoor eo an Anij ej pãd ippãd im jipañ kõj.

AD JERBAL IPPÃN ANIJ EJ KAALIKKAR AD YOKWE E IM RO JET

15. Ewi wãween an jerbalin kwal̦o̦k naan ekkejell̦o̦k ñan ankilaan Anij ñan armej ro?

¹⁵ Jerbalin kwal̦o̦k naan ej ekkejell̦o̦k ñan ankilaan Anij ñan armej ro. Ewi wãween? Ankilaan Anij ej bwe armej ro ren mour ñan indeeo. Meñe Adam ear jerawiwi, ak kõn̦aan in an Jeova ear jab oktak. (Aiseia 55:11, UBS) Ewõr juon men Anij ear kõm̦m̦ane ñan kanemkwõj kõj jãn jerawiwi im mej. Ta in? Ear jilkintok Jijej ñan lal̦ in bwe en katok kõn mour eo an. Bõtab, bwe jen maroñ bõk tokjãn jãn katok in mour eo an Jijej, jej aikuj in pokake Anij. Jijej ear kwal̦o̦k ñan armej ro kõn ta eo Anij ekõn̦aan bwe ren kõm̦m̦ane, im ear bar jiroñ rũkal̦oor ro an bwe ren kõm̦m̦ane ejja men in wõt. Raan kein, ñe jej kwal̦o̦k naan im jipañ ro jet bwe ren jeran Anij, jej jerbal ippãn Anij im rejetake kõn̦aan in an ñan lo̦mo̦o̦ren armej ro jãn jerawiwi im mej.

16. Ewi wãween an jerbalin kwal̦o̦k naan ekkejell̦o̦k ñan kien ko ruo rel̦l̦aptata an Anij?

¹⁶ Ñe jej jipañ ro jet bwe ren jel̦ã kõn wãween aer maroñ bõk mour indeeo, jej kwal̦o̦k ñan er ke jej yokwe er im jej yokwe Jeova. Baibõl̦ ej kwal̦o̦k bwe Jeova “ekõn̦aan lo̦mo̦o̦ren armej otemjej, im bwe ren itõm jel̦ã m̦ool.” (1 Timote 2:4) Ke juon Parisi ear kajjitõk ippãn Jijej kõn ewi wõt kien eo el̦ap im aorõktata, Jijej ear ba: “Kwõn yokwe Irooj am̦ Anij kõn aolepen bũruom̦ im kõn aolepen am̦, im kõn am̦ l̦õmn̦ak otemjej. Eñin kien eo el̦ap im m̦okta. Im eo kein karuo ãinwõt in, Kwõn yokwe rũturum̦ im ãinwõt kwe.” (Matu 22:37-39) Jej pokake kien kein ñe jej kwal̦o̦k kõn ennaan eo em̦m̦an.​—Riit Jerbal 10:42, UBS.

17. Ewi wãween am̦ l̦õmn̦ak kõn jeraam̦m̦an eo ad ñan kwal̦o̦k naan?

¹⁷ Elukkuun l̦ap ad jeraam̦m̦an! Etke? Kõnke Jeova ear letok ñan kõj juon jerbal me ej kõm̦m̦an ad m̦õn̦õn̦õ, kõm̦m̦an bwe jen epaake e im rũttõmak ro jeid im jatid, im kõjparok jem̦jerã eo ad ippãn. Jerbal in ej bar jipañ kõj ñan ad kwal̦o̦k yokwe eo ad ñan Anij im ro jet. Elõñ milien rũkarejar ro an Jeova ipel̦aakin lal̦ in, im aolepeer ekajjo apañ ko aer jãn doon. Bõtab, meñe jedik ak jerũtto, jem̦weiie ak jerata, jekajoor ak m̦õjn̦o̦, kõj aolep jej kate kõj joñan wõt ad maroñ ñan jipañ ro jet jel̦ã kõn m̦ool eo. Jej ãinwõt Chantel juon kõrã me ej jokwe ilo aelõñin France. Ej ba: “Eo eutiejtata ilañ im ilal̦, eo ear kõm̦anm̦an men otemjej, im ej Anij in m̦õn̦õn̦õ, ej ba ñan ña: ‘Etal im kwal̦o̦k! Kwal̦o̦k kõn ña, kwal̦o̦k ta ko ilo bũruom̦. Inaaj jipañ eok ikijjeen kajoor eo aõ, naan ko aõ ilo Baibõl̦, enjel̦ ro, rũttõmak ro jeim̦ im jatũm̦, kein katak im kamminene ko, im naanin tõl ko rejejjet ilo iien ko rekkar.’ Ej juon jeraam̦m̦an el̦ap ñan kõm̦m̦ane ta eo Jeova ej kajjitõk ippãd bwe jen kõm̦m̦ane im ad jerbal ippãn!”